សង្រ្គាមនៅហ្គាហ្សាត្រូវបានគេរំពឹងថានឹងគ្របដណ្តប់សម័យប្រជុំអង្គការសហប្រជាជាតិនៅសប្តាហ៍នេះ នៅពេលដែលកងកម្លាំងអ៊ីស្រាអែលកំពុងបន្ត យុទ្ធនាការរបស់ពួកគេដើម្បីកាន់កាប់តំបន់ហ្គាហ្សា។ នេះបើតាមសេចក្តីរាយការណ៍របស់វ៉ាទីកង់ញូវ។
ពាក់ព័ន្ធនឹងបញ្ហានេះប្រធានាធិបតីបារាំងលោក លោកអេម៉ានូអែល ម៉ាក្រុង បាននិយាយកាលពីថ្ងៃចន្ទថា ប្រទេសបារាំងនឹងទទួលស្គាល់ជាផ្លូវការនូវរដ្ឋប៉ាឡេស្ទីន ដោយចូលរួមជាមួយចក្រភពអង់គ្លេស កាណាដា អូស្ត្រាលី និងព័រទុយហ្គាល់។
លោក ម៉ាក្រុង ក៏បានអំពាវនាវឱ្យមានការដោះលែងចំណាប់ខ្មាំងអ៊ីស្រាអែលដែលត្រូវបានចាប់ពង្រត់ដោយក្រុមហាម៉ាស់ ដោយលើកឡើងថា «គ្មានហេតុផលអ្វីត្រូវបន្តសង្គ្រាមទៀតនោះទេ»។
អគ្គលេខាធិការអង្គការសហប្រជាជាតិលោក អេនតូនីញ៉ូ ហ្គោតេរ៉េស (Antonio Guterres) បានព្រមានអ៊ីស្រាអែល ហើយប្រឆាំងនឹងការបញ្ចូលតំបន់ វេសបែង ទៅក្នុងការគ្រប់គ្រងរបស់ពួកគេ ហើយបានជំរុញឱ្យបញ្ឈប់ទង្វើនេះ។
លោកប្រធានាធិបតីសហរដ្ឋអាមេរិក ដូណាល់ ត្រាំ បានជួបប្រជុំនៅថ្ងៃអង្គារជាមួយមន្ត្រីមកពីប្រទេសអារ៉ាប៊ីសាអូឌីត អារ៉ាប់រួម កាតា អេហ្ស៊ីប ហ្ស៊កដានី តួកគី ឥណ្ឌូនេស៊ី និងប៉ាគីស្ថាន ដើម្បីពិភាក្សាអំពីតំបន់ហ្គាហ្សា។
រដ្ឋបាល លោក ត្រាំ បានសម្តែងការប្រឆាំងយ៉ាងខ្លាំងចំពោះភាពជារដ្ឋរបស់ប៉ាឡេស្ទីន៕
Daily Program
