ធនាគារជាតិ ចេញសេចក្តីណែនាំជួយសម្រាលបន្ទុកប្រជាពលរដ្ឋ និងយោធិន រងផលប៉ះពាល់ពីជម្លោះព្រំដែនកម្ពុជា-ថៃ

ថ្ងៃនេះ ធនាគារជាតិនៃកម្ពុជា បានចេញសេចក្តីណែនាំថ្មីមួយ ស្តីពីវិធានការជួយសម្រាលបន្ទុកដល់ប្រជាពលរដ្ឋ និងយោធិន ដែលរងផលប៉ះពាល់ដោយផ្ទាល់ពីបញ្ហាជម្លោះព្រំដែនកម្ពុជា–ថៃ។ វិធានការនេះ ត្រូវបានផ្តល់ចេញតាមការអំពាវនាវរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដើម្បីបង្ហាញពីស្មារតីសាមគ្គីភាព មនុស្សធម៌ និងគោលនយោបាយរបស់រាជរដ្ឋាភិបាលក្នុងការការពារ និងគាំទ្រប្រជាពលរដ្ឋនៅតំបន់ព្រំដែន។

តាមរយៈសេចក្តីណែនាំនេះ ធនាគារជាតិ បានបញ្ជាក់ឱ្យគ្រឹះស្ថានធនាគារ និងហិរញ្ញវត្ថុទាំងអស់ អនុវត្តវិធានការជួយសម្រាលជាចម្បង ៤ចំណុច ដែលរួមមាន៖

១. ការអនុគ្រោះដល់ជនភៀសសឹក

គ្រឹះស្ថានហិរញ្ញវត្ថុ ត្រូវលើកលែងកម្រៃ ប្រាក់ពិន័យ ការបង់ការប្រាក់ និងការបង់ប្រាក់ដើម ចាប់ពីថ្ងៃចេញសេចក្តីណែនាំ រហូតដល់ថ្ងៃទី ៣១ មីនា ឆ្នាំ ២០២៦។ ជាមួយនេះ ក៏មិនត្រូវធ្វើមូលធនកម្មការប្រាក់ឡើងវិញលើប្រាក់ដើមផងដែរ។

២. ជំនួយដល់យោធិនប្រតិបត្តិការដោយផ្ទាល់

ធនាគារ និងស្ថាប័នហិរញ្ញវត្ថុ ត្រូវអនុវត្តការលើកលែងកម្រៃ និងការផាកពិន័យ ចំពោះយោធិនដែលស្ថិតនៅសមរភូមិប្រយុទ្ធចាប់ពីថ្ងៃនេះ រហូតដល់ថ្ងៃទី ៣១ ឧសភា ឆ្នាំ ២០២៦ និងពន្យារពេលបង់ប្រាក់ដើម និងការប្រាក់ដល់ថ្ងៃទី ៣១ ឧសភា ឆ្នាំ ២០២៦។

គ្រប់ករណី ក៏មិនត្រូវមានការធ្វើមូលធនកម្មការប្រាក់ឡើងវិញផងដែរ។ បន្ថែមពីនេះ ធនាគារបានណែនាំឲ្យលុបចោលឥណទាន រហូតដល់ ១០លានរៀល សម្រាប់យោធិនពិការ និងរហូតដល់ ៨០ លានរៀលសម្រាប់យោធិន ពលីនៅសមរភូមិ។

៣. រៀបចំឥណទានឡើងវិញ

គ្រឹះស្ថានហិរញ្ញវត្ថុ ត្រូវបន្តអនុវត្តការរៀបចំឥណទានឡើងវិញសម្រាប់អតិថិជនផ្សេងទៀត ដោយគោរពតាមបទប្បញ្ញត្តិដែលកំពុងអនុវត្ត។

៤. លើកទឹកចិត្តនិងអនុគ្រោះបន្ថែម

ធនាគារជាតិ ក៏បានលើកទឹកចិត្តឱ្យគ្រឹះស្ថានធនាគារ និងហិរញ្ញវត្ថុ ផ្តល់អនុគ្រោះបន្ថែមតាមស្ថានភាព​ជាក់ស្តែង​ ដល់គ្រួសារដែល​ផលប៉ះពាល់​នៅតំបន់ព្រំដែន និងយោធិនដែលកំពុងចូលរួមប្រយុទ្ធ។

សេចក្តីណែនាំនេះ ត្រូវបាន​ដាក់​ឲ្យ​អនុវត្ត ចាប់ពីថ្ងៃទី​១០ខែធ្នូ​ ឆ្នាំ​២០២៥នេះតទៅ ដោយ​ធនាគារជាតិ​រំពឹងថា កិច្ចការនេះ​នឹងជាកិច្ចគាំទ្រសំខាន់​សម្រាលបន្ទុក និងជួយទប់ទល់នឹងបញ្ហាសេដ្ឋកិច្ច និងសង្គម ដែលកើតចេញពីស្ថានការណ៍ជម្លោះជាប់ព្រំដែនក្នុងប្រទេស។

ជម្លោះព្រំដែន​កម្ពុជា​បាន​ចាប់​ផ្តើម​តានតឹង និង​ផ្ទុះអាវុធ​ជាថ្មី កាលពីថ្ងៃទី​៧ ខែធ្នូ ឆ្នាំ​២០២៥ ក្រោយបទ​ឈប់​បាញ់​កាលពីថ្ងៃទី​២៨ ខែ​កក្កដា ឆ្នាំ​២០២៥កន្លងទៅ​។ បើតាម​សេចក្តីប្រកាសព័ត៌មាន​របស់​ក្រសួងការពារជាតិ​ នាព្រឹកថ្ងៃទី​៩ ខែធ្នូ ជម្លោះថ្មីៗ បានបង្កឲ្យ​មានជន​ស៊ីវិល​បាន​ស្លាប់​ចំនួន​៧នាក់ និង​របួស​ចំនួន​២០នាក់ និងជនភៀសសឹកជាង​​១ម៉ឺន​៦ពាក់​គ្រួសារ​ នៅតាម​បណ្តោយ​ព្រំដែនកម្ពុជា​ថៃ ក្នុងខេត្ត​ចំនួន​៥ ដែលក្នុងនោះ​រួមមាន​ ឧត្តរមានជ័យ បន្ទាយមានជ័យ ពោធិសាត់ ព្រះវិហារ​ និងសៀមរាប៕