កាលពីថ្ងៃទី២ ខែកក្កដានេះ ព្រះសហគមន៍កាតូលិកនៅព្រៃវែងសហការជាមួយក្រុមគ្រូពេទ្យ និងនិស្សិតស្ម័គ្រចិត្តមកពីសាកលវិទ្យាល័យកាតូលិកប៊ូសាននៃសាធារណរដ្ឋកូរ៉េខាងត្បូង បានររៀបចំកម្មវិធីពិនិត្យជំងឺជូនដល់ប្រជាពលក្នុងទីរួមខេត្តព្រៃវែង នៅមណ្ឌលសុខភាពសង្កាត់តាកោ។
ពិធីបើកសកម្មភាពនេះ ធ្វើឡើងក្រោមអធិបតីភាពរបស់លោក សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម លោកស្រី ហ៊ន់ សុធារី អភិបាលរងនៃគណៈអភិបាលខេត្តព្រៃវែង លោក ម៉ននី បណ្ឌិត អភិបាលក្រុងព្រៃវែង មន្ត្រីរាជការ និងប្រជាពលរដ្ឋជាច្រើនចូលរួម។
ក្នុងពេលបើកកម្មវិធី លោកអភិបាល សិលា សួន ហង្សលី បានថ្លែងទៅកាន់អង្គពិធីថា ទោះបីសង្គមជឿនលឿនយ៉ាងណា ក៏ពិភពលោកនេះនៅតែមានការលំបាកជាច្រើន ហើយការលំបាកទាំងនោះ អាចបណ្តាលមកពីសុខភាពមិនល្អ បញ្ហាជីវភាពក្រីក្រ និងកត្តាជាច្រើនទៀតដែលកើតមាននៅក្នុងជីវិតប្រចាំថ្ងៃ។
លោកសង្ឃឹមថា «សកម្មភាពទាំងឡាយដែលយើងធ្វើពិធីបើកនៅថ្ងៃនេះ នឹងមានដំណើរការល្អ និងទទួលបាននូវលទ្ធផលដ៏ជាទីគាប់ចិត្ត សម្រាប់ជាប្រយោជន៍ដល់ប្រជាពលរដ្ឋយើង»។
លោកបន្តទៀតថា កម្មវិធីនេះអាចដំណើរការទៅបានដោយសារមានកិច្ចសហប្រតិបត្តិការពីអាជ្ញាធរតាំងពីថ្នាក់ខេត្ត រហូតដល់ភូមិ។ លោកអភិបាលបានថ្លែងអំណរគុណយ៉ាងជ្រាលជ្រៅចំពោះការគាំទ្រនិងហសហការនេះ ដើម្បីឲ្យកម្មវិធីកើតមានឡើង។
កម្មវិធីពិនិត្យសុខភាពនេះ ធ្វើឡើងពីថ្ងៃទី០២ ដល់ថ្ងៃទី០៥ ខែកក្កដា ដែលមានគ្រូពេទ្យជំនាញមាន ៤នាក់
លោកគ្រូ អ្នកគ្រូខាងសាលាប៊ូសានចំនួន១៦នាក់ និស្សិតស្ម័គ្រចិត្តចំនួន៤០នាក់ ដែលដឹកនាំដោយ លោក ឈែ សុងមីន នាយកកិច្ចកានិស្សិតនៃសាកលវិទ្យាល័យប៊ូសាន។
ក្នុងឱកាសនោះដែរ លោកស្រី ហ៊ន់ សុធារី អភិបាលរងនៃគណៈអភិបាលខេត្តព្រៃវែង បានស្វាគមន៍និងបានថ្លៃងអំណរគុណយ៉ាងជ្រាលជ្រៅ ចំពោះសាកលវិទ្យាល័យកាតូលិកប៊ូសាន ដែលបានរៀបចំឲ្យមានការពិនិត្យ និងព្យាបាលជំងឺ ដោយឥតគិតថ្លៃ ជូនប្រជាពលរដ្ឋដែលមានជីវភាពខ្វះខាតអាចពិនិត្យនិងព្យាបាលជំងឺ និងទទួលបាននូវសុខភាពល្អប្រសើរ ដើម្បីប្រកបមុខរបរប្រចាំថ្ងៃ បង្កើនជីវភាពគ្រួសារ។
តាមការគ្រោងទុក ក្នុងរយៈពេល៣ថ្ងៃនេះ ក្រុមគ្រូពេទ្យនឹងពិនិត្យជូនប្រជាពលរដ្ឋក្នុងក្រុងព្រៃវែងនៅមណ្ឌលសុខភាពសង្កាត់តាកោប្រមាណជាង៤០០នាក់។ ហើយក្រុមនិស្សិតក៏មានសកម្មភាពមួយចំនួនទៀត នៅតាមសាលារៀននៅក្នុងខេត្តព្រៃវែង ដូចជា៖ ការលាបថ្នាំបណ្ណាល័យ និងដឹកនាំកុមារលេងល្បែងកំសាន្ត ព្រមទាំងជូនកាដូដល់កុមារ ជាពិសេសការអប់រំអំពីសុខភាពស្ត្រីដល់សិស្សនារីៗ៕
ដោយម៉េងភីឡុង
Daily Program
