ក្នុងថ្ងៃបុណ្យបុណ្យគោរពព្រះអម្ចាស់យេស៊ូរងទុក្ខលំបាក សុក្រពិសិដ្ឋនេះ ព្រះសហគមន៍កាតូលិកនៅកម្ពុជាបានបញ្ជូនប្រាក់ដង្វាយជូនដល់លោកកាឌីណាល់ឆាល បូ ជាអគ្គអភិបាលនៃព្រះសហគមន៍យ៉ាងហ្គូននៃប្រទេសមីយ៉ាន់ម៉ា។ នេះបើយោងតាមសារលិខិតរបស់លោកអភិបាលអូលីវីយ៉េ ជ្មីតហស្លេ អភិបាលព្រះសហគមន៍កាតូលិកភូមភាគភ្នំពេញចេញផ្សាយនៅថ្ងៃទី១៨ ខែមេសានេះ។
ក្នុងសារលិខិតតាងនាមឲ្យលោកអភិបាលក្នុងប្រទេសកម្ពុជាទាំងបីអង្គ លោកអភិបាលអូលីវីយ៉េបានបញ្ជាក់អំពីសាមគ្គីភាពរបស់គ្រីស្តបរិស័ទកាតូលិកកម្ពុជាដែលបានចូលរួមចំណែករំលែកទុក្ខសោកនាដកម្មជាមួយប្រជាជនមីយ៉ាន់ម៉ាដែលបានរងគ្រោះដោយសារគ្រោះរញ្ជួយដីកាលពីចុងខែមីនាកន្លងទៅនេះ។
ប្រទេសមីយ៉ាន់ម៉ាបានរងនូវគ្រោះរញ្ជួយដីកម្រិត៧,៧រ៉ិចទ័រ ដែលបានសម្លាប់មនុស្សជាង៣០០០នាក់ និងបណ្ដាលឲ្យមនុស្សជាច្រើនពាន់គ្រួសារខ្វះទីជម្រក ម្ហូបអាហារ រងរបួស និងបាត់បង់សាច់ញាតិ មិត្តភក្តិ អ្នកជិតខាងរបស់ខ្លួន។
លោកអភិបាលអូលីវីយ៉េ បានឲ្យដឹងតាមរយៈសំណេរថា ក្រោយពីបានទទួលសារអំពាវនាវរបស់លោកកាឌីណាល់ឆាល បូ អំពីMERCI «នៅថ្ងៃអាទិត្យ បុណ្យហែស្លឹក យើងខ្ញុំបានរៀបចំការប្រមូលប្រាក់តង្វាយពិសេសមួយ ដើម្បីបង្ហាញពីសាមគ្គីភាពជាក់ស្តែងរបស់យើងខ្ញុំជាមួយព្រះសហគមន៍កាតូលិក និងប្រជាជននៅប្រទេសមីយ៉ាន់ម៉ា។»
ថ្ងៃបុណ្យហែស្លឹក គឺត្រូវនឹងថ្ងៃទី១៣ ខែមេសាដែលបុណ្យលើកតម្កើងទុក្ខលំបាករបស់ព្រះអម្ចាស់យេស៊ូគ្រីស្ត។ ក្នុងថ្ងៃនោះ ព្រះសហគមន៍បានរៃអង្គាសប្រាក់ដង្វាយនៅតាមព្រះសហគមន៍នីមួយៗ ដើម្បីជួយដល់ប្រជាជននៅមីយ៉ាន់ម៉ា។
ក្នុងលិខិតដដែលបានឲ្យដឹងថា នៅក្នុងឆ្នាំមហាករុណាទិគុណនេះ ខណៈយើងធ្វើដំណើររួមជាមួយគ្នាឆ្ពោះទៅសេចក្តីសង្ឃឹម យើងខ្ញុំសូមទូលអង្វរព្រះជាម្ចាស់ដ៏មានឫទ្ធានុភាពសព្វប្រការ ដោយអានុភាពឈើឆ្កាងដ៏វិសុទ្ធរបស់ព្រះយេស៊ូ សូមព្រះអង្គប្រទានពរដល់លោកកាឌីណាល់ និងប្រជាជនរបស់លោកទាំងអស់ នូវការលួងលោម ការលើកទឹកចិត្ត និងជំនឿមាំមួន ដើម្បីបានរកឃើញពន្លឺតាមរយៈទុក្ខលំបាកនាពេលនេះ។
ប្រាក់ដង្វាយដែលទទួលបានពីគ្រីស្តបរិស័ទនោះ មានចំនួន៩០លានរៀល ស្មើនឹង២២.៥០០ដុល្លារអាមេរិក ដែលលោកអភិបាលអូលីវីយ៉េបានបញ្ជាក់ថា វា«លើសពីសេចក្តីរំពឹងទុក»របស់លោក។ លោកបានបញ្ជាក់បន្ថែមថា ប្រាក់នេះគឺ «ដើម្បីជួយគាំទ្រ បេសកកម្មសង្គ្រោះបន្ទាន់របស់លោកកាឌីណាល់ នៅក្នុងប្រទេសមីយ៉ាន់ម៉ា»។
ព្រះសហគមន៍កាតូលិកនៅកម្ពុជាមានចំនួន១០៧ ព្រះសហគមន៍ ដែលមានបីភូមិភាគ រួមមានភូមិភាគភ្នំពេញ ភូមិភាគបាត់ដំបង និងភូមិភាគកំពង់ចាម និងមានគ្រីស្តបរិស័ទប្រមាណជាង២ម៉ឺននាក់៕
ដោយកែវ កញ្ញា
Daily Program
