យោងតាមវិដេអូមួយដែលត្រូវបានផ្សព្វផ្សាយដោយទីក្រុងគៀវ កាលពីថ្ងៃពុធទី២២ ខែមករា បានឲ្យដឹងថា ប្រធានាធិបតីអ៊ុយក្រែន លោកវ៉ូឡូឌីមៀ ហ្សេឡេនស្គី បានប៉ាន់ស្មានថា យ៉ាងហោចណាស់ ទាហានអឺរ៉ុប ២០០០០០នាក់ នឹងត្រូវដាក់ពង្រាយដើម្បីធានាសន្តិសុខអ៊ុយក្រែន ក្នុងករណី មានបទឈប់បាញ់ជាមួយរុស្ស៊ី និងបញ្ចៀសការលុកលុយថ្មីទៀត។
ប្រធានាធិបតីអ៊ុយក្រែន ក្នុងអំឡុងកិច្ចប្រជុំប្រចាំឆ្នាំនៃវេទិកាសេដ្ឋកិច្ចពិភពលោកនៅទីក្រុង ដាវ៉ូស ប្រទេសស្វីស បានថ្លែងនៅក្នុងកិច្ចសម្ភាសន៍មួយថា ៖ ”២០០០០០នាក់ គឺជាចំនួនអប្បរិមា។ គឺតិចបំផុត។ បើមិនអីចឹងទេ វាគ្មានន័យអ្វីទាំងអស់។”
នេះគឺជាលើកទី១ ដែលប្រមុខរដ្ឋអ៊ុយក្រែនបានរំឭកជាសាធារណៈអំពីចំនួន ទាហានបរទេស នេះ នៅខណៈដែលគម្រោងការនេះត្រូវបានពិភាក្សានៅពីក្រោយឆាកតាំងពីច្រើនខែមកហើយរវាងទីក្រុងគៀវ និងសម្ព័ន្ធមិត្តលោកខាងលិចរបស់ខ្លួន។
ប្រធានាធិបតីបារាំង លោកអេម៉នូអែល ម៉ាក្រុង បានជំរុញទៅមុខនៃគំនិតដាក់ពង្រាយទាហានលោកខាងលិចនៅអ៊ុយក្រែនដើម្បីត្រួតពិនិត្យកិច្ចព្រមព្រៀងឈប់បាញ់ដែលអាចកើតមានឡើងជាយថាហេតុជាមួយនឹងរុស្ស៊ី ដែលបានឈ្លានពានអ្នកជិតខាងអ៊ុយក្រែនរបស់ខ្លួនរយៈពេល ៣ឆ្នាំ មកហើយ ហើយសព្វថ្ងៃនេះ កំពុងគ្រប់គ្រងទឹកដីអ៊ុយក្រែននៅភាគខាងកើត និងខាងត្បូង ប្រមាណ ២០%។
ចាប់តាំងពីច្រើនសប្តាហ៍មកហើយ ការព្យាករអំពីកិច្ចសន្ទនាដែលអាចកើតមានឡើងជាយថាហេតុ ដើម្បីបញ្ចប់ជម្លោះ បានរីកធំឡើង នៅក្នុងទីជម្រៅនៃការចោទសួរអំពីជំហរដែលប្រធានាធិបតីអាម៉េរិកថ្មី លោកដូណាល់ ត្រាំ នឹងប្រកាន់យក។ សហរដ្ឋអាម៉េរិកគឺជាអ្នកផ្គត់ផ្គង់ជំនួយយោធា និងហិរញ្ញវត្ថុដ៏សំខាន់សម្រាប់ទីក្រុងគៀវ។
