បន្ទាប់ពីឡើងកាន់អំណាចរបស់លោកបាប៊ិស ផែនការរបស់ប្រទេសឆែកដើម្បីបំពាក់អាវុធដល់ទីក្រុងគៀវលែងមានស្ថិរភាព
គំនិតផ្តួចផ្តើមដែលដឹកនាំដោយសាធារណរដ្ឋឆែក ដែលអនុញ្ញាតឲ្យផ្គត់ផ្គង់អាវុធគ្រាប់រំសេវ សម្រាប់អ៊ុយក្រែន និងគាំទ្រដល់ការការពារខ្លួនរបស់ប្រទេសនេះប្រឆាំងនឹងរុស្ស៊ី លែងមាន ស្ថិរភាព។ យោងតាមសារព័ត៌មាន ហ្វាននេនស្យល់ ថែមស៍ (Financial Times) បានឲ្យដឹងថា ប្រធានាធិបតីឆែក លោកប៉េត្រ៍ ប៉ាវែល បាននិយាយថា ពាក់កណ្តាលនៃប្រទេសដែលជួយផ្គត់ផ្គង់អាវុធដល់អ៊ុយក្រែនបានចាកចេញពីសម្ព័ន្ធភាព។ មានតែ ៩ប្រទេស ដែលបាន ចូលរួមចំណែកជានិច្ចកាល ទល់នឹង ១៨ ប្រទេសកាលពីឆ្នាំមុន។ ដោយត្រូវបានបង្កើតឡើង នៅឆ្នាំ២០២៤ ដោយអតីតរដ្ឋាភិបាលឆែក និងជាប្រធានាធិបតីនិយមអឺរ៉ុបសព្វថ្ងៃ ក្រុម សម្ព័ន្ធភាពបានអនុញ្ញាតឲ្យក្រុមហ៊ុនឆែកនានាទិញគ្រាប់ទូទាំងពិភពលោក តាមរយៈការផ្តល់ ហិរញ្ញប្បទានពីប្រទេសអឺរ៉ុបដែលស្ម័គ្រចិត្ត។
ប៉ុន្តែនាយករដ្ឋមន្រ្តីឆែកថ្មី លោកអន់ដ្រេ បាប៊ីស នៅពេលឡើងកាន់អំណាច កាលពីខែ ធ្នូ ឆ្នាំមុន បានឃ្លាតឆ្ងាយពីការគាំទ្រទីក្រុងគៀវ។ លោកអន់ដ្រេ បាប៊ីស បានបង្ហាញនូវការរិះគន់ដល់គំនិតផ្តួចផ្តើមទាំងនេះ និងបានបរិហារនៅអំឡុងពេលឃោសនាបោះឆ្នោតរបស់លោក អំពីកង្វះតម្លាភាពលើការប្រើប្រាស់មូលនិធិ និងរហូតដល់គំរាមបោះបង់ចោលការចូលរួមផងដែរ។
នាយករដ្ឋមន្រ្តីថ្មី ក៏បានសន្យាមិនឲ្យពលរដ្ឋរបស់ខ្លួនបង់ថ្លៃសម្រាប់អាវុធអ៊ុយក្រែន និងផ្តល់បុព្វសិទ្ធសម្រាប់ជំនួយសាធារណៈដល់ជនជាតិឆែក ដែលកំពុងប្រឈមមុខនឹងការចំណាយថ្លៃថាមពលខ្ពស់ដោយសារហេតុផលនៃសង្រ្គាមនៅអ៊ីរ៉ង់។
