មន្ទីរពេទ្យមានពោរពាសដោយអ្នកជំងឺ និងរបួស និងអ្នករបួសជាច្រើនត្រូវបានព្យាបាលនៅផ្ទះ ដោយពួកគេត្រូវបាញ់ដោយគ្រាប់កាំភ្លើងពិត។ គ្រួពេទ្យនានាពិព៌នាអំពីការបង្រ្កាបដោយ ហិង្សាហួសហេតុ ដែលបានធ្វើឲ្យមនុស្សជាច្រើនស្លាប់ និងរបួសធ្ងន់ធ្ងរ នៅអ៊ីរ៉ង់។
សារព័ត៌មានហ្វ្រ៉ង់២៤ FRANCE24 បានធ្វើការសម្ភាសន៍គ្រូពេទ្យជាច្រើនដែលបានចាកចេញពីអ៊ីរ៉ង់។ គ្រូពេទ្យទាំងនេះ បានត្រូវចល័តទៅព្យាបាលអ្នករបួសនាល្ងាចថ្ងៃទី៨ និងថ្ងៃទី៩ ខែមករា នៅអំឡុងពេលដែលការតវ៉ាប្រឆាំងនឹងរបបតេអេរ៉ង់ បានកើនឡើងដល់កំពូល និងការបង្ក្រាបដ៏ឃោរឃៅរបស់អាជ្ញាធរ ទៅលើក្រុមបាតុករ។
ការរៀបរាប់របស់ពួកគេស្រដៀងគ្នា។ គ្រូពេទ្យបានពិព៌នាអំពីឆាកនៃភាពចលាចលក្នុងទ្រង់ទ្រាយមិនធ្លាប់មានពីមុន ដែលត្រូវបានវាយតម្លៃថា សឹងតែជាថ្ងៃរលាយពិភពលោក និងជាសោកនាកម្មនៃអ្នករបួសដោយសង្រ្គាម។ គ្រឹះស្ថានវេជ្ជសាស្រ្តនានាត្រូវបានជន់ជោរដោយមនុស្សភ្លាមៗ។ មនុស្សរាប់សិបនាក់ត្រូវបានបញ្ជូនចូលកន្លែងមួយៗ។ ក្រុមវេជ្ជបណ្ឌិត និងគ្រូពេទ្យបានរៀបរាប់អំពីការផ្តល់ការព្យាបាលក្នុងភាពបន្ទាន់ខ្លាំង ដោយសារតែភាពធ្ងន់ធ្ងរនៃអ្នករបួសជាច្រើនពេក។
គ្រូពេទ្យម្នាក់ បានរៀបរាប់ថា ពេលនោះជាល្ងាចថ្ងៃព្រហស្បតិ៍ ថ្ងៃទី៨។ ពួកគេមិនមានអ៊ីនធឺណិត។ ការទំនាក់ទំនងត្រូវបានកាត់ផ្តាច់។ ដូច្នេះវាមានការស្មុគស្មាញខ្លាំងណាស់សម្រាប់គ្រូពេទ្យដើម្បីមកជាបន្ទាន់ធ្វើការព្យាបាលលំហូរមនុស្សចូលមកដែលសុទ្ធសឹងជាអ្នករងរបួសដោយត្រូវគ្រាប់ពិត។ គ្រួពេទ្យរូបនេះ បានរៀបរាប់ដែរថា ប្រឈមមុខនឹងស្ថានភាពដ៏គ្រោះថ្នាក់នេះ ការរួបរួមសាមគ្គីភាពបានបង្ហាញឡើង។ ពេទ្យឯកជន ដែលធម្មតាមានតម្លៃថ្លៃ ក៏បានបើកទ្វារទទួលអ្នករបួស។ ពេទ្យឯកជនក៏ជន់ជោរដោយមនុស្សដែរ។ ពួកគេមិនបានបដិសេធនរណាម្នាក់ទេ ហើយការព្យាបាលគឺមិនយកកម្រៃ។ ក្រុមគ្រួពេទ្យនិយាយថា ពួកគេមិនចង់បានលុយទេ។ ការព្យាបាលនឹងត្រូវផ្តល់ឲ្យសម្រាប់ទាំងអស់គ្នា។
លោកវេជ្ជបណ្ឌិតម្នាក់ បានបញ្ជាក់ថា អ្នករបួសដែលមកនៅរាត្រីថ្ងៃព្រហស្បតិ៍នោះ គឺមានគ្រប់វ័យ។ មានដូចជាបុរសវ័យ ៧០ឆ្នាំ មួយរូប ដែលត្រូវរបួសខ្នង ប៉ុន្តែក៏មានក្មេង និងយុវជនអាយុ ១៤ឆ្នាំ ផងដែរ។ ចំណែកសភាពរបួស គឺភាគច្រើនប្រមូលផ្តុំលើ ក្បាល មុខ ពោះ ខាងក្រោមពោះ និងចំហៀងខ្លួន។
គ្រួពេទ្យម្នាក់ទៀត បាននិយាយដែរថា ចាប់តាំងពីថ្ងៃព្រហស្បតិ៍នោះមក ប្រភេទនៃរបួសបានផ្លាស់ប្តូរ។ គឺសុទ្ធសឹងតែគ្រាប់កាំភ្លើងពិត ដែលគេបានគេបាញ់។ វាកើតឡើងដូចជា ពួកគេអ្នកបាញ់គឺជាកងកម្លាំងសន្តិសុខ ដែលបានទទួលបញ្ជាឲ្យបាញ់មនុស្សគ្រប់គ្នា ដូចក្នុងពេលសង្រ្គាម។ លោកគ្រូពេទ្យបាននិយាយបន្តថា ពេលនោះថ្ងៃសុក្រ លោកត្រូវបានហៅមក ហើយប្រាប់ថា មានអ្នករបួសម្នាក់បានមកដល់ដោយត្រូវគ្រាប់កាំភ្លើងពិត។ ហើយបន្ទាប់ពីពេលនោះ គឺមានតែគ្រាប់កាំភ្លើងពិតដែលត្រូវបានគេប្រើប្រាស់។ របួសដែលលោកឃើញផ្តល់ឲ្យលោកនូវអារម្មណ៍ថា អ្នករបួសព្យាយាមរត់គេច គេបាញ់ពួកគេមកពីខាងលើដោយមិនមានគោលដៅច្បាស់លាស់ នៅចំកណ្តាលហ្វូងមនុស្ស។
យោងតាមអង្គការនិទណ្ឌភាពអន្តរជាតិ Amnesty International ដែលបានទទួលវីដេអូ រូបថត និងសាក្សី បានបញ្ជាក់ថា កងកម្លាំងសន្តិសុខអ៊ីរ៉ង់ បានប្រើប្រាស់អាវុធសម្លាប់ពិតប្រាកដ ប្រើគ្រាប់កាំភ្លើង កាំភ្លើងយន្តស្វ័យប្រវត្តិ និងពាក់កណ្តាលស្វ័យប្រវត្តិ ហើយបាញ់តាមរបៀបបន្តជាប់គ្នា ដោយមិនមានការបែងចែកលើហ្វូងមនុស្ស។ អង្គការក្រៅរដ្ឋាភិបាលនេះ បានបញ្ជាក់ថា ភស្តុតាងបានបង្ហាញថា អាជ្ញាធរអ៊ីរ៉ង់បានធ្វើការសម្លាប់ក្នុងទ្រង់ទ្រាយធំ និងដោយខុសច្បាប់។
Daily Program
