ប្រទេសអឺរ៉ុបជាច្រើន ចូលរួម បេសកកម្មយោធានៅហ្រ្គូអេនឡេន

កាលពីថ្ងៃពុធ ទី១៤ ខែមករា លោកអេម៉ានូអេល ម៉ាក្រុង ប្រធានាធិបតីបារាំង បានបញ្ជាក់ថា ៖ “យោធាបារាំងកំពុងស្ថិតលើផ្លូវធ្វើដំណើររួចហើយ” ដើម្បីចូលរួមនឹងបេសកកម្មយោធាអឺរ៉ុប ដែលរួម​មាន​អាឡឺម៉ង់ និងប្រទេសនៅអឺរ៉ុបខាងជើង ទៅកាន់កោះហ្គ្រូអេនឡេន ដែលជាកោះ​ស្ថិត​នៅ​​ក្រោម​អធិបតេយ្យភាពដាណឺម៉ាក​ដែលលោកដូណាល់ ត្រាំ ប្រធានាធិបតីអាម៉េរិក បង្ហាញ​ការ​ចង់បាន។

ប្រទេសបារាំង ស៊ុយអែត អាឡឺម៉ង់ និងណ័រវេស បានថ្លែងថា ពួកគេនឹងពង្រាយកម្លាំង​យោធា​នៅ​ក្នុង​ដែនដីទ្វីបអាកទិកនេះសម្រាប់បេសកកម្ម​នៃការតាមដាន នៅក្នុង​ក្របខណ្ឌ​​លំហាត់​​យោធារបស់ដាណឺម៉ាក ដែលមានឈ្មោះថា “Arctic Endurance” ភាពរឹងម៉ាំ​តំបន់​អាកទិក។

យោងតាមការស្នើសុំពីដាណឺម៉ាក ប្រធានាធិបតីបារាំងសម្រេចចិត្តថា បារាំងនឹងចូលរួម​សម្រាប់​​លំហាត់សមយុទ្ធយោធារួមគ្នា​ដែលរៀបចំឡើងដោយដាណឺម៉ាកនៅកោះ​ហ្គ្រូអេនឡេន ឬហៅថាប្រតិបត្តិការនៃ “​ភាពរឹងម៉ាំតំបន់អាកទិក”។

នៅលើបណ្តាញសង្គមអ៊ិក X ប្រធានាធិបតីបារាំង បានបញ្ជាក់ថា ៖ “កងកម្លាំងយោធាបារាំង​ដំបូងៗ កំពុងស្ថិតនៅលើផ្លូវរួចហើយ ហើយអ្នកផ្សេងទៀតកំពុងតាម​ពីក្រោយ។

យោធាបារាំង បានរៀបរាប់ថា ការពង្រាយយោធាបារាំងរួមមាន​យោធាដែល​មក​ពី​អង្គភាពនៃ​កងក​ម្លាំងប្រយុទ្ធ​តាមភ្នំសម្រាប់អាកាសធាតុ​ត្រជាក់ ប៉ុន្តែមិនបានបញ្ជាក់អំពីចំនួនទេ។

បើយោងតាមប្រភពជាច្រើនទាក់ទងនឹងសំណុំរឿង បានឲ្យដឹងថា ក្រុមប្រឹក្សាការពារជាតិ​បារាំង ដែលដឹកនាំដោយលោកអេម៉ានូអេល ម៉ាក្រុង បានប្រជុំគ្នាដោយមានរដ្ឋមន្រ្តីក្រសួង​ពាក់ព័ន្ធ ព្រមទាំងប្រមុខយោធាផង និងបានរៀបចំឡើងយ៉ាងបន្ទាន់​នៅថ្ងៃព្រហស្បតិ៍ទី១៤ ខែ​មករា នៅវិមានអេលីហ្ស៉េ។ ក្រុមប្រឹក្សានេះធ្វើការងារចំពោះមុខ​លើរឿងបាតុកម្មនៅ​ប្រទេស​​អ៊ីរ៉ង់ដែលត្រូវបានបង្រ្កាបដោយអាជ្ញាធរ និងការគំរាមកំហែង​ចូលកាន់កាប់កោះ​ហ្គ្រូអេន​ឡេនដោយលោកដូណាល់ ត្រាំ ប្រធានាធិបតីអាម៉េរិក។

