ជ័យជម្នះរបស់លោកដូណាល់ ត្រាំ អ៊ុយក្រែនមានហេតុផលក្នុងការព្រួយបារម្ភ

នៅក្នុងសេចក្តីថ្លែងសន្ទរកថា កាលពីថ្ងៃទី៦ ខែវិច្ឆិកា នៅរដ្ឋហ្វ៉្លរីដា សហរដ្ឋអាម៉េរិក លោក​ដូណាល់ ត្រាំ បានអរគុណប្រជាជនអាម៉េរិកសម្រាប់ការផ្តល់កិត្តិយសអស្ចារ្យបោះឆ្នោត​ឲ្យរួប​លោក​ជាប់​ជាប្រធានាធិបតីទី៤៧។ បន្ទាប់មក លោកបានសន្យាថា លោកនឹងបញ្ចប់សង្រ្គាម។ នេះគឺ​ជាសេចក្តីថ្លែងសន្ទរកថា ដែលគេវិនិច្ឆ័យថា ផ្តល់ការព្រួយបារម្ភសម្រាប់ទីក្រុងគៀវ ដែល ទាហានរបស់ខ្លួនកំពុងដកថយរួចហើយ ពីមួយថ្ងៃទៅមួយថ្ងៃ ប្រឈមមុខនឹង​កងកម្លាំង​រុស្ស៊ី របស់លោកវ្លាឌីមៀ ពូទីន។

យោងតាមបណ្តាញព័ត៌មាន CNN បានឲ្យដឹងថា ជនជាតិអ៊ុយក្រែន​ព្រួយបារម្ភ។ នេះ​ពីព្រោះ​ថា នៅពេលយុទ្ធនាការបោះឆ្នោតរបស់លោក បេក្ខភាពប្រធានា​ធិបតីមកពីគណបក្ស​សាធារណរដ្ឋ បានបញ្ចេញនូវភាពស្រពិចស្រពិលខ្លាំងអំពី​ការបន្តការសន្យារបស់អាម៉េរិក​សម្រាប់​ទីក្រុងគៀវ។

សារព័ត៌មានឌឹ ហ្គ៉ាកដៀន The Guardian រៀបរាប់ឲ្យដឹងថា ចាប់តាំពីច្រើនខែ លោកដូណាល់ ត្រាំ និយាយម្តងហើយម្តងទៀតថា លោកអាចនឹងដាក់សំពាធដល់អ៊ុយក្រែនឲ្យចុះ​ហត្ថលេខាលើបទឈប់បាញ់ជាមួយរុស្ស៊ី និងដូច្នេះក៏បញ្ចប់សង្រ្គាម មិនដល់ ២៤ម៉ោង​ទេ។

សារព័ត៌មាន ឌឹ គៀវអ៊ីនដឺផិនដិន The Kiev Indenpendant ប្រាប់ឲ្យដឹងថា របាយការណ៍ និង​សេចក្តី​ថ្លែងសន្ទរកថាខ្លះពីមនុស្សនៅជិតស្និទ្ធ​នឹង​មហាសេដ្ឋីពាន់លានរូបនេះ បានបង្ហាញថា ការដាក់សំពាធលើអ៊ុយក្រែន​គឺរឿងពាក់ព័ន្ធដើម្បីឲ្យអ៊ុយក្រែនប្រគល់ដីសព្វថ្ងៃ​ដែល​គ្រប់គ្រង​ដោយរុស្ស៊ី ឬ ២០% នៃផ្ទៃដីជាតិអ៊ុយក្រែន ឬបដិសេធការចង់ចូលជាសមាជិក​របស់​អ៊ុយក្រែន​មកក្នុងអង្គការណាតូ។ ដូច្នេះរឿងនេះ វាផ្ទុយពីផែនការជ័យជម្នះ​ដែលចង់​បាន​ដោយ​ប្រធានាធិបតីអ៊ុយក្រែន លោក​វ៉ូឡូឌីមៀ ហ្សេឡេនស្គី ដែលចំនុចដែលសំខាន់បំផុត គឺ​ការ​អញ្ជើញជាផ្លូវការឲ្យអ៊ុយក្រែនចូលរួម​ជាមួយសម្ព័ន្ធមិត្តអាត្លង់ទិច ព្រមទាំងពង្រឹង​ជំនួយ​យោធា។

