មិនក្រោម ៤ប្រទេស សម្រាប់របៀបវារៈដំណើរទស្សនកិច្ចរបស់លោកហ្សេឡេនស្គី ពីពេលនេះរហូតដល់ថ្ងៃទី១២ ខែតុលា ឆ្នាំ២០២៤។ បន្ទាប់ពីប្រទេសក្រូអាទី ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី នឹងធ្វើដំណើរមួយជុំនៅអឺរ៉ុប ដែលនឹងឆ្លងកាត់ទីក្រុងប៉ារីស ទីក្រុងឡុង ទីក្រុងរ៉ូម និងទីក្រុងប៊ែរឡាំង។
ដំណើរទស្សនកិច្ចនេះធ្វើឡើងនៅខណៈដែលទាហានអ៊ុយក្រែន មានការលំបាកនៅសមរភូមិភាគខាងកើត ប្រឈមមុខនឹងទាហានរុស្ស៊ីដែលដណ្តើមយកដី។ នេះមិនដល់មួយខែផងសម្រាប់ការបោះឆ្នោតប្រធានាធិបតីអាម៉េរិកដែលស្ថិតនៅក្នុងភាពមិនច្បាស់លាស់ និងអាចធ្វើឲ្យខូចខាតដល់ការគាំទ្រដ៏មានសារៈសំខាន់របស់ទីក្រុងវ៉ាស៊ីនតុន ចំពោះទីក្រុង គៀវ។
លោកវ៉ូឡូឌីមៀ ហ្សេឡេនស្គី បានទៅដល់ទីក្រុងប៉ារីសកាលពីថ្ងៃព្រហស្បតិ៍ទី០៩ ខែតុលា ដើម្បីជួបលោកអេម៉ានូអែល ម៉ាក្រុង ប្រធានាធិបតីបារាំង បន្ទាប់មក បើតាមការប្រកាសរបស់បុរីវ៉ាទីកង់ លោកក៏ទៅទីក្រុងរ៉ូម ដែលជាកន្លែងដែលលោកក៏បានជួបសម្តេចប៉ាបផងដែរ។
ប្រមុខរដ្ឋអ៊ុយក្រែន បានប្រកាសចេញពីទីក្រុងឌូប្រូនីក ប្រទេសក្រូអាទី ដែលជាកន្លែងដែលលោកបានចូលរួមកិច្ចប្រជុំកំពូលអ៊ុយក្រែន និងអឺរ៉ុបភាគអាគ្នេយ៍។ បន្ទាប់មក លោកហ្សេឡេនស្គី ក៏នឹងជួបនាយករដ្ឋមន្រ្តីអង់គ្លេស ខេ ស្តាកមើ នៅចក្រភពអង់គ្លេស និងនាយករដ្ឋមន្រ្តីអ៊ីតាលី ហ្ស៉ហ្សៀ ម៉េឡូនី នៅប្រទេសអ៊ីតាលី។
យោងតាមអ្នកនាំពាក្យរដ្ឋាភិបាលអង់គ្លេស បានឲ្យដឹងថា ប្រធានាធិបតីអ៊ុយក្រែន ក៏នឹងជួបនៅ Downing Street នៅរាជធានីអង់គ្លេស នូវប្រមុខថ្មីរបស់អង្គការណាតូ គឺលោកម៉ាក រូតតេ ដើម្បីពិភាក្សាអំពីការគាំទ្ររបស់លោកខាងលិចចំពោះទីក្រុងគៀវ។
លោកវ៉ូឡូឌីមៀ ហ្សេឡេនស្គី នឹងទៅអាឡឺម៉ង នៅថ្ងៃសុក្រ ដែលជាកន្លែងដែលលោកនឹងត្រូវចូលរួមកិច្ចប្រជុំការការពារជាតិអ៊ុយក្រែន។ លោកវ៉ូឡូឌីមៀ ហ្សេឡេនស្គីនឹងត្រូវទទួលជួបនៅទីក្រុងប៊ែលឡាំង ដោយអធិការបតីអាឡឺម៉ង់ លោកអូឡាហ្វ សូល។