មន្រ្តីយោធាម្នាក់បានពន្យល់ប្រាប់ទៅកាន់ ហ្វាយនេនស្យល់ ថែមស៍ថា កង្វះការតាំងចិត្តនៃទីក្រុងប្រាហ្គចំពោះអ៊ុយក្រែន បានធ្វើឲ្យប្រទេសចូលរួមជួយខ្លះទៀតមិនសូវអើពើដែរ។ ពីពេលនេះទៅ ប្រទេសខ្លះបានសន្និដ្ឋានថា វាមានការចម្លែកដែលបង់ថ្លៃប្រាក់សម្រាប់អ្វីមួយ ដែលមិនទាន់មានការគាំទ្រពិតប្រាកដពីមេដឹកនាំនយោបាយនៃប្រទេសដែលកំពុងដឹកនាំ។ ប្រធានាធិបតីឆែក លោកពេត្រ៍ ប៉ាវែល មិនបានបញ្ជាក់អំពីប្រទេសដែលបានចាកចេញពីកម្មវិធីជួយអ៊ុយក្រែននោះទេ ប៉ុន្តែប្រភពខាងយោធាបានបញ្ជាក់ថា ប្រទេសអាឡឺម៉ង់ និងប្រទេសខ្លះនៅភាគខាងជើងនៅតែចូលរួមជួយអីចឹង។
លោកពេត្រ៍ ប៉ាវែល រំឭកថា ក្រុមសម្ព័ន្ធមិត្តអឺរ៉ុបដឹងអំពីគំនិតផ្តួចផ្តើមសម្រាប់គ្រាប់រំសេវដែលមានសារសំខាន់សម្រាប់អ៊ុយក្រែន ដែលវាអនុញ្ញាតឲ្យផ្គត់ផ្គង់រហូតដល់ ៥០% នៃរាល់គ្រាប់កាំភ្លើងធំដល់អ៊ុយក្រែន។ ក្នុងរយៈពេល ២ឆ្នាំ គ្រាប់កាំភ្លើងធំជាង ៤លានគ្រាប់ ត្រូវបានផ្គត់ផ្គង់ដល់ទីក្រុងគៀវ ដែលបានកាត់បន្ថយនូវគម្លាតដ៏ឆ្ងាយពីប្រព័ន្ធកាំភ្លើងធំរុស្ស៊ី។
ក្រសួងការពារជាតិឆែក បញ្ជាក់ថា មកដល់ថ្ងៃនេះ ការផ្តល់ហិរញ្ញប្បទានជិត ១ពាន់លានអឺរ៉ូ ត្រូវបានទទួលសម្រាប់ឆ្នាំ២០២៦។
លោកមីស្ហ៉ល់ ស្ត្រណាដ ដែលជាអគ្គនាយកនៃក្រុមហ៊ុន ឆែកចូស្ល៉ូវ៉ាក ដែលជាក្រុមហ៊ុនផលិតគ្រាប់រំសេវដ៏ធំបំផុតមួយនៅអឺរ៉ុប និងជាដៃគូនៃរដ្ឋាភិបាលឆែកនៃគំនិតផ្តួចផ្តើម បានធ្វើឲ្យជឿថា បុព្វហេតុមិនបានបាត់បង់ទាំងស្រុងទេ។ គំនិតផ្តួចផ្តើមក៏មិនបានស្លាប់ដែរ វានៅដំណើរការដដែល វាគ្រាន់តែយឺតបន្តិច។ សម្រាប់រូបលោក ទោះបីជាកម្មវិធីជំនួយនឹងត្រូវឈប់ ក៏គ្រាប់រំសេវនៅតែបន្តហូរទៅដល់អ៊ុយក្រែន។ ប្រទេសអឺរ៉ុបនឹងប្រើប្រាស់ខ្សែបណ្តាញជម្រើសផ្សេងទៀត ឬអាចទិញផ្ទាល់ពីអ្នកផ្គត់ផ្គង់នូវគ្រាប់រំសេវដោយមិនចាំបាច់ឆ្លងកាត់ក្រុមសម្ព័ន្ធមិត្តជួយអ៊ុយក្រែនក៏បាន។
យោងតាមប្រធានាធិបតីឆែក បានឲ្យដឹងទៀតថា ជោគវាសនានៃគំនិតផ្តួចផ្តើមជួយអ៊ុយក្រែននឹងត្រូវជាបេះដូងនៃកិច្ចពិភាក្សានៅក្នុងកិច្ចប្រជុំកំពូលនៃអង្គការណាតូ នៅទីក្រុងអន់ការ៉ា ប្រទេសទួរគី នៅថ្ងៃទី៧ និងទី៨ ខែកក្កដា ខាងមុខ។
Daily Program