ដោយអបអរសាទរលោកដូណាល់ ត្រាំសម្រាប់​ជ័យជម្នះដ៏គួរឲ្យភ្ញាក់ផ្អើល លោកហ្សេឡេនស្គី បាននិយាយថា សង្ឃឹមលទ្ធផលនេះនឹងជួយអ៊ុយក្រែន​ឲ្យទទួល​បាន​សន្តិភាព​ដែលមាន​យុត្តិធម៌។ នៅលើបណ្តាញសង្គម X លោកបានសរសេរថា ៖ លោក​កោត​សរសើរ​ការសន្យា​ប្រធានាធិបតីត្រាំ ដែលចង់បានការខិតទៅជិតសន្តិភាព​នៅ​ក្នុង​កិច្ចការ​ពិភពលោក។ លោកក៏​បាន​រំឭកអំពីជំនួបដ៏កក់ក្តៅជាមួយគ្នានៅទីក្រុងញូយ៉ក កាលពីខែកញ្ញា និងថ្លែងថា លោក​ទាំងពីរបានពិភាក្សាអំពីមធ្យោបាយ​ដើម្បីបញ្ចប់ការ​ឈ្លានពាន​របស់រុស្ស៊ី​មកលើ​អ៊ុយក្រែន។​ លោកបានស្វាគមន៍ភាពជាអ្នកដឹកនាំដ៏ដាច់ខាត​របស់​លោកត្រាំ និងលើកឡើងអំពីការគាំទ្រ​ដ៏ខ្លាំងក្លារបស់អាម៉េរិកចំពោះអ៊ុយក្រែន។

ក្តីបារម្ភមួយទៀតសម្រាប់ជនជាតិអ៊ុយក្រែន គឺការកាត់ផ្តាច់ជំនួយអាម៉េរិកដ៏ច្រើនដែលនាំ​មក​សម្រាប់ទីក្រុងគៀវ។ CNN រំឭកថា ក្រោមរដ្ឋកាលរបស់លោកបាយឌិន សហរដ្ឋអាម៉េរិក បានផ្តល់រាប់សិបពាន់លានដុល្លារជាជំនួយសម្រាប់អ៊ុយក្រែន នៅក្រោមទម្រង់ជាសព្វាវុធ និង​ជំនួយថវិកា។ រដ្ឋបាលលោកក៏ត្រៀមបន្តនាំមកនូវជំនួយដ៏ច្រើនដែលអាចទៅរួច​សម្រាប់​ទីក្រុងគៀវមុននឹងការចូលកាន់មុខងាររបស់លោកដូណាល់ ត្រាំ។​

សារព័ត៌មាន ឌឹ គៀវអ៊ីនដឺផិនដិន សរសេរថា ប្រសិនបើលោកដូណាល់ ត្រាំ កាត់​បន្ថយ​ការ​គាំទ្រអ៊ុយក្រែន សេដ្ឋកិច្ចអាម៉េរិក នឹងទទួលរង​វិបាក ដោយសារតែឧស្សាហកម្មកាពារ​ជាតិ​អាម៉េរិក ទទួលបានច្រើនជាង ៥០ពាន់លានដុល្លារក្នុងការវិនិយោគចាប់តាំងពីការ​ចាប់​ផ្តើម​នៃ​ការ​​ឈ្លានពានរបស់រុស្ស៊ីលើអ៊ុយក្រែន។

អាមុកសឺលីន Ms 500