ទូតសន្តអាសនៈនៅកុងហ្គោ៖ សាររបស់សម្តេចប៉ាបសំខាន់សម្រាប់សន្តិភាពនៅកុងហ្គោ

លោកអគ្គអភិបាល មីដ្យា ឡេស្កូវ៉ា (Mitja Leskovar) ឯកអគ្គរាជទូតសន្តអាសនៈ នៅទីក្រុងគិនសាសា (Kinshasa) បាននិយាយថា សាររបស់សម្តេចប៉ាបថ្មីៗនេះគឺពិតជាសំខាន់ណាស់សម្រាប់សន្តិភាពនៅក្នុងប្រទេសនេះ។

លោកឯកអគ្គរាជទូតបានថ្លែងថា ក្រៅពីសារនេះកាលពីអំឡុងពេលដែលសម្តេចប៉ាប​បានមកធ្វើទស្សនកិច្ចមកកាន់​សាធារណរដ្ឋប្រជាធិបតេយ្យកុងហ្គោពីថ្ងៃទី៣១ ខែមករា ដល់ថ្ងៃទី ៣ ខែកុម្ភៈ ឆ្នាំ ២០២៣ ទ្រង់ក៏បានផ្តល់សារនិងសង្កត់ធ្ងន់អំពីតម្លៃនៃសន្តិភាព ហើយសាររបស់សម្តេចប៉ាបបញ្ជាក់ពីស្ថានភាព និងគូសបញ្ជាក់នូវផ្លូវឆ្ពោះទៅរកការដោះស្រាយវិបត្តិ។

លោកបានព្រមានថា តំបន់ភាគខាងកើតនៃប្រទេសនេះកំពុងតែត្រូវបាន បំផ្លិចបំផ្លាញដោយជម្លោះ និងប្រឈមមុខនឹងវិបត្តិមនុស្សធម៌ធ្ងន់ធ្ងរជាថ្មី។

លោកអគ្គអភិបាលបានបន្តថា ពីរឆ្នាំបន្ទាប់ពីដំណើរទស្សនកិច្ច​របស់ទ្រង់មកកាន់ប្រទេសដែលនិយាយភាសាបារាំងដ៏ធំបំផុតនៅក្នុងទ្វីបអាហ្រ្វិក និង ការអំពាវនាវរបស់​ទ្រង់ នៅថ្ងៃពុធ ទី២៩ ខែមករា មានសារៈសំខាន់ជាពិសេស។

លោកបានបន្តថា បន្ទូលរបស់ទ្រង់ ឆ្លុះបញ្ចាំងពីទុក្ខសោក និងការខកចិត្តចំពោះសង្រ្គាមដែលកំពុងបន្ត ដែលជារឿយៗត្រូវបានសហគមន៍អន្តរជាតិមើលរំលង ហើយអំពាវនាវឱ្យ​ប្រមូលផ្តុំជាសកលកាន់តែច្រើនក្នុងការដោះស្រាយជម្លោះ។

លោកអគ្គអភិបាលបានបន្តថា កាលពី២ឆ្នាំមុន សម្តេចប៉ាបគ្រោងនឹងទៅទីក្រុងហ្គោម៉ា ប៉ុន្តែដោយ​ស្ថិត​ក្នុង​ជម្លោះ មិន​អនុញ្ញាត​​ឲ្យទ្រង់យាងទៅបាន ហើយទ្រង់តែងតែចងចាំជានិច្ចនូវអ្វីដែលជាកេរដំណែលនៃអំពើហិង្សានៅទីក្រុងនោះ។

លោកអគ្គអភិបាលបានបន្តថា ស្ថានភាពនៅភាគខាងកើតគឺនៅទីក្រុងហ្គោម៉ា គឺធ្ងន់ធ្ងរនិងរន្ធត់ ណាស់ ដោយនៅតាមផ្លូវមានសេចក្តីរាយការណ៍ថា មាន​សាកសព​ដេកស្តូកស្តឹងជាច្រើន។

លោកបានបន្តថា ការ​បាញ់​កាំភ្លើង​បន្តកើតមាន​នៅ​ក្នុង​តំបន់​ជា​ច្រើន ប៉ុន្តែផ្នែក​ខ្លះ​​នៃទីក្រុងមិន​​រង​ការគំរាមកំហែងទេ។

ទីក្រុង​នេះ​ស្ថិត​ក្រោម​ការ​ឡោមព័ទ្ធតាមយុទ្ធសាស្រ្តយោធា ដែល​អាច​ឈាន​ដល់​ជម្លោះ​កាន់តែ​អាក្រក់ ដូច្នេះយើងសង្ឃឹមនឹងមាន​ការចរចា ឬដំណោះស្រាយការទូត ឬការសន្ទនាក្នុងចំណោមភាគីទាំងអស់ និងការបញ្ចប់អំពើហិង្សាតាមហឫទ័យរបស់សម្តេចប៉ាប៕