ក្នុងថ្ងៃនេះ សម្តេចប៉ាបហ្វ្រងស៊ីស្កូ បានបញ្ចប់ដំណើរទស្សនកិច្ចរបស់ទ្រង់នៅក្នុងប្រទេសប៉ាពួញូវហ្គីនៀហើយដែលបានធ្វើឡើងក្នុងថ្ងៃទី៦-៩ កញ្ញានេះ។ ដំណើរទស្សនកិច្ចរបស់សម្តេចប៉ាបក្នុងប្រទេសនេះ គឺផ្តោតសំខាន់លើកទឹកចិត្តនិងពង្រឹងជំនឿនិងការទំនាក់ទំនងរបស់គ្រីស្តបរិស័ទនិងព្រះជាម្ចាស់ដោយការអធិដ្ឋាន។
នៅព្រឹកថ្ងៃទី៧ កញ្ញា នៅប្រទេសប៉ាពួញូវហ្គីនៀ សម្តេចប៉ាបបានជួបជាមួយមេដឹកនាំនិងមន្ត្រីសំខាន់ៗនៃប្រទេសនេះ ហើយទ្រង់បានអំពាវនាវឱ្យមានការអភិវឌ្ឍន៍ប្រកបដោយចីរភាព និងការចែកចាយធនធានដោយយុត្តិធម៌ ស្នើសុំឲ្យបញ្ចប់អំពើហិង្សាលើកុលសម្ព័ន្ធនិងឯកភាពសម្រាប់ការអភិវឌ្ឍន៍។ ហើយទ្រង់ក៏សង្កត់ធ្ងន់លើការតម្លៃខាងវិញ្ញាណសម្រាប់ការលូតលាស់សង្គម និងបង្កើតភាពជាដៃគូរវាងព្រះសហហគមន៍និងរដ្ឋាភិបាល។ ហើយពេលរសៀល ទ្រង់បានជួបជាមួយគ្រីស្តបរិស័ទនៅក្នុងប្រទេសនេះ ដោយបានលើកទឹកចិត្តដល់ពួកគេឲ្យខិតខំរក្សាជំនឿ និងកុំភ័យខ្លាច គឺត្រូវបើកចិត្តដោយអំណរទទួលព្រះបន្ទូលរបស់ព្រះជាម្ចាស់ បើកចិត្តដើម្បីស្វែងរកព្រះជាម្ចាស់ក្នុងជីវិត និងបើកចិត្តដើម្បីស្រឡាញ់បងប្អូនឯទៀតៗ។
នៅថ្ងៃទី៨ កញ្ញាសម្ដេចប៉ាប បានជួបជាមួយនាយករដ្ឋមន្ត្រីនៃប្រទេសនេះ នៅនិវេសនដ្ឋានរបស់លោកអគ្គរាជទូតតំណាងសម្តេចប៉ាបនៅក្រុងវ៉ានីម៉ូ(VANIMO) និងបានថ្វាយអភិបូជានៅពហុកីឡាដ្ឋានលោកចនហ្គូអ៊ីស (Sir John Guise)។
នៅពេលរសៀល ទ្រង់បានធ្វើដំណើរទៅកាន់តំបន់វ៉ាន់នីម៉ូ ដែលជាប្រជុំកោះស្ថិតនៅភាគពាយ័ព្យនៃប្រទេសប៉ាពួញូវហ្គីនៀ។ នៅទីនោះសម្តេចប៉ាប មានបន្ទូលទៅកាន់គ្រីស្តបរិស័ទក្នុងតំបន់នោះថា «បេសកកម្មរបស់យើងគឺច្បាស់ណាស់ថា ផ្សព្វផ្សាយភាពស្រស់ស្អាតនៃដំណឹងល្អរបស់ព្រះគ្រីស្តនៅគ្រប់ទីកន្លែង តាមរយៈសេចក្ដីស្រឡាញ់របស់ព្រះជាម្ចាស់ និងបងប្អូនដែលនៅជុំវិញយើង»។
ជាមួយគ្នានេះ សម្តេចប៉ាប បានលើកទឹកចិត្តដល់គ្រីស្តបរិស័ទទាំងអស់ឲ្យចូលរួមគាំទ្រដល់សាសនទូត និងសហគមន៍របស់ខ្លួន។ ទ្រង់ក៏បានអំពាវនាវឱ្យគ្រីស្តបរិស័ទចេះរួបរួមគ្នាយកឈ្នះការបែកបាក់សាមគ្គីភាព និងកុំឲ្យមានអាកប្បកិរិយាបំផ្លិចបំផ្លាញ ដោយទ្រង់បានសង្កត់ធ្ងន់ថា សេចក្តីស្រឡាញ់ជាកម្លាំងលើសអ្វីៗទាំងអស់ ហើយភាពស្រស់ស្អាតរបស់វាអាចព្យាបាលពិភពលោកបាន។
សម្តេចប៉ាបសូមគ្រីស្តបរិស័ទយកគំរូតាមអ្នកមានសុភមង្គល ភីធើ ធូ រ៉ុត (Blessed Peter To Rot) ដែលជាគ្រូអប់រំជំនឿតស៊ូប្រឆាំងចំពោះអំណាចជប៉ុនលើច្បាប់អាពាហ៍ពិពាហ៍របស់ព្រះសហគមន៍។ សម្តេចប៉ាប់រំលឹកអំពីលោកភីធើនេះថា លោកបានផ្តល់សក្ខីកម្មនៃសេចក្តីស្រឡាញ់ មិនត្រឹមតែពាក្យសម្ដីប៉ុណ្ណោះ តែដោយការអនុវត្តផង។
នៅលើកោះនោះ សម្តេចប៉ាបបានធ្វើជំនួបដាច់ដោយឡែកជាមួយក្រុមសាសនទូត បន្ទាប់មកក៏វិលត្រលប់ទៅក្រុងឌីលី (Dili) ហើយនៅព្រឹកថ្ងៃបន្ទប់ទ្រង់បានជួបជាមួយយុវជន ហើយបានធ្វើដំណើរឆ្ពោះទៅកាន់ប្រទេសទីម័រខាងកើត។
ប៉ាពួញូវហ្គីនៀ ជាប្រទេសមួយដែលស្ថិតនៅក្នុងទ្វីបអូសេអានី ជាប្រទេសទី៣ដែលមានប្រជុំកោះច្រើនជាងគេក្នុងពិភពលោក ដែលមានប្រជាជន១០លាននាក់ និយាយ៨៤០ភាសាដែលធ្វើឱ្យប្រទេសនេះក្លាយជាប្រទេសចម្រុះភាសាច្រើនជាងគេ។ ក្នុងចំណោមប្រជាជនមានអ្នកកាន់គ្រីស្តសាសនាចំនួន៧០% ដែលក្នុងនោះមានកាតូលិកចំនួន២៦%៕
Daily Program
