បុគ្គលិកអង្គការមនុស្សធម៌៧នាក់ស្លាប់នៅហ្គាហ្សា

យោងតាមសេចក្តីថ្លែងការណ៍មួយរបស់មជ្ឈមណ្ឌលផ្ទះបាយពិភពលោក( World Central Kitchen) ដែលជាអង្គការជំនួយដែលមានមូលដ្ឋាននៅសហរដ្ឋអាមេរិកបានឲ្យដឹងថា សមា​ជិកចំនួន ៧នាក់ របស់ខ្លួន ត្រូវបានសម្លាប់នៅក្នុង «ការវាយប្រហារតាមគោលដៅ» ដោយយោ​ធាអ៊ីស្រាអែល។

ជាងនេះទៅទៀត អង្គការសប្បុរសធម៌នេះបាននិយាយថា ខ្លួនកំពុងផ្អាកប្រតិបត្តិការរបស់ខ្លួននៅហ្គាហ្សា។ បុគ្គលិកទាំង​៧​នាក់​នោះ​មក​ពី​អូស្ត្រាលី អង់គ្លេស ប៉ូឡូញ អាមេរិក​-កាណាដា និង​ប៉ាឡេស្ទីន។

ពាក់ព័ន្ធនឹងហេតុការណ៍នេះនាយករដ្ឋមន្ត្រីអ៊ីស្រាអែល លោក បេនយ៉ាមីន ណាតាន់យ៉ាហ៊ូ (Benjamin Netanyahu ) បានសារភាពថា ការវាយប្រហាររបស់អ៊ីស្រាអែលជាសកម្មភាព «អចេតនា» ដោយបន្ថែមថា «យើងនឹងធ្វើអ្វីគ្រប់យ៉ាងដើម្បីកុំឱ្យរឿងនេះកើតឡើងម្តងទៀត»។

ប្រធាន​គណៈកម្មការ​អឺរ៉ុប​លោកស្រី  យូស៊ូឡា វិន ដ័ ឡេយេន (Ursula von der Leyen) បាន​គោរព​វិញ្ញាណក្ខន្ធ​ដល់​បុគ្គលិក​ជំនួយ​ដែល​បាន​បាត់បង់​ជីវិត និង​បាន​ផ្ញើ «​ការ​ចូលរួម​រំលែក​ទុក្ខ​យ៉ាង​ក្រៀមក្រំ​បំផុត​ដល់​គ្រួសារ និង​មិត្តភក្តិ​របស់​ពួកគេ​»​។

ជាមួយគ្នានេះ នាយករដ្ឋមន្ត្រីអង់គ្លេស លោក រីស៊ី ស៊ូណាក ( Rishi Sunak )បាននិយាយថា លោក «តក់ស្លុត និងសោកសៅ» ដោយបន្ថែមថា «ច្បាស់ណាស់ មានសំណួរដែលត្រូវឆ្លើយ»។

ក្រុមបុគ្គលិកមនុស្សធម៌ទាំង៧នាក់នេះ គឺកំពុងតែស្ថិតនៅក្នុងក្បួនដឹកជញ្ជូនជំនួយមនុស្សធម៌ ដែលដឹកចេញពីកោះស៊ីបមកកាន់ហ្គាហ្សាតាមសមុទ្រ៕