ចំណែកក្រសួងការពារជាតិអាឡឺម៉ង់ បានពន្យល់ថា យើងមានគោលបំណងចូលរួមចំណែក​ខាង​យោធាដែលអាចកើតមានជាយថាហេតុ និងសំដៅគាំទ្រដល់ដាណឺម៉ាកនៅក្នុង​ការធានា​សន្តិសុខ​នៅក្នុងតំបន់ ជាឧទាហរណ៍​ នៅក្នុងវិស័យនៃសមត្ថភាពខាងការ​តាមដាន​ខាងផ្លូវ​សមុទ្រ។ ក្រសួងការពារជាតិអាឡឺម៉ង បានបញ្ជាក់ដែរថា ការធ្វើដំណើរទៅកាន់​ហ្គ្រូអេនឡេននេះ ធ្វើឡើង​ពីថ្ងៃព្រហស្បតិ៍ ទៅដល់ថ្ងៃសៅរ៍។

បន្ទាប់ពីមានជំនួបនៅសេតវិមានអាម៉េរិករវាងមេដឹកនាំ ដាណឺម៉ាក់ ហ្គ្រូអេនឡេន និងអាម៉េរិក ឧបនាយករដ្ឋមន្រ្តីហ្គ្រូអេនឡេន បានបញ្ជាក់ថា នៅពេលមុខប៉ុន្មានថ្ងៃ កងកម្លាំងណាតូ​បន្ថែម​ទៀត​​នឹងមានវត្តមាននៅកោះហ្គ្រូអេនឡេន​។ លោកមូតេ អេហ្សឺដេ ដោយលើកឡើងអំពីការ​ធ្វើ​សមយុទ្ធ បាននិយាយដែរថា ទាហានណាតូ នឹងត្រូវមានវត្តមានបន្ថែម​នៅកោះ​ហ្គ្រូអេនឡេន​​ពីថ្ងៃនេះ និងនៅប៉ុន្មានថ្ងៃខាងមុខ។ ចំនួន​កើន​ឡើងដ៏ច្រើននៃការហោះហើរ និង​ការ​ធ្វើនាវាចរណ៍ខាងយោធា​ ក៏ត្រូវរំពឹងថា មានឡើង​ផងដែរ។

ការពង្រាយកម្លាំងត្រូវបានប្រកាសឡើងបន្ទាប់ពីមានជំនួបកាលពីថ្ងៃពុធ នៅសេតវិមាន​អាម៉េរិក​រវាង​រដ្ឋមន្រ្តីក្រសួងការបរទេសដាណឺម៉ាក លោកឡា លូកកេ រ៉ាសមូសេន និង​មន្រ្តី​អាម៉េរិក។ រដ្ឋមន្រ្តីដាណឺម៉ាក បានថ្លែងថា វាច្បាស់ណាស់ថា ប្រធានាធិបតីអាម៉េរិក លោក​ដូណាល់ ត្រាំ នៅតែចិញ្ចឹមចិត្តប្រាថ្នាដណ្តើមយកកោះហ្គ្រូអេនឡេន។

ចំណែកលោកដូណាល់​ ត្រាំ បាននិយាយនៅពេលឆ្លើយតបសំណួរអ្នកកាសែតថា សហរដ្ឋ​អាម៉េរិក​ចង់បានកោះហ្គ្រូអេនឡេនគឺដើម្បីធានាសន្តិសុខពួកគេ ប៉ុន្តែនិយាយថា លោក​បាន​គិត​អំពី​ដំណោះស្រាយមួយទៀតដែលនឹងអាចស្វែងរកឃើញពាក់ព័ន្ធនឹងកោះយុទ្ធសាស្រ្តដ៏ធំ​សម្បើមនេះ។