ប្រមុខរដ្ឋស្តីទី មិនមានការយោគយល់ឡើយចំពោះទីតាំងដែលប្រើប្រាស់សម្រាប់ប្រតិបត្តិការឆបោកតាមប្រព័ន្ធអនឡាញ
សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានបញ្ជាក់សារជាថ្មីថា នឹងមិនមានការអត់ឱនឡើយចំពោះទីតាំងណាមួយដែលត្រូវ បានប្រើប្រាស់សម្រាប់ប្រតិបត្តិការឆបោកតាមប្រព័ន្ធអនឡាញ ក៏ដូចជាបុគ្គលទាំងឡាយណាដែលពាក់ព័ន្ធនឹងសកម្មភាពឧក្រិដ្ឋទាំងនេះ។
នៅក្នុងឱកាសអញ្ជើញជួបសំណេះសំណាលជាមួយសមាជិកក្រុមប្រឹក្សាខេត្ត ក្រុង ស្រុក ឃុំ សង្កាត់ ព្រមទាំងប្រធានមន្ទីរ និងអង្គភាពមូលដ្ឋានក្នុងខេត្តកំពង់ធំ កាលពីព្រឹកថ្ងៃពុធនេះ សម្តេចតេជោបានសង្កត់ធ្ងន់ថា រាល់ទីតាំងទាំងអស់ដែលប្រើប្រាស់សម្រាប់សកម្មភាពបោកប្រាស់តាមប្រព័ន្ធអនឡាញ និងអ្នកដែលពាក់ព័ន្ធនឹងសកម្មភាពទាំងនោះ នឹងមិនត្រូវបានលើកលែងពីចំណាត់ការច្បាប់ឡើយ។
ការលើកឡើងបែបនេះត្រូវបានធ្វើឡើងក្នុងអំឡុងពេលបេសកកម្មចុះជួបសំណេះសំណាលលើកទី១១ របស់សម្តេច ដែលគ្របដណ្តប់លើ១២ខេត្ត និងរាជធានី រួមមាន ខេត្តកំពង់ចាម ត្បូងឃ្មុំ កំពង់ស្ពឺ តាកែវ កំពត កែប ស្វាយរៀង ព្រៃវែង ភ្នំពេញ កំពង់ឆ្នាំង ពោធិ៍សាត់ និងកំពង់ធំ។
គោលបំណងនៃការចុះជួបសំណេះសំណាលនេះ គឺដើម្បីពង្រឹងគណនេយ្យភាពរវាងព្រឹទ្ធសភា និងអង្គបោះឆ្នោត បង្កើនតម្លាភាព លើកកម្ពស់អភិបាលកិច្ចនៅមូលដ្ឋាន និងពង្រឹងទំនាក់ទំនងជាមួយអាជ្ញាធរមូលដ្ឋាន ព្រមទាំងរំលឹកដល់មន្ត្រីឱ្យយកចិត្តទុកដាក់លើការផ្តល់សេវាសាធារណៈ។
សម្តេចតេជោ ក៏បានកោតសរសើរដល់មន្ត្រីរាជការក្នុងខេត្តកំពង់ធំ ចំពោះកិច្ចខិតខំប្រឹងប្រែងក្នុងការផ្តល់សេវាសាធារណៈជូនប្រជាពលរដ្ឋក្នុងមូលដ្ឋាន និងបានកោតសរសើរដល់អភិបាលខេត្ត និងមេបញ្ជាការយោធា ចំពោះការងារពាក់ព័ន្ធនឹងអតីតយុទ្ធជន និងយុទ្ធជនចូលនិវត្តន៍ ជាពិសេសក្នុងការដោះស្រាយសុខុមាលភាព និងជីវភាពរស់នៅរបស់ពួកគេ។