កាលពីថ្ងៃពុធ លោកដូណាល់ ត្រាំ បានគំរាមប្រទេសរុស្ស៊ីអំពីទណ្ឌកម្មថ្មី ប្រសិនបើទីក្រុងមូស្គូមិនចរចាបញ្ចប់សង្រ្គាមប្រឆាំងអ៊ុយក្រែន។ នៅលើបណ្តាញសង្គម Truth Social របស់ខ្លួន ប្រធានាធិបតីអាម៉េរិក បានសរសេរថា ៖ “នេះគឺជាពេលវេលាស្វែងរកកិច្ចព្រមព្រៀង។” លោកអះអាងថា លោកមិនព្យាយាមធ្វើបាបរុស្ស៊ីទេ។ លោកស្រឡាញ់ប្រជាជនរុស្ស៊ី និងលោកជានិច្ចកាលមានទំនាក់ទំនងល្អណាស់ជាមួយប្រធានាធិបតីពូទីន។
ចំណែកលោកវ៉ូឡូឌីមៀ ហ្សេឡេនស្គី ចេញពីទីក្រុងដាវ៉ូស បានវាយតម្លៃថា ប្រធានាធិបតីអាម៉េរិកអាចនឹងអនុវត្តទណ្ឌកម្មទាំងស្រុងប្រឆាំងរុស្ស៊ី ជាពិសេស វិស័យថាមពល និងផ្តល់ឲ្យអ៊ុយក្រែននូវអាវុធគ្រប់ប្រភេទ ដែលអ៊ុយក្រែនសុំ ដើម្បីគំរាមកំហែងលោកវ្លាឌីមៀ ពូទីន។
មុនពេលឡើងកាន់តំណែងផង កាលពីថ្ងៃចន្ទ លោកដូណាល់ ត្រាំ បានបញ្ជាក់ថា លោកកំពុងត្រៀមជំនួបជាមួយលោកប្រធានាធិបតីរុស្ស៊ី លោកវ្លាឌីមៀ ពូទីន ដើម្បីបញ្ចប់សង្រ្គាមនេះ។ លោកវ៉ូឡូឌីមៀ ហ្សេឡេនស្គី វាយតម្លៃថា លោកមិនភ្ញាក់ផ្អើលទេ ដែលសហរដ្ឋអាម៉េរិកមានទំនាក់ទំនងជាមួយលោកពូទីន ប៉ុន្តែអ៊ុយក្រែនត្រូវតែជាអាទិភាពសម្រាប់ប្រធានាធិបតីអាម៉េរិក។ លោកទទូចថា ដោយសារយើងគឺជាសម្ព័ន្ធមិត្តរបស់សហរដ្ឋអាម៉េរិក។ យើងគឺជាជនរងគ្រោះ។ ពូទីនគឺជាអ្នកឈ្លានពាន ហើយយើងមិនមែនជាអ្នកចាប់ផ្តើមសង្រ្គាមទេ គឺគាត់ដែលជាអ្នកចាប់ផ្តើម”។ លោកវ៉ូឡូឌីមៀ ហ្សេឡេនស្គី ក៏បានព្រមានថា ៖ “បញ្ចប់សង្រ្គាមដែលបានធ្វើឲ្យមនុស្សរាប់ម៉ឺនស្លាប់ ទាំងសងខាង និងបំផ្លាញអ៊ុយក្រែន នឹងជាការលំបាកណាស់សម្រាប់ប្រធានាធិបតីត្រាំ។ លោកបានថ្លែងថាអ៊ុយក្រែននឹងមិនទទួលស្គាល់ដែនដីដែលដណ្តើមដោយរុស្ស៊ីជារបស់រុស្ស៊ីទេ ដូចគ្នាដែរ សម្ព័ន្ធមិត្តទាំងអស់រួមគ្នាដើម្បីទាមទារ។ លោកវ៉ូឡូឌីមៀ ហ្សេឡេនស្គី បាននិយាយថា ៖ “នឹងមិនមានការលើកលែង និងការទទួលស្គាល់តាមផ្លូវច្បាប់ទេ ហើយយើងត្រូវធ្វើគ្រប់អ្វីៗ ដើម្បីបញ្ចប់ដំណាក់កាលក្តៅនៃសង្រ្គាម”។
Daily Program
