ច្រកអ័រមូស នុយក្លេអ៊ែរ អ្វីដែលគេដឹងអំពីលទ្ធភាពនៃកិច្ចព្រមព្រៀងរវាងអ៊ីរ៉ង់ និង សហរដ្ឋអាម៉េរិក
កាលពីថ្ងៃអាទិត្រ ទី២៤ ខែឧសភា ប្រធានាធិបតីអាម៉េរិក លោកដូណាល់ ត្រាំ បានបន្ថយក្តីសង្ឃឹមអំពីកិច្ចព្រមព្រៀងដែលខិតជិតមកដល់ និងនិយាយថា មិនចង់ប្រញាប់ពេកនោះទេ។
ចំណែកក្រសួងការបរទេសអ៊ីរ៉ង់ បានបង្ហាញថាមានការស្របគ្នាលើផ្នែកដ៏ធំនៃបញ្ហាទាំងឡាយដែលកំពុងពិភាក្សា ប៉ុន្តែបដិសេធចោលអំពីគំនិតដែលថា កិច្ចព្រមព្រៀងមួយខិតជិតមកដល់។
តើចំនុចអ្វីខ្លះដែលគេដឹងថា ភាគីទាំងពីរហាក់ដូចជាព្រមព្រៀង និងចំណុចណាខ្លះទៀត ដែលហាក់ដូចជាជំទាស់គ្នា?
អ្នកនាំពាក្យក្រសួងការបរទេសអ៊ីរ៉ង់ លោកអេស្មៃអ៊ីល បាហ្គៃ បានឲ្យគេដឹងកាលពីថ្ងៃសៅរ៍ថា បញ្ហានុយក្លេអ៊ែរ មិនទាន់រាប់បញ្ចូលទេនូវដំណាក់កាលនេះ អំពីពិធីការនៃកិច្ចព្រមព្រៀងដែលកំពុងពិភាក្សា និងថា ពួកវា នឹងត្រូវលើកឡើងនៅអំឡុងកិច្ចចរចាដាច់ដោយឡែក។
ប៉ុន្តែសារព័ត៌មាន ញូយ៉ក ថែមស៍ (New York Times) ដែលស្រង់សំដីមន្រ្តីជាន់ខ្ពស់អាម៉េរិក ២នាក់ ដែលសូមមិនបញ្ចេញឈ្មោះ បានបញ្ជាក់ថា ចំនុចកណ្តាលនៃកិច្ចព្រមព្រៀងនេះនឹងជាការប្តេជ្ញាចិត្តរបស់ទីក្រុងតេអេរ៉ង់ដើម្បីបោះបង់ចោលស្តុកអ៊ុយរ៉ានីញ៉ូមដែលបានចម្រាញ់កម្រិតខ្ពស់របស់ខ្លួន។
សារព័ត៌មានប្រចាំថ្ងៃរបស់អាម៉េរិកមួយនេះ បន្ថែមថា ទោះយ៉ាងណា វិធីសាស្ត្រ ដែល សាធារណរដ្ឋអ៊ីស្លាមត្រូវអនុវត្ត នឹងត្រូវបានលើកឡើងក្នុងវគ្គចរចាថ្មីមួយស្តីអំពីកម្មវិធីនុយក្លេអ៊ែររបស់អ៊ីរ៉ង់។
ចំណែកទីភ្នាក់ងារសារព័ត៌មានអ៊ីរ៉ង់ ហ្វា (Fars) និង តាស្នីម (Tasnim) បញ្ជាក់ថា បញ្ហាពាក់ព័ន្ធទៅនឹងនុយក្លេអ៊ែរនឹងត្រូវចរចាក្នុងអំឡុង ៦០ថ្ងៃ បន្ទាប់ពីការចុះហត្ថលេខាលើពិធីការនៃកិច្ចព្រមព្រៀង។ ហើយបើយោងតាមទីភ្នាក់ងារសារព័ត៌មានហ្វា បានឲ្យដឹងថា អ៊ីរ៉ង់មិនបានសន្យានៅក្នុងកិច្ចព្រមព្រៀងនេះដើម្បីប្រគល់ស្តុកនុយក្លេអ៊ែរ ដកចេញនូវឧបករណ៍ បិទរចនាសម្ព័ន្ធរោងចក្រ ឬក៏មិនផលិតគ្រាប់បែកនុយក្លេអ៊ែរនោះទេ។
នាយករដ្ឋមន្រ្តីអ៊ីស្រាអែល លោកបេនចាម៊ីន ណេតាន់យ៉ាហ៊ូ បានបញ្ជាក់ថា លោកព្រមព្រៀងជាមួយលោកដូណាល់ ត្រាំ ថា រាល់កិច្ចព្រមព្រៀងចុងក្រោយជាមួយអ៊ីរ៉ង់នឹងត្រូវបំបាត់ចោលទាំងស្រុងនូវការគំរាមកំហែងនុយក្លេអ៊ែររបស់ប្រទេសនេះ។
សម្រាប់ការបើកច្រកសមុទ្រអ័រមូសឡើងវិញ ដែលត្រូវបិទតាមសភាពជាក់ស្តែងដោយអ៊ីរ៉ង់ ចាប់តាំងពីការចាប់ផ្តើមនៃសង្រ្គាមដែលបង្កឡើងដោយសហរដ្ឋអាម៉េរិក និងអ៊ីស្រាអែល កាលពីថ្ងៃទី២៨ ខែកុម្ភៈ ក៏ជាចំនុចកណ្តាលនៃកិច្ចពិភាក្សាផងដែរ។ ការរាំងខ្ទប់ស្ទើតែទាំងស្រុងនូវច្រកសមុទ្រនេះ ដែលជាច្រកឆ្លងកាត់មុនសង្រ្គាមនូវឥន្ធនៈ ២០% សម្រាប់ការប្រើប្រាស់នៅលើពិភពលោក បានធ្វើឲ្យតម្លៃប្រេងហក់ឡើង និងធ្វើឲ្យសេដ្ឋកិច្ចពិភពលោករំជើបរំជួល។ មុនការប្រទូស្តរាយ នាវានានាបានឆ្លងកាត់ទីនោះដោយសេរី។
កាលពីថ្ងៃសៅរ៍ លោកដូណាល់ ត្រាំ បានលើកឡើងថា ការសម្របសម្រួលមួយត្រូវបានពិភាក្សាយ៉ាងទំលំទូលាយ ដែលគ្រោងបើកច្រកសមុទ្រ។ សារព័ត៌មានតាស្នីម បញ្ជាក់ថា ៖ “លក្ខន្តិកៈនៃច្រកសមុទ្រអ័រមូសនឹងមិនវិលត្រឡប់មកកាន់ស្ថានភាពមុនសង្រ្គាមវិញឡើយ។” ពាក់ព័ន្ធនឹងការបិទខ្ទប់របស់អាម៉េរិកលើកំពង់ផែអ៊ីរ៉ង់ ទីភ្នាក់ងារព័ត៌មានតាស្នីម បានឲ្យដឹងថា វានឹងត្រូវដកចេញវិញទាំងស្រុងក្នុងរយៈពេល ៣០ថ្ងៃ។ ប៉ុន្តែកាលពីថ្ងៃអាទិត្យ លោកដូណាល់ ត្រាំ បានថ្លែងថា ការរាំងខ្ទប់នេះស្ថិតនៅចូលជាធរមានពេញលេញនៅខណៈដែលកិច្ចព្រមព្រៀងមួយមិនទាន់បានចុះហត្ថលេខាទេនោះ។
Daily Program
