ព្រឹត្តិការណ៍ «បុណ្យរំលឹកគុណអង្គរ» លើកទី៤ ចាប់ផ្តើម

ពិធី«បុណ្យរំលឹកគុណអង្គរ» លើកទី៤ បានប្រកាសបើកជាផ្លូវការហើយ នៅព្រឹកថ្ងៃទី១៤ ខែធ្នូ ឆ្នាំ២០២៤នេះ នាបរិវេណខាងមុខប្រាសាទអង្គរវត្ត។​ពិធី បុណ្យនេះ មិនត្រឹមតែបង្ហាញពីមោទនភាពជាតិ អរិយធម៌ វប្បធម៌ និងប្រវត្តិសាស្ត្រប៉ុណ្ណោះទេ ថែមទាំងរួមចំណែកលើកកម្ពស់សក្ដានុពលវប្បធម៌ និងទេសចរណ៍របស់កម្ពុជា ដែលតាមរយៈនោះ ភ្ញៀវទេសចរអាចបន្តឃើញសក្ខីកម្មនៃសមិទ្ធិផលដ៏អស្ចារ្យរបស់អ្នកមានទេពកោសល្យខ្ពស់ ដូនតាខ្មែរ។

ពិធីបើកជាផ្លូវការ ក្រោមអធិបតីភាពលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត សម្តេចកិត្ដិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ នៃព្រះរាជាណាចក្រកម្ពុជា បណ្ឌិតសភាចារ្យ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា លោក ហង់ ពៅ អគ្គនាយក អគ្គនាយករងនៃអាជ្ញាធរជាតិអប្សរា រដ្ឋបាលខេត្តសៀមរាប តំណាងបណ្តាប្រទេសជាមិត្ត តំណាងមន្ទីរអង្គភាពពាក់ព័ន្ធជុំវិញខេត្ត ប្រជាពលរដ្ឋ រួមទាំងសិស្សានុសិស្សប្រមាណ២,០០០អង្គ/នាក់។

លោកស្រី ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលនៃអាជ្ញាធរជាតិអប្សរា បានថ្លែងអំណរគុណចំពោះរាជរដ្ឋាភិបាល ដែលតែងតែគិតគូរដល់ការអភិរក្សបេតិកភណ្ឌវប្បធម៌ជាតិជាអាទិភាពចម្បង តំណាងឱ្យព្រលឹង និងអត្តសញ្ញាណជាតិខ្មែរ។ ក៏ដូចជាការរួមចំណែកដល់សេដ្ឋកិច្ច នាំមកនូវកំណើនប្រកបដោយចីរភាពសម្រាប់ជាតិ និងប្រជាជនកម្ពុជា។

ពិធី«បុណ្យរំលឹកគុណអង្គរ» លើកទី៤នេះ បានរៀបចំពិធីបួងសួង រាប់បាត្រព្រះសង្ឈចំនួន១៣២អង្គ កម្មវិធីបែបសាសនាជាច្រើន ការតាំងពិព័រណ៍បង្ហាញសមិទ្ធផលនៃអាជ្ញាធរជាតិអប្សរា រួមជាមួយដៃគូអន្តរជាតិនានា ចាប់ពីថ្ងៃទី១៤ ដល់ថ្ងៃទី២១ ខែធ្នូ ឆ្នាំ២០២៤ ព្រឹត្តិការណ៍សម្តែងសិល្បៈរាត្រីចងចាំ និងកម្មវិធីអមជាច្រើនទៀត ដែលផ្តល់ឱកាសឱ្យសាធារណជនបានទស្សនា និងឈ្វែងយល់ដោយសេរី។

ប្រាសាទអង្គរវត្តត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្កូ ក្នុងកិច្ចប្រជុំលើកទី១៦ នៃគណៈកម្មាធិការបេតិកភណ្ឌពិភពលោក នៅថ្ងៃទី១៤ ខែធ្នូ ឆ្នាំ១៩៩២ នៅទីក្រុងសាន់តាហ្វេ សហរដ្ឋអាមេរិក។

ស្ថិត​នៅ​ភាគ​ពាយ័ព្យ​នៃ​ខេត្ត​សៀមរាប ឧទ្យាន​បុរាណ​វិទ្យា​អង្គរ​ជា​គោលដៅ​ទេសចរណ៍​ដ៏​ពេញ​និយម​បំផុត​ក្នុង​ព្រះរាជាណាចក្រ​កម្ពុជា។ លើផ្ទៃដី ៤០១ គីឡូម៉ែត្រការ៉េ អង្គរមានភាពដ៏អស្ចារ្យជាង រាជធានីផ្សេងៗគ្នានៃអាណាចក្រខ្មែរពីសតវត្សទី ៩ ដល់ទី ១៥ ហើយវាមានប្រាសាទសំខាន់ៗដូចជា អង្គរវត្ត បាយ័ន ចៅសាយទេវដា និងតាកែវ។ ផ្សេងទៀត។

ក្នុងរយៈពេលដប់មួយខែដំបូងនៃឆ្នាំនេះ ឧទ្យានបុរាណវិទ្យាអង្គរបានទាក់ទាញភ្ញៀវទេសចរបរទេសចំនួន ៨៩៨ ៣៣៩ នាក់ កើនឡើងជាង ២៨ ភាគរយពីមួយឆ្នាំទៅមួយឆ្នាំ រកចំណូលបាន ៤២ លានដុល្លារអាមេរិកពីការលក់សំបុត្រចូលទស្សនាកើនឡើងជាង២៨ ភាគរយបើធៀបនឹងរយៈពេលដូចគ្នាកាលពីឆ្នាំមុន៕