គ្រីស្តបរិស័ទប្រមាណ៤០ នាក់ពីព្រះសហគមន៍កាតូលិកព្រះកុមារយេស៊ូបឹងទំពន់ រួមគ្នាធ្វើបូជនីយចរឆ្ពោះទៅកាន់ទ្វារដ៏វិសុទ្ធ និងទីសក្ការដ្ឋានព្រះហឫទ័យប្រណីសន្តោសរបស់ព្រះជាម្ចាស់ នៅព្រះវិហារសន្តសិលានិងសន្តប៉ូល ភ្នំពេញថ្មីនាថ្ងៃទី២៩ ខែមីនា ឆ្នាំ២០២៥ ណែនាំដោយលោកបូជាចារ្យ ហ្រ្វង់ស័រ អេមេល្សដាល។
មុនឆ្លងទ្វារដ៏វិសុទ្ធ លោកបូជាចារ្យ ហ្រ្វង់ស័រ បានណែនាំគ្រីស្តបរិស័ទឱ្យយល់អំពី ការធ្វើបូជនីយចរនេះ អាចឱ្យយើងទទួលការសន្តោសប្រណីរបស់ព្រះជាម្ចាស់យ៉ាងពេញបរិបូរណ៍ មិនគ្រាន់តែការលើកលែងទោសឱ្យរួចពីបាបតែប៉ុណ្ណោះ សូម្បីតែផ្លែនៃអំពើបាបក៏ត្រូវបានលុបលាងផងដែរ។
លោកថា៖ «នេះជាឱកាសដើម្បីជុសជួល ទូទាត់ ផលផ្លែនៃអំពីបាបដែលនៅសេសសល់ ប្រសិនមិនទូទាត់ឥឡូវនេះ (ក្នុងឆ្នាំមហាករុណាទិគុណ) ត្រូវទូទាត់នៅថ្ងៃក្រោយ គឺនៅស្ថានជម្រះ មុននឹងជួបព្រះជាម្ចាស់»។
បូជនីយចរជាឱកាសមួយ មិនគ្រាន់តែឱ្យយើងកែប្រែចិត្តគំនិត និងទទួលធម៌មេត្តាករុណារបស់ព្រះជាម្ចាស់ ប៉ុន្តែជារបៀបបង្កើត រឺកសាងព្រះសហគមន៍ឱ្យបានរឹងមាំតាមរយៈទំនាក់ទំនងរវាងគ្នានិងគ្នា។ នេះតាមការលើកឡើងរបស់លោកបូជចារ្យហ្រ្វង់ស័រ។
លោកបន្តថា នេះក៏ជាឱកាស ដើម្បីនឹកគិតអំពីអំពើបាបរបស់ខ្លួន ហើយយល់ថាព្រះជាម្ចាស់ស្រឡាញ់យើងកាន់តែខ្លាំងឡើងៗ ។ យើងមានសំណាងល្អ ដោយ «យើងស្គាល់ព្រះយេស៊ូ បានធ្វើឱ្យយើងមានសេរីភាព រួចពីបាប អាចក្រោកឈរឡើងវិញ ហើយធ្វើជាម្ចាស់នៃជីវិតរបស់យើង ដោយសារតែសេចក្តីស្រឡាញ់របស់ព្រះជាម្ចាស់»។
តែទោះបីជាយ៉ាងណាក៏ដោយ លោកក៏បានលើកទឹកចិត្តឱ្យបងប្អូនគ្រីស្តបរិស័ទទាំងអស់គ្នាឆ្ពោះទៅរកព្រះជាម្ចាស់ ដោយកុំគិតច្រើនទៅលើអំពើបាបរបស់ខ្លួនខ្លាំងពេក តែត្រូវសម្លឹងមើលធម៌មេត្តាករុណារបស់ព្រះជាម្ចាស់។
ដើម្បីទទួលធម៌មេត្តាករុណារបស់ព្រះជាម្ចាស់យ៉ាងពេញលេញ គ្រីស្តបរិស័ទត្រូវទៅកន្លែងទីសក្ការដ្ឋាននៃឆ្នាំព្រះមហាករុណាទិគុណ ដើម្បីទទួលអគ្គសញ្ញាលើកលែងទោស ទទួលព្រះកាយ អធិដ្ឋានតាមបំណងសម្តេចប៉ាបក្នុងខែនីមួយៗ និងត្រូវប្រព្រឹត្តកិច្ចការធម៌មេត្តាករុណាខាងរូបកាយចំនួន៧ រួមមាន ផ្តល់អាហារ ផ្តល់ទឹក ផ្តល់សំលៀកបំពាក់ ជួយជនបរទេស សួរសុខទុក្ខអ្នកជំងឺនិងអ្នកជាប់ឃុំ និងជួយបញ្ចុះសព។
ទីសក្ការដ្ឋានក្នុងភូមិភាគភ្នំពេញមានបួនកន្លែង រួមមាន ព្រះវិហារសន្តសិលានិងសន្តប៉ូល(ភ្នំពេញថ្មី) ព្រះវិហារក្សត្រីនៃសន្តិភាពអរិយក្សត្រ ព្រះវិហារសន្តយ៉ូសែប(ផ្សារតូច) និងព្រះវិហារសន្តមីកាអែល(ព្រះសីហនុ)។
ទីសក្ការដ្ឋានក្នុងភូមិភាគបាត់ដំបងមាន ព្រះវិហារព្រះជាម្ចាស់លើកព្រះនាងម៉ារីឡើងស្ថានបរមសុខ (ពេទ្យយាយជី) ព្រះវិហារសន្តីម៉ារី (តាអំ) ព្រះវិហារសន្តយ៉ាកុប(ពោធិសាត់) ព្រះវិហារសន្តីតេរេសា(ចំណោម) ព្រះវិហារសន្តអ៊ីញ៉ាស្យូ (ពាក់ស្នែង) និងសន្តីតេរេសានៅក្រុងអាវីឡា (កំពង់គោ)។
ទីសក្ការដ្ឋានក្នុងភូមិភាគកំពង់ចាមមាន ព្រះវិហារគ្រួសារដ៏វិសុទ្ធ(អ្នកលឿង) ព្រះវិហារសន្តយ៉ូហានបាទីស្ត (ប៊ូស្រា) ព្រះវិហារព្រះយេស៊ូជាព្រះមហាក្សត្រ(ក្រចេះ) និងព្រះវិហារសន្តយ៉ូសែប(ក្តុលលើ)។
ក្រោយការណែនាំរបស់លោកបូជាចារ្យ គ្រីស្តបរិស័ទទាំងអស់បានឆ្លងទ្វារដ៏វិសុទ្ធ និងអធិដ្ឋានតាមបំណងរបស់សម្តេចប៉ាប នៅមុខព្រះនាងម៉ារី ដោយសូត្រផ្គាំ រួចបន្តដំណើរទៅកាន់ព្រះវិហារ ដើម្បីទទួលអគ្គសញ្ញាលើកលែងទោស និងអគ្គសញ្ញាអរព្រះគុណ។ ព្រមទាំងបោះត្រានៅលើកូនសៀវភៅ ដែលបញ្ជាក់ថាបានទៅដល់ទីសក្ការដ្ឋាននៃឆ្នាំមហាករុណាទិគុណផងដែរ៕
សុខ កែវរតនា
Daily Program
