បុណ្យរំលឹកគុណអង្គរ លើកទី៤ នឹងចាប់ផ្ដើមធ្វើឡើងនៅថ្ងៃទី១៤ ដល់ថ្ងៃទី១៦ ខែធ្នូ

​បុណ្យរំលឹកគុណអង្គរដែលជា​មហាព្រឹត្តិការណ៍វប្បធម៌​ប្រចាំឆ្នាំ​ នឹងរៀបចំធ្វើឡើងជាលើកទី៤ នៅថ្ងៃទី១៤ ដល់ថ្ងៃទី១៦ ខែធ្នូ ឆ្នាំ២០២៤ខាងមុខនេះ។ ពិធីបុណ្យនេះ ធ្វើឡើងដើម្បីរំលឹកគុណដល់បុព្វការីជន គុណូបការៈដ៏ឧត្តុង្គឧត្តមរបស់បុព្វបុរសខ្មែរគ្រប់ជំនាន់។

ពិធីបុណ្យរំលឹកគុណអង្គរនេះ ក៏ជាការចូលរួម​លើកកម្ពស់​កិត្យានុភាពវប្បធម៌​ ប្រពៃណី និង​ទំនៀមទំលាប់ដ៏ផូផង់របស់ប្រជាជន​ខ្មែរ​ផងដែរ។

អាជ្ញាធរជាតិអប្សរា បាន​លើកឡើងថា ៖ «ព្រឹត្តិកការណ៍នេះ​នឹងចាប់​ផ្តើមធ្វើឡើង​ពីថ្ងៃទី​១៤ ដល់ថ្ងៃទី​១៦ ខែធ្នូ ឆ្នាំ២០២៤ ដែល​ក្នុងនោះ​មានកម្មវិធី​សាសនា ការដង្ហែព្រះពុទ្ធរូបពីប្រាសាទអង្គរវត្តទៅកាន់​ប្រាសាទបាយ័ន និង​មានការសម្តែង​សិល្បៈ ព្រមទាំងទស្សនីយភាពជាច្រើនទៀត»។

សូមរម្លឹកដែរថា ពិធីរំលឹកគុណអង្គរលើកទី៣​ បាន​រៀបចំឡើងរយៈពេល១០ថ្ងៃ ​ពីថ្ងៃទី០៧ ដល់ទី១៦ ខែធ្នូ ឆ្នាំ២០២៣ ក្រោមអធិបតីភាពលោកស្រី​ ពេជ ចន្ទមុន្នី ហ៊ុន ម៉ាណែត, លោកស្រី ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ និងជាប្រធានក្រុមប្រឹក្សាភិបាលអាជ្ញាធរជាតិអប្សរា, ថ្នាក់ដឹកនាំខេត្តសៀមរាប ថ្នាក់ដឹកនាំអាជ្ញាធរជាតិអប្សរា តំណាងអង្គការដៃគូរ មន្រ្តីរាជការគ្រប់លំដាប់ថ្នាក់ និងភ្ញៀវទេសចរជាតិនិងភ្ញៀវអន្តរជាតិជាច្រើននាក់​៕