ក្រុមឧទ្ទាមដែលគាំទ្រដោយប្រទេសរ៉ូវ៉ាន់ដា ដែលដណ្តើមបានទីក្រុងដ៏ធំបំផុតរបស់កុងហ្គោភាគខាងកើតបាននិយាយថា ពួកគេចង់ដណ្តើមយករដ្ឋធានី គិនសាសា (Kinshasa) របស់ប្រទេសសាធារណៈប្រជាធិបតេយ្យកុងហ្គោ។
បន្ទាប់ពីដណ្តើមបានទឹកដីភាគច្រើននៃទីក្រុង ហ្គោម៉ា ក្រុមឧទ្ទាម M23 ត្រូវបានគេរាយការណ៍ថាបានរុលទៅកាន់ទីរួមខេត្ត បាកាវូ ( Bukavu) ខាងត្បូង គីវូ (Kivu )ដែលបង្កឲ្យភ័យខ្លាច និងភ័យស្លន់ស្លោក្នុងចំណោមអ្នកស្រុក។
ភាពតានតឹងនៅអាហ្រ្វិកកណ្តាលកំពុងកើនឡើង ខណៈដែលប្រធានាធិបតីនៃសាធារណរដ្ឋប្រជាធិបតេយ្យកុងហ្គោអំពាវនាវឱ្យចល័តយោធាទ្រង់ទ្រាយធំដើម្បីទប់ទល់នឹងការបះបោរ ហើយរដ្ឋមន្ត្រីការពារជាតិរបស់គាត់បដិសេធការអំពាវនាវឱ្យមានការចរចា។
នៅពេលនេះក្រសួងការពារជាតិរបស់ប្រទេសនេះបានប្តេជ្ញាថា នឹងនៅប្រយុទ្ធប្រឆាំងនឹងក្រុមឧទ្ទាមជាជាងចូលចរចា ក្រោយពេលដែលក្រុមឧទ្ទាម បានកាន់កាប់ទីក្រុង ហ្គោម៉ាដែលជាទីក្រុងមានពលរដ្ឋជាង ៦លាននាក់។
ដោយមានការគាំទ្រដោយប្រទេសជិតខាង រ៉ូវ៉ាន់ដា ក្រុមឧទ្ទាមកំពុងបន្តការវាយប្រហាររបស់ពួកគេ ដើម្បីឈានទៅកាន់កាប់លើខេត្ត គីវូ ខាងត្បូង ដែលមានទីតាំងជាប់នឹងហ្គោម៉ា ហើយបាននិយាយថា ពួកគេនឹងបើកចំហសម្រាប់ការសន្ទនាជាមួយរដ្ឋាភិបាល ដែលស្នើឡើងដោយប្លុកតំបន់អាហ្វ្រិកខាងកើតដែលរ៉ូវ៉ាន់ដាក៏ជាសមាជិកផងដែរ។
ទន្ទឹមនឹងនេះ មេដឹកនាំប្រទេស រ៉ូវ៉ាន់ដា គឺលោក ប៉ូល កាហ្គេម ( Paul Kagame )បាននិយាយថា លោកបាននិយាយជាមួយប្រធានាធិបតីអង់ហ្គោឡា លោក ចូអាវ ឡូរ៉េនកូ ( Joao Lourenco) ដែលជាអ្នកសម្រុះសម្រួលក្នុងជម្លោះ ដែលបានជួបជាមួយមេដឹកនាំសាធារណរដ្ឋប្រជាធិបតេយ្យកុងហ្គោមួយថ្ងៃមុននេះ ហើយមេដឹកនាំទាំងពីរបានប្តេជ្ញាធ្វើការជាមួយប្រទេសអាហ្វ្រិកផ្សេងទៀត ដើម្បីដោះស្រាយបញ្ហានេះ៕
Daily Program