សម្តេចបានសង្កត់ធ្ងន់ថា អតីតយុទ្ធជន និងទាហានចូលនិវត្តន៍ បានរួមចំណែកយ៉ាងសំខាន់ដល់ប្រទេសជាតិ ហើយមិនត្រូវបោះបង់ ឬមើលរំលងពួកគេឡើយ។
ជាងនេះទៅទៀត ប្រមុខរដ្ឋស្តីទីបានជម្រុញឱ្យអាជ្ញាធរបន្តការពារធនធានធម្មជាតិ ជាពិសេសនៅក្នុងតំបន់បឹងទន្លេសាប និងត្រូវមានវិធានការប្រឆាំងនឹងការទន្ទ្រានកាន់កាប់ព្រៃលិចទឹក ដោយអំពាវនាវឱ្យមានការខិតខំប្រឹងប្រែងរួមគ្នាដើម្បីអភិរក្សធនធានទាំងនេះសម្រាប់ជំនាន់ក្រោយ។
សម្តេចតេជោ ក៏បានរំលឹកដល់មន្ត្រីគ្រប់លំដាប់ថ្នាក់ ជាពិសេសក្រុមប្រឹក្សាឃុំ សង្កាត់ ឱ្យបន្តកែលម្អការផ្តល់សេវាសាធារណៈ ដោយធានាបាននូវការឆ្លើយតបទៅនឹងតម្រូវការរបស់ប្រជាពលរដ្ឋឱ្យបានលឿន និងមានប្រសិទ្ធភាពជាងមុន។
សម្តេចបានរំលឹកឡើងវិញនូវសារដែលសម្តេចតែងតែថ្លែងជាប្រចាំថា មន្ត្រីត្រូវ «រត់ទៅរកការងារ ជាជាងអង្គុយរង់ចាំការងារមករកខ្លួន» និង «រត់ទៅរកប្រជាពលរដ្ឋ ជាជាងអង្គុយរង់ចាំប្រជាពលរដ្ឋមករកខ្លួន»។
សម្តេចក៏បានអំពាវនាវឱ្យបន្តកិច្ចខិតខំប្រឹងប្រែងថែរក្សាស្ថិរភាពជាតិ និងសណ្តាប់ធ្នាប់សាធារណៈ តាមរយៈការអនុវត្ត «គោលនយោបាយភូមិ-ឃុំ-សង្កាត់មានសុវត្ថិភាព» រួមទាំងការបង្ក្រាបអំពើចោរកម្ម ការប្លន់ ការជួញដូរគ្រឿងញៀន និងបទល្មើសបច្ចេកវិទ្យា (Cybercrime)។
ទន្ទឹមនឹងនេះ សម្តេចបានដាស់តឿនមន្ត្រីឱ្យចៀសវាងភាពអសកម្ម ឬការរំលោភអំណាច ដោយសង្កត់ធ្ងន់ថា មន្ត្រីរាជការគឺជាអ្នកបម្រើរបស់ប្រជាពលរដ្ឋ មិនមែនជាចៅហ្វាយនាយរបស់ប្រជាពលរដ្ឋឡើយ។
យោងតាមរបាយការណ៍របស់ខេត្ត ខេត្តកំពង់ធំមានផ្ទៃដីសរុប ១៥,០៦១ គីឡូម៉ែត្រការ៉េ មានក្រុង១ ស្រុក៨ ឃុំ៧៣ សង្កាត់៨ និងភូមិ៧៦៥។ ខេត្តនេះមានទីតាំងស្ថិតនៅចំកណ្តាលនៃប្រទេសកម្ពុជា ហើយកំពុងស្ថិតក្នុងដំណើរការអភិវឌ្ឍន៍ក្នុងគោលបំណងកែប្រែផ្ទៃដីដ៏ធំល្វឹងល្វើយ និងធនធានធម្មជាតិរបស់ខ្លួន ឱ្យទៅជាមូលដ្ឋានសេដ្ឋកិច្ចដ៏រឹងមាំសម្រាប់ប្រជាជនជិតមួយលាននាក់។
Daily Program
