ក្រុម​គ្រូពេទ្យ​កាតូលិក​កូរ៉េ ​ពិនិត្យជំងឺជូន​ប្រជាពលរដ្ឋ​នៅខេត្តព្រៃវែង ដោយឥតគិតថ្លៃ​

ព្រះសហគមន៍កាតូលិក​នៅ​កម្ពុជា​សហការ​ជាមួយ​ក្រុម​គ្រូពេទ្យ និងនិស្សិតស្ម័គ្រចិត្ត​មកពីសាកលវិទ្យាល័យកាតូលិកប៊ូសាន​នៃសាធារណរដ្ឋកូរ៉េ​ បាន​ររៀបចំ​កម្មវិធី​​ពិនិត្យ​ជំងឺ​ជូន​​​ប្រជាពលរដ្ឋ​ នៅ​ម​ណ្ឌលសុខភាពសង្កា​ត់តាកោ នា​ទីរួម​ខេត្ត​ព្រៃវែង ​កាលពីថ្ងៃទី​២​ ខែ​កក្កដាកន្លងទៅនេះ។

ពិធីនេះ ធ្វើ​ឡើង​ក្រោម​អធិបតីភាព​លោក សិលា សួន ហង្សលី អភិបាលព្រះសហគមន៍កាតូលិកភូមិភាគកំពង់ចាម លោកស្រី ហ៊ន់ សុធារី អភិបាលរងខេត្តព្រៃវែង លោក ម៉ននី បណ្ឌិត អភិបាលក្រុងព្រៃវែង រួមនឹង​មន្ត្រី​រាជការ និង​ប្រជាពលរដ្ឋ​​ជាច្រើន​ទៀត​។​

លោកអភិបាល សិលា សួន ហង្សលី បានថ្លែងថា ទោះបីសង្គមជឿនលឿនយ៉ាងណា ក៏ពិភពលោកនេះនៅតែមានការលំបាកជាច្រើន ហើយ​​ការលំបាកទាំងនោះ អាចបណ្តាលមកពីសុខភាពមិនល្អ បញ្ហាជីវភាពក្រីក្រ និងកត្តាជាច្រើនទៀត​ដែលកើតមាននៅក្នុងជីវិតប្រចាំថ្ងៃ។ ​

លោក​​​បានបន្តថា ៖ «សកម្មភាពទាំងឡាយដែលយើងធ្វើនាថ្ងៃនេះ នឹងមានដំណើរការល្អ និងទទួលបាននូវលទ្ធផលដ៏ជាទីគាប់ចិត្ត សម្រាប់ជាប្រយោជន៍ដល់ប្រជាពលរដ្ឋយើង»។​

លោកបន្តទៀតថា​ កម្មវិធីនេះអាចដំណើរការ​ទៅបាន​ដោយសារ​មាន​​កិច្ចសហ​ប្រតិបត្តិការពីអាជ្ញាធរ​តាំងពីថ្នាក់ខេត្ត រហូតដល់ភូមិ។ លោកអភិបាលក៏​បានថ្លែងអំណរគុណយ៉ាងជ្រាលជ្រៅចំពោះ​ការ​គាំទ្រ និង​​សហការ​នេះ ដើម្បី​ឲ្យ​កម្មវិធីកើតមានឡើង។​

ការ​ពិនិត្យ​សុខភាពនេះ ធ្វើឡើងពី​​ថ្ងៃទី២ ដល់ថ្ងៃទី៥ ខែកក្កដា ដែលមានគ្រូពេទ្យជំនាញ​ ៤នាក់ លោកគ្រូ អ្នកគ្រូខាងសាលាប៊ូសាន​ចំនួន​១៦នាក់ និស្សិតស្ម័គ្រចិត្ត​ចំនួន​​៤០នាក់ ដែល​​ដឹកនាំដោយ លោក ឈែ សុងមីន នាយកកិច្ចកានិស្សិតនៃសាកលវិទ្យាល័យប៊ូសាន​។ ​

