ចិន បញ្ជាក់ជំហរក្នុង​ការ​បន្ត​គាំទ្រ​ដល់កម្ពុជា ផ្ទុយពីការ​ផ្សាយ​របស់​សារព័ត៌មានមួយចំនួន​

នាព្រឹកថ្ងៃទី​១៨ ខែធ្នូ ឆ្នាំ​២០២៤នេះ លោក វ៉ាង វិនពីន ឯកអគ្គរដ្ឋទូតចិនប្រចាំនៅកម្ពុជា បាន​បញ្ជាក់​ជាថ្មីពី​ជំហរបន្តគាំទ្រកម្ពុជា ក្នុងការកសាងគម្រោងហេដ្ឋារចនាសម្ព័ន្ធ និងជំនួយថ្មីៗកំពុងតែដំណើរការ។

លោកបាន​បញ្ជាក់ដូចនេះ​តាមរយៈ​បណ្តាញសង្គម​ហ្វេសប៊ុករបស់​លោក។

លោកបាន​លើកឡើងថា ៖ «ជំនួយរបស់ចិនមកកាន់កម្ពុជាទទួលបានសមិទ្ធផលផ្លែផ្កាជាច្រើនអនេក គម្រោងជំនួយថ្មីៗក៏កំពុងតែដំណើរការ។ ភាគីចិននឹងបន្តគាំទ្រយ៉ាងមុតមាំដល់ភាគីកម្ពុជាក្នុងការកសាងគម្រោងហេដ្ឋារចនាសម្ព័ន្ធពាក់ព័ន្ធនឹងផែនការជីវភាពរស់នៅរបស់ប្រជាជន»។

លោក វ៉ាង វិនពីន បានបញ្ជាក់ថា ៖ «រាល់បំណងប៉ុនប៉ងលាបពណ៌លើកិច្ចសហប្រតិបត្តិរវាងចិននិងកម្ពុជា គឺមិនអាចទៅរួចបានឡើយ»។

ទាក់ទងនឹង​ចំណុចនេះដែរ កាលពីថ្ងៃទី១៥ ខែធ្នូ ឆ្នាំ២០២៤ លោក មាស សុខសេនសាន រដ្ឋលេ​ខាធិការ និងជាអ្នកនាំពាក្យក្រសួងសេដ្ឋកិច្ច និងហិរញ្ញវត្ថុ ក៏បាន​ថ្លែង​ឡើងដែរថា ទំនាក់ទំនងរវាងប្រទេសទាំងពីរគឺជាទំនាក់ទំនងដែលបន្តមានការស្អិតរមួតដែលត្រូវបានពង្រឹងតាមរយៈការ​វិនិយោគ​តាមរយៈកិច្ចសហប្រតិបត្តិការនានាដែលមានជាធរមាន។

លោកថា ៖ «ខ្ញុំសូមបញ្ជាក់ដែរថា នៅពេលថ្មីៗនេះ យើងមាន​គម្រោងជាច្រើនរវាងប្រទេសទាំងពីរដែលបន្តត្រូវពិនិត្យ និង​ត្រូវ​ចុះកិច្ច​ព្រមព្រៀង​នៅក្នុង​ក្របខណ្ឌនៃកិច្ច​សហប្រតិបត្តិការ និង​ក្របខណ្ឌ​នៃការចុះ​កិច្ចព្រមព្រៀងហិរញ្ញប្បទានឥតសំណង រាប់ទាំងសម្បទានជាច្រើនទៀត​ដែលយើងគ្រោងនឹង​មានជាមួយគ្នា»។

ពាក់ព័ន្ធនឹងព័ត៌មានដែល​ផ្សព្វផ្សាយថាចិនឈប់​ផ្តល់កម្ចីគឺ​​លោក មាស សុខសេនសាន ថាលោកដូចជាអស់សំណើចដែលគម្រោងទាំងនេះកំពុង​តែសិក្សាអំពីសមិទ្ធិលទ្ធភាព និងសិក្សាពី​ផលប៉ះពាល់ទាំងសេដ្ឋកិច្ច និងសង្គម មុនពេល​ឈានដល់ការ​ចុះកិច្ចព្រមព្រៀងនៅពេលឆាប់ៗខាងមុខនេះ តែបែរជាមានព័ត៌មានថាកម្ពុជា​ពុំមាន​ទទួកម្ចី។

លោកថ្លែងថា ៖ «ខ្ញុំគិតថានេះជាព័ត៌មានបំភាន់សាធារណៈមតិជាច្រើនបងប្អូនប្រជាពលរដ្ឋអាចច្រឡំ ហើយដែលខ្ញុំយកឱកាសនេះដើម្បីបញ្ជាក់ថាយើងមានទំនាក់ទំនងជាមួយគ្នា ជាពិសេស​នៅក្នុង​ទស្ស​នកិច្ច​របស់ថ្នាក់ដឹកនាំកំពូលរបស់យើង​ សម្តេចតេជោ ដែលទើបតែបញ្ចប់ទស្សនកិច្ច​ថ្មីៗនៅប្រទេសចិនផងដែរ»៕