បើតាមលោកខាមឺនៃ មេដឹកនាំកំពូលអ៊ីរ៉ង់ ការប្រមូលផ្តុំអ្នកគាំទ្ររបបគឺជាការព្រមានសម្រាប់សហរដ្ឋអាម៉េរិក
មេដឹកនាំកំពូលរបស់អ៊ីរ៉ង់ លោកអាយ៉ាតូឡា អាលី ខាមឺនៃ កាលពីថ្ងៃចន្ទ ទី១២ ខែមករា ឆ្នាំ២០២៦ បានហៅថា វាជាការព្រមានចំពោះសហរដ្ឋអាម៉េរិក ដោយមានការប្រមូលផ្តុំដ៏ខ្លាំងក្លារបស់អ្នកគាំទ្ររដ្ឋអំណាច ដែលបានចុះតាមដងផ្លូវយ៉ាងសន្ធឹកសន្ធាប់ និងជាការឆ្លើយតបនឹងរលកតវ៉ាដ៏ធំធេង ដែលបានអង្រួនប្រទេសអ៊ីរ៉ង់ ជាង ២ សប្តាហ៍មកហើយ។ រីឯសេតវិមានអាម៉េរិក បានបញ្ជាក់ថា លោកដូណាល់ ត្រាំ ប្រធានាធិបតីអាម៉េរិក បានសន្យានឹងធ្វើការវាយប្រហារតាមផ្លូវអាកាសលើអ៊ីរ៉ង់ និងបន្ថែមថា ផ្លូវការទូតនៅតែបើកចំហជានិច្ច។
នៅលើកញ្ចក់ទូរទស្សន៍រដ្ឋ លោកអាយ៉ាតូឡា អាលី ខាមឺនៃ បានថ្លែងថា ៖ “នេះគឺជាការព្រមានសម្រាប់អ្នកនយោបាយអាម៉េរិក ដែលពួកគេមិនបញ្ឈប់នូវប្រតិបត្តិការបោកបញ្ឆោត”។ រីឯប្រធានាធិបតីអាម៉េរិក លោកដូណាល់ ត្រាំ បានគំរាមជាច្រើនដងដើម្បីធ្វើអន្តរាគមន៍យោធាលើអ៊ីរ៉ង់។
លោកប្រធានាធិបតីអាម៉េរិក ក៏បានថ្លែងកាលពីថ្ងៃចន្ទ នៅលើបណ្តាញសង្គម ទ្រូសសូស្យល់ (Truth Social) ថា រាល់ប្រទេសដែលធ្វើពាណិជ្ចកម្មជាមួយអ៊ីរ៉ង់ នឹងត្រូវទទួលការវាយប្រហារដោយច្បាប់ពន្ធគយ ២៥% បន្ថែមទៀតដោយសហរដ្ឋអាម៉េរិក។ ប្រធានាធិបតីអាម៉េរិក បានបញ្ជាក់ថា ៖ “សេចក្តីសម្រេចចិត្តនេះគឺដាច់ខាត និងមានប្រសិទ្ធភាពភ្លាមៗ”។
សេតវិមានអាម៉េរិក បញ្ជាក់ថា លោកដូណាល់ ត្រាំ ក៏បានសន្យាធ្វើការវាយប្រហារតាមផ្លូវអាកាសលើអ៊ីរ៉ង់ដើម្បីបញ្ចប់ការបង្រ្កាបក្រុមបាតុករ ដែលបានធ្វើឲ្យរញ្ជួយដល់សាធារណរដ្ឋឥស្លាមចាប់តាំងពីថ្ងៃទី២៨ ខែធ្នូ ប៉ុន្តែក៏បន្ថែមថា ផ្លូវការទូតនៅតែបើកចំហរជានិច្ច។ លោកស្រី ការ៉ូលីន លីវីត អ្នកនាំពាក្យសេតវិមាន បានបញ្ជាក់ថា ថា ៖ “រឿងមួយដែលលោកប្រធានាធិបតីត្រាំ មានជំនាញបំផុត គឺរក្សាទុកឲ្យមានគ្រប់ជម្រើសនៅលើតុ។ ហើយការវាយប្រហារផ្លូវអាកាសគឺជាជាជម្រើសមួយក្នុងចំណោមជម្រើសជាច្រើនដែលផ្តល់ឲ្យសម្រាប់មេបញ្ជការកងទ័ព”។ ក៏ប៉ុន្តែ លោកស្រី បានអះអាងថា ការទូតគឺនៅតែស្ថិតនៅជាជម្រើសទី១សម្រាប់លោកប្រធានាធិបតី”។ បើតាមរូបលោកស្រី ផ្លូវការទូតនៅតែស្ថិតនៅបើកចំហរជានិច្ចសម្រាប់អ៊ីរ៉ង់ ហើយអ្នកកាន់អំណាចអ៊ីរ៉ង់បានប្រកាន់យកនូវវាចារខុសគ្នាយ៉ាងខ្លាំងក្នុងអំឡុងកិច្ចពិភាក្សាឯកជនជាមួយបេសកជនពិសេសរបស់អាម៉េរិក លោកស្តេវ វីតកូហ្វ។
ចំណែកលោកអគ្គលេខាក្រុមប្រឹក្សាសន្តិសុខរុស្ស៊ី លោកសឺហ្គេ ឆ័រហ្គូ នៅអំឡុងការហៅទូរសព្ទជាមួយសមភាគីអ៊ីរ៉ង់ បានបរិហារអំពីការប៉ុនប៉ង់ជ្រៀតជ្រែកពីខាងក្រៅ នៅអំឡុងមានចលនាតវ៉ាទ្រង់ទ្រាយធំដែលអង្រួនប្រទេសអ៊ីរ៉ង់។ ទីភ្នាក់ងារសារព័ត៌មានរុស្ស៊ី បានរៀបរាប់ថា នៅអំឡុងកិច្ចសន្ទនាជាមួយ លោកអាលី ឡារីចានី ដែលជាអគ្គលេខានៃក្រុមប្រឹក្សាជាន់ខ្ពស់សន្តិសុខជាតិអ៊ីរ៉ង់ លោកសឺហ្គេ ឆ័រហ្គូ បានថ្កោលយ៉ាងម៉ឺងម៉ាត់នូវការប៉ុនប៉ង់ថ្មីពីការជ្រៀតជ្រែកនៃកងកម្លាំងខាងក្រៅនៅក្នុងកិច្ចការផ្ទៃក្នុងរបស់អ៊ីរ៉ង់។
ចំណែកអង្គការសិទ្ធមនុស្សអ៊ីរ៉ង់ ដែលមានមូលដ្ឋាននៅប្រទេសណ័រវេស បានប្រាប់ឲ្យដឹង នៅក្នុងប្រទេសអ៊ីរ៉ង់ យ៉ាងហោចណាស់ មានបាតុករ ៦៤៨នាក់ បានស្លាប់ ចាប់តាំងពីថ្ងៃទី២៨ ខែធ្នូ ជាថ្ងៃចាប់ផ្តើមនៃចលនាតវ៉ាប្រឆាំងនឹងរដ្ឋអំណាចអ៊ីរ៉ង់។
អង្គការនេះ ក៏បញ្ជាក់ថានៅក្នុងចំណោមមនុស្សដែលបានស្លាប់ ក៏មានអនីតិជន ៩នាក់ ហើយមានមនុស្សរាប់ពាន់នាក់ បានរងរបួស។ យោងតាមការវាយតម្លៃខ្លះ ដែលអង្គការមិនបានផ្ទៀងផ្ទាត់នៅឡើយ បានបង្ហាញថា តុល្យការនៃអ្នករងផលប៉ះពាល់ គឺឡើងខ្ពស់ខ្លាំង គឺអាចរហូតទៅដល់ ៦០០០នាក់ ឯណោះ។
Daily Program
