នៅតំបន់ការ៉ាអ៊ីប សហរដ្ឋអាម៉េរិកធ្វើទំនើបកម្មមូលដ្ឋានយោធានៅជិតប្រទេស​វ៉េណេហ្ស៊ូអេឡា

នេះគឺជាប្រវត្តិសាស្រ្តដែលមូលដ្ឋានយោធាអាម៉េរិកបោះទីតាំងនៅកោះព័រតូ រីកូ (Porto Rico)  ដែលធ្លាប់ត្រូវបានគេដាក់ឈ្មោះថា ផ្លូវរ៉ូសឺវែល (Roosevelt Roads) និងត្រូវបានទាញយកធ្វើ​អាជីវកម្ម និងប្រើប្រាស់យ៉ាងច្រើននៅអំឡុងសង្រ្គាមត្រជាក់។ ត្រូវបានបិទនៅឆ្នាំ២០០៤ រយៈ​ពេល ២១ឆ្នាំ ក្រោយមក ផ្ទៃដី ៨៧០០​ពាន់ហិចតានៃមូលដ្ឋានចម្រុះយោធារបស់ផ្លូវរ៉ូសឺវែល ដែលជាផ្លូវមួយក្នុងចំណោមផ្លូវធំបំផុតនៅលើពិភពលោក ត្រៀមខ្លួនបើកដំណើរឲ្យធ្វើ​ប្រតិបត្តិ​ការជាថ្មី។

សារព័ត៌មានសេដ្ឋកិច្ច ប្លូមបឺហ្គ៍ Bloomberge បានពិពណ៌នាថា ៖ ”ចាប់តាំងពីពីរទសវត្ស មូលដ្ឋាន​នេះត្រូវលិចទៅក្នុងស្មៅ និងឡើងច្រេសស្នឹម។ ប៉ុន្តែឥឡូវ​យន្តហោះចម្បាំង​បាន​រោទិ៍​សម្លេង។​ យោងតាមរូបភាពនានាពីលើអាកាស​ដែលថតដោយទីភ្នាក់ងារសារព័ត៌មានរ៉យទ័រ Reuters បានឲ្យដឹងថា ចាប់តាំងពីថ្ងៃ១៧ ខែកញ្ញា បុគ្គលិកនានា​បានចាប់ផ្តើមរៀបចំដី និង​ក្រាល​ផ្លូវ​ធ្វើចរាចរណ៍​ដែលនាំទៅដល់ពីស្ត៍សំខាន់។

យោងតាមអ្នកអង្កេតការណ៍ ការដាក់ដំណើរការមូលដ្ឋាននេះនៅក្នុងតំបន់សមុទ្រការ៉ាអ៊ីប ដែល​មានចម្ងាយមិនដល់ ៨០០ គម ពីប្រទេសវេណេហ្ស៊ូអេឡា មិនមែនជារឿងធម្មតាទេ។ ចាប់​តាំងពីច្រើនសប្តាហ៍ ទំនាក់ទំនងរវាងទីក្រុងវ៉ាស៊ីនតុន និងការ៉ាកាស គឺមានភាពតានតឹង​យ៉ាងខ្លាំង នៅខណៈដែលលោកដូណាល់ ត្រាំ បានថ្លែងថា សហរដ្ឋអាម៉េរិកស្ថិតនៅក្នុង​ជម្លោះ​យោធាជាមួយអ្នកជួញគ្រឿងញៀន ដែលលោកបាន​ចោទ​ប្រកាន់ប្រទេស​វ៉េណេហ្ស៊ូអេឡា​គាំពារអ្នកជួញដូរគ្រឿងញៀន។ នៅប៉ុន្មានសប្តាហ៍ចុងក្រោយ​​នេះ មានការ​វាយ​ប្រហារចំនួន ១៤ដង លើនាវានៅតាមបណ្តោយឆ្នេរប្រទេសវ៉េណេហ្ស៊ូអេឡា ដែលបាន​សម្លាប់​មនុស្សចំនួន ៦១នាក់ ដែលបង្ហាញថា ជាសមាជិកនៃអង្គការឧក្រិដ្ឋកម្ម​នៅ​អាម៉េរិក​ខាង​ត្បូង។

