កាលពីថ្ងៃទី១៦ ខែកក្កដា អ៊ីស្រាអែល បានទម្លាក់គ្រាប់បែកលើសង្កាត់ទីបញ្ជាការយោធាស៊ីរីនៅរដ្ឋធានីដាម៉ាស បន្ទាប់ពីបានគំរាមពង្រីកការវាយប្រហារប្រឆាំងនឹងកងកម្លាំង រដ្ឋាភិបាលស៊ីរី ប្រសិនបើពួកគេមិនចាកចេញពីទីក្រុងស៊ូអេដា ដែលមានជនជាតិ ឌ្រូហ្សរស់នៅច្រើន ក្រោយពីមានអំពើហិង្សារយៈពេល ៣ថ្ងៃ ដែលធ្វើឲ្យមានអ្នកស្លាប់ច្រើនជាង ៣០០នាក់។
ក្រសួងការពារជាតិអ៊ីស្រាអែល Katz បានថ្លែងថា ទាហានអ៊ីស្រាអែលនឹងបង្កើនវិសាលភាព នៃការឆ្លើយតបរបស់ខ្លួនប្រឆាំងនឹងរបបស៊ីរី។ ក្រសួងការពារជាតិអ៊ីស្រាអែល ទាមទារឲ្យអ្នក កាន់អំណាចស៊ីរីទុកឲ្យជនជាតិឌ្រូហ្សនៅទីក្រុងស៊ូអេដា រស់នៅដោយមានសន្តិសុខ។
ទាហានអ៊ីស្រាអែលបានដឹកនាំការវាយប្រហារកាលពីថ្ងៃពុធនៅទីក្រុង ដាម៉ាស។ ពួកគេបានវាយប្រហារដាក់គោលដៅមានជាអាទិ៍ លើសង្កាត់អគ្គទីបញ្ជាការទាហានស៊ីរី នៅកណ្តាលរដ្ឋធានី និងបានប្រកាសថាដាក់គោលដៅវាយប្រហារលើគោលដៅយោធានៅក្នុងតំបន់វិមានប្រធានាធិបតីផងដែរ។
ក្រសួងសុខាភិបាលស៊ីរីបានថ្លែងថា ការវាយប្រហារទាំងនេះ បានធ្វើឲ្យមានមនុស្សស្លាប់យ៉ាងហោចណាស់ ៣នាក់ និង ៣៤នាក់ទៀត រងរបួស។ ការវាយប្រហារដ៏ហិង្សា បានបំផ្លាញមួយចំហៀងនៃអគារមួយដែលមានបួនជាន់នៃសំណុំអគារដែលជាទីតាំងនៃអគ្គទីបញ្ជាការកងទ័ពជាប់នឹងក្រសួងការពារជាតិ។
សាក្សីជាច្រើនបានបញ្ជាក់ប្រាប់ថា ពួកគេបានឮសម្លេងការផ្ទុះនៅក្នុងផ្នែកនៃវិមានប្រធានាធិបតីនៅរដ្ឋធានីដាម៉ាស និងឃើញផ្សែងហុយឡើងនៅលើតំបន់នោះ ក្រោយបន្តិចបន្ទាប់ពីប្រតិបត្តិការវាយប្រហាររបស់អ៊ីស្រាអែលនៅលើសង្កាត់ទីបញ្ជាការទាហានស៊ីរីនៅក្នុងកណ្តាលរដ្ឋធានី។
ទូរទស្សន៍ផ្លូវការរបស់ស៊ីរី បានបង្ហាញអំពីការវាយប្រហាររបស់អ៊ីស្រាអែលកាលពីល្ងាចថ្ងៃទី១៦ ខែកក្កដា នៅលើផ្នែកនៃសង្កាត់ទីបញ្ជាការកងទ័ព នៅក្នុងភាគកណ្តាលរដ្ឋធានី និងត្រូវបានកម្ទេច។ រូបភាពតាមទូរទស្សន៍ក៏បានបង្ហាញអំពីទាហានជាច្រើនបានចាកចេញពីអគារទាំងប្រញាប់ប្រញាល់ ដែលជាប់នឹងក្រសួងការពារជាតិស៊ីរី។ លុះព្រឹកឡើង ទាហានអ៊ីស្រាអែល ក៏បានប្រកាសអំពីការវាយប្រហារលើច្រកចូលសង្កាត់ទីបញ្ជាការយោធាស៊ីរីផងដែរ។
កាលពីថ្ងៃពុធដែរ ក្រសួងការបរទេសទួរគី បានបរិហារអំពីទង្វើវាយឆ្មក់បំផ្លាញលើកិច្ចប្រឹងប្រែងរបស់ស៊ីរីដើម្បីសន្តិភាព និងស្ថិរភាពនៃប្រទេស បន្ទាប់ពីការទម្លាក់គ្រាប់បែករបស់អ៊ីស្រាអែលលើរដ្ឋធានីដាម៉ាស។ នៅក្នុងសេចក្តីប្រកាសមួយក្រសួងការបរទេសទួរគី បានថ្លែងឲ្យដឹងថា បន្ទាប់ពីកិច្ចអន្តរាគមន៍ខាងយោធារបស់អ៊ីស្រាអែលនៅក្នុងភាគខាងត្បូងស៊ីរី ការវាយប្រហារដែលអ៊ីស្រាអែលទើបតែធ្វើឡើងលើទីតាំងកណ្តាលទីក្រុងដាម៉ាស គឺជាការប៉ុនប៉ងធ្វើការវាយឆ្មក់បំផ្លិចបំផ្លាញកិច្ចខិតខំប្រឹងប្រែងរបស់ស៊ីរីដើម្បីធានាសន្តិភាព ស្ថិរភាព និងសន្តិសុខ។
លោកថម បារ៉ាក បេសកកជនពិសេសរបស់អាម៉េរិក បានអំពាវនាវឲ្យគ្រប់ភាគីថយម្នាក់មួយជំហាន និងត្រូវសន្យាធ្វើកិច្ចសន្ទនាអំពីការឈប់បាញ់នៅស៊ីរី បន្ទាប់ពីការប្រឈមមុខដែលទាក់ទិននឹងសហគមន៍ជនជាតិឌ្រូហ្ស នៅក្នុងភាគខាងត្បូងប្រទេស និងការវាយប្រហាររបស់អ៊ីស្រាអែលលើរដ្ឋធានីដាម៉ាស។ ចំណែករដ្ឋមន្រ្តីមន្រ្តីក្រសួងការបរទេសអាម៉េរិក លោកម៉ាកកូ រូប៊ីយ៉ូ បាននិយាយថា បារម្ភខ្លាំងណាស់ដោយការវាយប្រហារនេះ។ ជាមួយសមភាគីប្រទេសបារ៉ែន លោកបានបញ្ជាក់ថា ៖ “យើងពិភាក្សាជាមួយភាគីទាំងពីរ និងគ្រប់ភាគីដែលពាក់ព័ន្ធ ហើយយើងសង្ឃឹមថា យើងនឹងអាចឈានទៅដល់ការធ្វើសេចក្តីសន្និដ្ឋានបញ្ចប់ជម្លោះ ប៉ុន្តែយើងក៏បារម្ភខ្លាំងណាស់។” លោកបន្ថែមថា យើងចង់ឲ្យការប្រយុទ្ធត្រូវបានបញ្ឈប់។
Daily Program