នៅឌូប្រូនិក ប្រធានាធិបតីអ៊ុយក្រែន បានទាញចំណេញពីកិច្ចប្រជុំកំពូល ដើម្បីនិយាយការពារនៅចំពោះមុខការចូលរួមរបស់អឺរ៉ុប ពីគ្រប់ប្រជាជាតិប្រជាធិបតេយ្យអឺរ៉ុប ដោយមានវត្តមានពីប្រមុខរដ្ឋ រដ្ឋាភិបាល និងអ្នកការទូត ១៣ប្រទេស។ លោកហ្សេឡេនស្គី និយាយសង្កត់ថា គ្មាននរណាម្នាក់ចាំបាច់រំឭកថា តើស្ថិរភាពមានសារសំខាន់ប៉ុណ្ណា សម្រាប់ប្រទេសនៅតំបន់បាល់កង់នោះ? លោកវ៉ូឡូឌីមៀ ហ្សេឡេនស្គី បានថ្លែងថា ៖ “ប្រសិនបើអឺរ៉ុបមិនរួបរួមគ្នានៅថ្ងៃនេះ ទ្វីបនេះ នឹងមិនមានសន្តិភាពទេ។ ដូច្នេះ គេត្រូវដំណើរការបញ្ចូលអ៊ុយក្រែនជាសមាជិក។ លោកនិយាយការពារថា នេះមិនគ្រាន់តែដើម្បីបុព្វហេតុរបស់ទីក្រុងគៀវ ប៉ុន្តែវាក៏ជាបុព្វហេតុនៃប្រទេសជាច្រើននៃតំបន់បាល់កង់ ដែលរង់ចាំចូលជាសមាជិកអឺរ៉ុបជាច្រើនឆ្នាំមកហើយ។ ទីក្រុងគៀវបានចាប់ផ្តើមដំណើរការចរចាចូលជាសមាជិកអឺរ៉ុបតាំងពីខែមិថុនា។
លោកក៏បានលើកមកនិយាយជាច្រើនដង នូវផែនការដែលរៀបចំដោយអ៊ុយក្រែនដើម្បីបញ្ចប់ការលុកលុយរបស់រុស្ស៊ី។ ប្រធានាធិបតីអ៊ុយក្រែន បានបញ្ជាក់ថា ៖ “ផែនការនេះនឹងត្រូវត្រៀមស្រេច និងកំណត់ជាលំអិតនូវលក្ខខណ្ឌដើម្បីបញ្ចប់សង្រ្គាម។”
លោកវ៉ូឡូឌីមៀ ហ្សេឡេនស្គី ចោទសួរថា តើធ្វើដូចម្តេចដើម្បីបង្ខំរុស្ស៊ីឲ្យស្វែងរកសន្តិភាព? តើធ្វើដូចម្តេចបង្ខំឲ្យអ្នកបង្កសង្រ្គាមឲ្យដើរតាមផែនការសន្តិភាព? បន្ទាប់មក លោកវ៉ូឡូឌីមៀ ហ្សេឡេនស្គី បានឆ្លើយខ្លួនឯងថា ៖ “យើងបានរៀបចំផែនការសកម្មភាពដែលអាចលុបបំបាត់ភាពខុសគ្នារវាងស្ថានភាពសព្វថ្ងៃ និងធ្វើកិច្ចប្រជុំកំពូលសន្តិភាពឲ្យបានជោគជ័យ។ ប្រទេសរុស្ស៊ីនឹងបាត់បង់សមត្ថភាពរបស់ខ្លួន ដើម្បីគំរាមកំហែងយើង និងគំរាមកំហែងអឺរ៉ុប។
Daily Program
