ទាហានកូរ៉េខាងជើង បានជួបការស្លាប់បាត់បង់ និងរបួសជាច្រើន

ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានអះអាងកាលពីចុងសប្តាហ៍ថា ទាហានកូរ៉េខាងជើងដែលរងរបួសបានស្លាប់នៅអ៊ុយក្រែន បន្ទាប់ពីបានចាប់ឃុំខ្លួន។ ប្រមុខ រដ្ឋអ៊ុយក្រែននៅក្នុងសេចក្តីថ្លែងប្រចាំថ្ងៃ បានឲ្យដឹងថា ៖ “ទាហានកូរ៉េខាងជើង បានរងការ បាត់បង់ជាច្រើន គឺច្រើន។ ហើយគេឃើញថា ទាហានរុស្ស៊ី និងមេបញ្ជាការកូរ៉េខាងជើង​មិន​ចាប់​អារម្មណ៍ទាល់តែសោះនឹងការរស់រានរបស់​ជនជាតិកូរ៉េទាំងនេះ។” ​លោកក៏បាន​បរិហារ​អំពី​ភាពឆ្កួតលីលាដែលមេដឹកនាំ​ផ្តាច់ការ​អាច​ធ្វើបាន ដោយបញ្ជូនទាហានឲ្យមកប្រយុទ្ធ និង​ឲ្យ​គេសម្លាប់នៅក្នុងសមរភូមិនៅអឺរ៉ុប”។ លោកវ៉ូឡូឌីមៀ ហ្សេឡេនស្គី បានគូសបញ្ជាក់ថា ៖ “អ្វីៗ គ្រប់យ៉ាងត្រូវបានធ្វើដើម្បីឲ្យយើង​មិន​អាចចាប់ខ្លួនទាំងរស់នូវទាហានកូរ៉េទាំងនេះ។ រុស្ស៊ី​​​បានបញ្ជូនពួកគេមកឲ្យប្រយុទ្ធ​ដោយ​មាន​ការការពារតិចតួច។”

សេវាកម្មចារកម្មកូរ៉េខាងត្បូង បានបង្ហាញថា ទាហានកូរ៉េខាងជើងម្នាក់ត្រូវបានចាប់ធ្វើ​ជាអ្នក​ទោស​កាលពីថ្ងៃទី២៦ ខែធ្នូ ដោយទាហានអ៊ុយក្រែន ប៉ុន្តែមិនអាចរស់រានមានជីវិតដោយសារ​រង​របួសធ្ងន់ធ្ងរ”។

កាលពីថ្ងៃនោះដែរ ទីក្រុងវ៉ាស៊ីនតុន បានអះអាងថា ទាហានជាង ១០០០នាក់​ ដែលត្រូវបាន​ដាក់​ពង្រាយដោយទីក្រុងព្យុងយ៉ាងនៅក្នុងប្រទេសរុស្ស៊ីដើម្បីប្រយុទ្ធប្រឆាំងនឹងអ៊ុយក្រែន បាន​ស្លាប់ និងរងរបួស នៅអំឡុងការវាយប្រហារមួយដែលគ្មានសង្ឃឹមឈ្នះ​នៅក្នុងតំបន់​ព្រំដែន​​​ខេត្តគូស្ក៍ របស់រុស្ស៊ី។

លោកចន គៀប៊ី អ្នកនាំពាក្យនៃក្រុមប្រឹក្សាសន្តិសុខជាតិអាម៉េរិក បានបន្ថែមថា ៖ “វាច្បាស់ថា ប្រមុខ​យោធារុស្ស៊ី និងកូរ៉េខាងជើង បានចាត់ទុកពួកគេគឺជាទាហានដែលអាចបូជាជីវិត”។​លោក​បានថ្លែងថា ៖ “កងកម្លាំងកូរ៉េខាងជើង បានដឹកនាំការវាយប្រហារដ៏សម្បើម... ប្រឆាំង​នឹង​ទីតាំងរបស់អ៊ុយក្រែននៅគូស្ក៍។ រលកនៃមនុស្សទាំងនេះមិនមានប្រសិទ្ធភាពប៉ុន្មានទេ... គេ​​វាយតម្លៃថា នៅថ្ងៃនោះ ទាហានកូរ៉េខាងជើងជាង ១០០០នាក់ ត្រូវបានរងរបួស និង​សម្លាប់”។

កាលពីថ្ងៃចន្ទ លោកវ៉ូឡូឌីមៀ ហ្សេឡេនស្គី បានបញ្ជាក់ថា ទាហានកូរ៉េខាងជើងជិត ៣០០០នាក់ ត្រូវបានសម្លាប់ និងរងរបួស ចាប់តាំងពីការចូលរួមរបស់ពួកគេ​ជាមួយទាហាន​រុស្ស៊ី។ ចំណែកទីក្រុងសេអ៊ូល បានផ្តល់តួលេខថា មានទាហានកូរ៉េខាងជើង ១១០០នាក់ បាន​ស្លាប់ និងរបួស។

ការពាក់ព័ន្ធនៃទាហានរៀបរយបរទេស បានបង្កជាការកើនឡើងនូវភាពតានតឹងដ៏ចម្បង​នៅ​ក្នុង​ការឈ្លានពានទ្រង់ទ្រាយធំរបស់រុស្ស៊ី ដែលបានបញ្ឆេះឡើងជិត ៣ឆ្នាំ មកហើយ ដោយ​លោក​វ្លាឌីមៀ ពូទីន។

យោងតាមទីក្រុងគៀវ បានឲ្យដឹងថា មានទាហានកូរ៉េខាងជើង ១២០០០នាក់ ដែលរួមមាន​មន្រ្តីយោធា ៥០០នាក់ និងឧត្តមសេនីយ៍យោធា ៣នាក់ នៅក្នុងនោះ កំពុងស្ថិតនៅក្នុងតំបន់​គូស្ក៍។ នេះគឺជាតំបន់ដែលទាហានអ៊ុយក្រែន បានគ្រប់គ្រងរាប់រយគីឡូម៉ែតការ៉េ​ចាប់តាំងពី​ខែ​សីហា។ ទាំងរុស្ស៊ី និងទាំងកូរ៉េខាងជើង មិនបាន​បញ្ជាក់អំពីវត្តមាននៃអ្នកចូលរួម​ប្រយុទ្ធ​កូរ៉េ​ទាំង​នេះទេ។

លោកឡេហ្គេន ឡេរីន អ្នកនាំពាក្យចារកម្មយោធាអ៊ុយក្រែន បាននិយាយថា ៖​”ការពាក់ព័ន្ធ​របស់​កូរ៉េខាងជើងនៅក្នុងការប្រយុទ្ធមិនមានឥទ្ធពលធំដុំទេ។” បើតាមរូបលោក កងកម្លាំងកូរ៉េ​ខាង​ជើង មិនមានបទពិសោធន៍នៃសង្រ្គាមសម័យទំនើប ជាពិសេសប្រឈមមុខនឹងដ្រូនដែល​បច្ចុប្បន្ន​នេះក្លាយជាធម្មតានៅលើសមរភូមិ ហើយពួកគេ​នៅប្រើតាក់តិចដូចជាសម័យ​បុព្វកាល ឬតាកតិចមានប្រភពពីសង្រ្គាមលោកលើកទី២ ឬបន្ទាប់ពីសង្រ្គាមលោកនោះ។