យោងតាមការស៊ើបអង្កេតមួយបានឲ្យដឹងថា រវាងឆ្នាំ២០២៣ និង២០២៥ ទីក្រុងព្យុងយ៉ាង បានផ្គត់ផ្គង់ដល់ទីក្រុងមូស្គូ ច្រើនជាងពាក់កណ្តាលនៃគ្រប់រំសេវដែលត្រូវបានប្រើប្រាស់នៅលើសមរភូមិអ៊ុយក្រែន។
រថពាសដែកកូរ៉េខាងជើងដែលបន្តកន្ទុយរាប់រយគ្រឿងត្រូវបានដឹកនាំតាមរថភ្លើងលើចម្ងាយផ្លូវរាប់ពាន់គីឡូម៉ែត្រ ដើម្បីបំពេញឃ្លាំងសព្វាវុធនៅប្រទេសរុស្ស៊ី។ ចាប់តាំងពីជិត ២០ខែ មកហើយ ទិដ្ឋភាពនេះគឺមានជាទូទៅនៅលើខ្សែផ្លូវដែករបស់រុស្ស៊ី។
យោងតាមការស៊ើបអង្កេតមួយដែលដឹកនាំដោយទីភ្នាក់ងារសារព័ត៌មានរ័យទ័រ និងសហការ ជាមួយអង្គភាពពិនិត្យ Open Source Center (OSC) បានឲ្យដឹងថា ប្រទេសកូរ៉េខាងជើងនឹងផ្គត់ផ្គង់ធនធានដែលចាំបាច់សម្រាប់កាំភ្លើងធំរុស្ស៊ីដើម្បីដឹកនាំសង្រ្គាមប្រឆាំងនឹងអ៊ុយក្រែនជាពិសេស គ្រាប់រាប់លានគ្រាប់។
ការផ្គត់ផ្គង់នេះដែលរួមទាំងមានការបញ្ជូនកងកម្លាំងកូរ៉េខាងជើង បានបង្កើតសារប្រយោជន៍ដ៏សំខាន់សម្រាប់រុស្ស៊ី ដែលធ្វើឲ្យពួកគេអាចដណ្តើមយកទីក្រុងគូស្ក៍ បន្ទាប់ពីការវាយប្រហារដណ្តើមយកដោយអ៊ុយក្រែននៅខែសីហា ឆ្នាំ២០២៤។ នៅខណៈដែលរុស្ស៊ីដឹកនាំសង្រ្គាមបង្ហិនបង្ហោចធនធានដែលអ៊ុយក្រែនលំបាកនឹងតាម ហើយកាន់តែលំបាក់នៅពេលអ៊ុយក្រែនបាត់បង់សម្ព័ន្ធមិត្តអាម៉េរិក ការស៊ើបអង្កេតក៏បង្ហាញអំពីវិសាលភាពនៃការពឹងផ្អែករបស់ទីក្រុងមូស្គូពីសំណាក់ការគាំទ្ររបស់កូរ៉េខាងជើង។
គឺចាប់តាំងពីការវាយទម្លុះរបស់អ៊ុយក្រែនទៅលើទីក្រុងគូស្ក៍ ភាគខាងលិចនៃប្រទេសរុស្ស៊ី ដែលគេចាប់ផ្តើមឮនិយាយអំពីទាហានកូរ៉េខាងជើងនៅលើសមរភូមិ។ ជាសរុប ទីក្រុងព្យុងយ៉ាង បានបញ្ជូនទាហាន ១៤០០០នាក់ ដែលរួមមានការពង្រឹងកម្លាំង ៣០០០នាក់បន្ថែមមកជួយរុស្ស៊ី កាលពីពាក់កណ្តាលខែកុម្ភៈ។
យោងតាមព័ត៌មានដែលបានមកពីទាហានដែលទីក្រុងគៀវចាប់បាន បានឲ្យដឹងថា ទាហានកូរ៉េខាងជើងត្រូវបានប្រើប្រាស់ជាកងអង្គភាពទទួលបន្ទុកវាយប្រហារទៅមុខ នៅខណៈដែលនៅពីក្រោយពួកគេ គឺកងអង្គភាពរបស់ទាហានសហព័ន្ធរុស្ស៊ី ដែលនៅពង្រឹងកម្លាំង និងគ្រប់គ្រងទីតាំង។
ជំនួយរបស់ទីក្រុងព្យុងយ៉ាងដទៃទៀត គឺជាការចាក់បញ្ចូលសព្វាវុធមកកាន់រុស្ស៊ី។ នៅរវាងខែកញ្ញា ឆ្នាំ២០២៣ និងខែមីនា ឆ្នាំ២០២៥ កុងតឺន័រ ជិត ១៦០០០ និងគ្រាប់រំសេវរាប់លានគ្រាប់របស់កូរ៉េខាងជើង បានមកដល់ទីតាំងសមរភូមិមុខដោយតាមក្បួនដឹកជញ្ជូនដ៏ច្រើន ទាំងតាមផ្លូវទឹក និងផ្លូវដែក។
ការស៊ើបអង្កេតឈលើមូលដ្ឋាននៃការដឹកជញ្ជូនតាមផ្លូវគោក ការសិក្សាអំពីរបាយការណ៍កាំភ្លើងធំរុស្ស៊ី រូបភាពតាមផ្កាយរណប បណ្តាញសង្គម ព្រមទាំងប្រភពពីយោធាអ៊ុយក្រែនផងដែរ។ ”នាវានានាបានដឹកជញ្ជូនគ្រឿងសព្វាវុធរបស់កូរ៉េខាងជើង បានមកកាន់កំពង់ផែវ៉ូស្តូចនី និងឌូណៃ មុននឹងពួកវាត្រូវដឹកជញ្ជូនតាមរថភ្លើងឆ្ពោះមកកាន់ឃ្លាំងគ្រាប់នៅជិតប្រទេសអ៊ុយក្រែន។”
លោកហូហ្វ ហ្គ្រ៊ីហ្វីត ដែលជាអ្នកឯកទេសដែលទទួលបន្ទុកតាមដានទណ្ឌកម្មប្រឆាំងនឹងកូរ៉េខាងជើងប្រចាំនៅអង្គការសហប្រជាជាតិ រវាងឆ្នាំ២០១៤ និងឆ្នាំ២០១៩ បានធ្វើសង្ខេបថា ៖ “ប្រសិនបើគ្មានការគាំទ្រពីប្រធានាធិបតីគីម ជុងអ៊ុន ប្រធានាធិបតីវ៉្លាឌីមៀ ពូទីន នឹងមិនមានវិធីដឹកនាំសង្រ្គាមនៅអ៊ុយក្រែនទៀតឡើយ”។
សារព័ត៌មានរ័យទ័រ បានធ្វើសង្ខេបថា ចាប់តាំងពីឆ្នាំ២០២៣ នៅខណៈដែលជម្លោះនៅអ៊ុយក្រែនប្រែក្លាយទៅជាសង្រ្គាមដ៏បង្ហិនបង្ហោច ការបាញ់កាំភ្លើងធំ និងគ្រាប់ត្បាល់ បានក្លាយជាចាំបាច់ដើម្បីថែរក្សាដែនដី និងបណ្តេញសត្រូវចេញពីទីតាំងការពារ។
Daily Program
