បុរីវ៉ាទីកង់នឹងទទួលរៀបចំកិច្ចប្រជុំពិភពលោកស្តីពីសិទ្ធិកុមារ

វ៉ាទីកង់ញូវបានរាយការណ៍ថា បុរីវ៉ាទីកង់នឹងរៀបចំធ្វើជាម្ចាស់ផ្ទះនៃកិច្ចប្រជុំជាមួយក្រុមអ្នកតស៊ូមតិដើម្បីសិទ្ធិកុមារ រួមទាំងព្រះមហាក្សត្រិយានីនៃប្រទេសហ្ស៊កដានី និងអតីតអនុប្រធានាធិបតីសហរដ្ឋអាមេរិក លោក អាល់ ហ្គ័រ (Al Gore) នៅថ្ងៃទី ៣ ខែកុម្ភៈ ឆ្នាំ២០២៥ខាងមុខ ។

ពាក់ព័ន្ធនឹងព្រឹត្តិការណ៍នេះ សម្តេចប៉ាប ហ្វ្រង់ស៊ីស្កូ បានប្រកាសថា ទ្រង់នឹងលះបង់ពេលវេលាមួយថ្ងៃដើម្បីជួយ និង ការពារកុមាររាប់លាននាក់ ដែលពួកគេកំពុងនៅតែរស់នៅដោយគ្មានសិទ្ធិ ឫរស់នៅក្នុងស្ថានភាពមិនច្បាស់លាស់ ដែលត្រូវបានកេងប្រវ័ញ្ច និងរំលោភបំពាន និងទទួលរងនូវផលវិបាកយ៉ាងធ្ងន់ធ្ងរនៃសង្រ្គាម។

ថ្លែងនៅក្នុងសន្និសីទសារព័ត៌មានពាក់ព័ន្ធនឹងព្រឹត្តិការណ៍នេះ​ លោក ម៉ាកូ អ៊ីមផេហ្គ្លីយ៉ាហ្សូ (Marco Impagliazzo )ប្រធានសហគមន៍ សន្តអេជីឌីអូ ( Sant'Egidio) បានហៅកិច្ចប្រជុំនេះថាជា "ព្រឹត្តិការណ៍នៃក្តីសង្ឃឹម"។

លោកបាននិយាយថា "កុមារច្រើនពេកហើយដែលបានស្លាប់ដោយសារសង្គ្រាម អំពើហិង្សា ការកេងប្រវ័ញ្ចផ្លូវភេទ និងការកេងប្រវ័ញ្ចកម្លាំងពលកម្ម"។

តាមការគ្រោងទុក កម្មវិធីនេះនឹងរៀបចំដោយមានវេទិកាផ្សេងៗបូករួមជាមួយនឹងប្រធានបទជាច្រើនតែផ្តោតជាពិសេស លើសិទ្ធិរបស់កុមារ រួមទាំងសិទ្ធិទទួលបានការអប់រំ សិទ្ធិក្នុងគ្រួសារ ការការពារពីអំពើហិង្សា និងការទទួលបានធនធាន។

មកដល់ពេលនេះ គេប៉ាន់ប្រមាណថា មានកុមារ ៦៤ លាននាក់ មិនអាចចូលរៀនបានទេ។ កុមារ ម្នាក់ ក្នុងចំណោម ៣ នាក់ដែលមានអាយុក្រោម ៥ ឆ្នាំប្រឈមមុខនឹងភាពក្រីក្រខ្លាំង ហើយខ្វះអាហារ ។