ក្នុងឱកាសនោះដែរ លោកស្រី ហ៊ន់ សុធារី អភិបាលរងខេត្តព្រៃវែង បាន​ស្វាគមន៍ និង​បាន​ថ្លែងអំណរគុណចំពោះសាកលវិទ្យាល័យកាតូលិកប៊ូសាន ដែលបានពិនិត្យ និងព្យាបាលជំងឺ ដោយឥតគិតថ្លៃ ជូនប្រជាពល​រដ្ឋដែលមានជីវភាពខ្វះខាត ដែលពួកគេអាច​​ពិនិត្យ​និងព្យាបាលជំងឺ និងទទួ​លបាននូវសុខភាពល្អប្រសើរ។​

តាម​ការ​គ្រោងទុក ​ក្រុម​គ្រូពេទ្យ​នឹង​ពិនិត្យជំងឺ​ជូន​ប្រជាពលរដ្ឋ​ក្នុងក្រុងព្រៃវែង​នៅមណ្ឌលសុខភាពសង្កាត់តាកោ ​ប្រមាណជាង​៤០០នាក់។ ក្រុម​និស្សិត​ក៏​មាន​សកម្មភាព​មួយ​ចំនួន​ទៀត​ នៅតាម​សាលា​រៀន​នៅក្នុង​ខេត្ត​ព្រៃវែង​ ដូចជា៖ ការលាបថ្នាំបណ្ណាល័យ ​ការ​ដឹកនាំកុមារលេងល្បែងកំសាន្ត ព្រមទាំងជូនកាដូដល់កុមារ ជាពិសេសការអប់រំអំពីសុខភាពស្ត្រីដល់សិស្សនារីៗផងដែរ។

លោក ឈែ សុងមីន នាយកកិច្ចកានិស្សិតនៃសាកលវិទ្យាល័យប៊ូសាន​ បាន​ថ្លែង​ថា ពេលមកធ្វើសកម្មភាពនៅក្រុងព្រៃវែងនេះ មានអារម្មណ៍ថាសប្បាយចិត្តខ្លាំងណាស់ ដោយសាររាល់ពេលទៅមើលកូនសិស្ស ប្រជាជនក្នុងក្រុងព្រៃវែង។​

លោកបន្តថា ក្រុម​គ្រូពេទ្យ​មក​ពិនិត្យ​ជំងឺដល់ប្រជាពលរដ្ឋនេះមាន​​តែរយៈពេល​៣ថ្ងៃប៉ុណ្ណោះ ប៉ុន្តែតាមរយៈសកម្មភាពទាំងនេះបង្ហាញនូវ​សេចក្តីស្រលាញ់​រវាងគ្នាទៅវិញទៅមក។

លោកបានមានប្រសាសន៍ថា ៖ «វាជាឱកាសមួយដ៏ល្អ មួយវិញទៀតវាមិនមែន​ធ្វើតែម្តង​ក្នុងពេលនេះទេ តែត្រូវបន្ត​ធ្វើ​ជាមួយគ្នានៅពេល​ក្រោយទៀត។ ខ្ញុំសប្បាយចិត្តមែនទែន ដោយសារ​នៅពេលដែល​បានឃើញកូនសិស្ស និងប្រជាជននៅ​ខេត្តព្រៃវែង ពួកគេមានទឹកមុខ​ស្រស់ថ្លា និងធ្វើឱ្យ​ខ្ញុំមាន​អារម្មណ៍ល្អ មានក្តីសុខ»។​

​លោកបន្ថែមថា ​តាមរយៈសកម្មភាពនេះ លោកចង់ឲ្យនិស្សិតមានចិត្តទូលំទូលាយកាន់តែច្រើនជាង មិនមែនតែលើកនេះទេ រាល់ពេលមានឱកាស ពេលចេញទៅប្រទេសក្រៅ ពេលចូលរួមសកម្មភាពផ្សេងទៀតផងដែរ។​​

លោក ហ៊ីន ចន អាយុ ៦៥ ឆ្នាំ ដែលបានមកពិនិត្យ​សុខភាព បានប្រាប់ឱ្យដឹងថា លោកទទួលបាន​ថ្នាំមួយចំនួន​សម្រាប់​លេប​ ព្យាបាល​ជំងឹចុកពីចង្កេះទៅជើង។

លោកថា លោកពិតជាអរគុណដល់ក្រុមគ្រូពេទ្យ​កូរ៉េដែលបានមកពិនិត្យ និងចែកថ្នាំដល់រូបលោក និងប្រជាពលរដ្ឋ​ផ្សេងទៀត៕

ដោយ៖ ​ម៉េង ​ភីឡុង