បុណ្យចម្លងកំពុងតែរៀបចំនៅដែនដីពិសិដ្ឋទាំងក្នុងពេលដ៏លំបាកបំផុត

វ៉ាទីកង់ញូវបានរាយការណ៍ថា គ្រីស្តបរិស័ទនៅដែនដីពិសិដ្ឋទោះបីជាពួកគេកំពុងតែតស៊ូនិងជីវភាព និង ស្ថានភាពជីវិតកាន់តែលំបាកយ៉ាងណាក៏ដោយក៏ពួកគេនៅតែបន្តខិតខំប្រឹងប្រែងរស់ ហើយរៀបចំបុណ្យចម្លងដ៏រស់រវើក។

ប្រភពដដែលបានឲ្យដឹងថា គ្រីស្តបរិស័ទទាំងនេះបានអះអាងថា ពួកគេបានកំពុងតែទទួលរងនូវទុក្ខលំបាកជាច្រើន ប៉ុន្តែពួកគេនៅតែមានក្តីសង្ឃឹម ហើយនាំគ្នារៀបចំបុណ្យចម្លងដោយរស់រវើកក្រោមដំណក់ទឹកភ្នែកនៃការឈឺចាប់ ការខកចិត្ត និងក្តីសង្ឃឹមសម្រាប់សន្តិភាពជាមួយការពិភាក្សាអំពីបទឈប់បាញ់ថ្មីដែលកំពុងតែមានភាពស្រពេចស្រពិល។​

យោងតាមសេចក្តីថ្លែងការណ៍ដែលចេញផ្សាយដោយស្ថានទូតអ៊ីស្រាអែលនៅសន្តអាសនៈ ដោយដកស្រង់ទិន្នន័យផ្លូវការពីក្រសួងការបរទេសអ៊ីស្រាអែល និងអាជ្ញាធរមានសមត្ថកិច្ច បានអះអាងថា នៅឆ្នាំនេះមានគ្រីស្តបរិស័ទសរុប ៩.៧៧០ នាក់ដែលរស់នៅតំបន់វេសបែង​ត្រូវបាន​អនុញ្ញាតឱ្យចូលក្រុងយេរូសាឡឹមក្នុងអំឡុងសប្តាហ៍ពិសិដ្ឋ លើចំនួនសរុបជាង ជាង ៥ ម៉ឺននាក់ ដើម្បីប្រារព្ធ​ពិធី​បុណ្យ​ចម្លង។​

នៅពេលនេះ គ្រីស្តបរិស័ទម្នាក់បាន​និយាយ​ថា​ មនុស្ស​ម្នា​មិន​អាច​ស៊ាំ​នឹង​អំពើ​ហិង្សាបានទេ ខណៈ​ដែល​មាន​​ទីសក្ការៈ​​ស្រស់ស្អាត​នៅ​ចំពោះ​មុខ​ពួកគេ​នោះ​ទេ​​៕