បើយោងតាមសារព័ត៌មានឌឹ ញូយ៉ក ថែមស៍ The New York Times បានឲ្យដឹងថា នៅកោះ​ព័រតូ រីកូ ភាពតានតឹងខាងយោធានៅពេលនេះ បានឡើងដល់កំពូល នៅខណៈ​ដែលទីក្រុង​វ៉ាស៊ីនតុន បានពង្រាយទាហានជិត ១ម៉ឺននាក់ នៅក្នុងមូលដ្ឋាននានា​នៅក្នុងទឹកដីអាម៉េរិក​ដ៏​តូច​នេះនៃតំបន់ការ៉ាអ៊ីប។

យោងតាម​រូបភាពនានាទទួលបានពីផ្កាយរណប បានបង្ហាញថា យ៉ាងហោច​ណាស់​មាននាវា​ចម្បាំង​​ពិឃាតបំពាក់មីស៊ីលនាំផ្លូវចំនួន ៣ ក្រុមវាយប្រហារតាមសមុទ្រ និង​នាវា​ប្រយុទ្ធស្ថិត​នៅ​ក្នុងទឹករាក់បានបោះទីតាំង នៅតាមបណ្តោយឆ្នេរ​ប្រទេស​វ៉េណេហ្ស៊ូអេឡា។   ហើយនាវា​ផ្ទុក​យន្តហោះដ៏ធំ​បំផុត នៃកងទ័ពម៉ារីនអាម៉េរិក នាវា​ យូអេសៗ ហ្ស៉ឺរ៉ាល់ដ៍ អ៊ែរ ហ្វ៉ដ USS Gerald R. Ford បានស្ថិត​នៅលើផ្លូវឆ្ពោះទៅ​កាន់​សមុទ្រ​ការ៉ាអ៊ីប​ផងដែរ។

លោកគ្រីស្តូហ្វើ ហេណាន់ដេ រ៉យ Christopher Hernandez-Roy ដែលជាអ្នកសិក្សាស្រាវជ្រាវ​សំខាន់​នៃមជ្ឈមណ្ឌលសិក្សាយុទ្ធសាស្រ្ត និងអន្តរជាតិស៊ីអេសអាយអេស CSIS នៅទីក្រុង​វ៉ាស៊ីនតុន បានថ្លែង​ថា អ្វីៗ គ្រប់យ៉ាងនេះ លោកគិតថា គឺដើម្បីបន្លាចរបបលោកម៉ាឌូរ៉ូ និង​ឧត្តមសេនីយ៍​​ដែល​ព័ទ្ធ​ជុំវិញ​រូបលោកនៅក្នុងសេចក្តីសង្ឃឹមនឹងធ្វើឲ្យពួកគេទាំងនោះបែក​បាក់​គ្នា។

នៅខណៈដែលមួយផ្នែកដ៏ធំ គឺការបង្កើនវត្តមានអំណាចយោធាអាម៉េរិកដែលរហូតមកដល់​ពេល​នេះ​គឺមានវត្តមានតែនៅសមុទ្រអន្តរជាតិ ឆ្ងាយពីការមើលឃើញរបស់សាធារណៈជន​នោះ អ្វី​ដែល​កើតឡើង​នៅផ្លូវ រ៉ូសឺវែល និងធ្វើឲ្យសាធារណៈ​ជន​​កាន់​តែ​មើលឃើញ​ច្បាស់នូវ​អំណាច​យោធារបស់អាម៉េរិក។

នេះគឺជាអ្វីដែលធ្វើឲ្យព្រួយបារម្ភដល់រដ្ឋនានានៅសហគមន៍ការ៉ាអ៊ីប ដែលមានសមាជិក​ចំនួន ១៤ ដែលថ្មីៗ នេះ ធ្លាប់រំឭកថា តំបន់នេះគឺជាតំបន់សន្តិភាព ដែលបញ្ហាសន្តិសុខ​គួរតែត្រូវ​ដោះស្រាយតាមរយៈកិច្ចសហប្រតិបត្តិការអន្តរជាតិបន្ត និងតាមតំបន់ច្បាប់អន្តរជាតិ។