ក្រុមលោកអភិបាលព្រះសហគមន៍មីយ៉ាន់ម៉ាអំពាវនាវឲ្យមានបទឈប់បាញ់ទូលំទូលាយមួយ

ក្រោយពេលមីយ៉ាន់ម៉ាបានរងគ្រោះដ៏ធ្ងន់ធ្ងរដោយសារតែគ្រោះរញ្ជួយដី ក្រុមសភាលោកអភិបាលនៃព្រះសហគមន៍កាតូលិក​ប្រទេសនេះ បានអំពាវនាវជាបន្ទាន់ឲ្យមានបទឈប់បាញ់ដ៏ទូលំទូលាយមួយ ដើម្បីសម្របសម្រួលជំនួយមនុស្សធម៌ទៅដល់ជនរងគ្រោះដោយគ្មានការរារាំង។​

ព្រះសហគមន៍កាតូលិកក្នុងប្រទេសមីយ៉ាន់ម៉ា ​ក្រោយពីបានអធិស្ឋានតាមបំណង​របស់​សម្តេចប៉ាប ហ្វ្រង់ស៊ីស្កូ កំពុងចូលរួមយ៉ាងសកម្ម ឆ្លើយតបនឹងគ្រោះរញ្ជួយដីកម្រិត ៧,៧ រ៉ិចទ័រកាលពី ថ្ងៃទី ២៨ ខែមីនា ឆ្នាំ ២០២៥ ដែលបណ្តាលឱ្យមនុស្សស្លាប់ជាច្រើនរយនាក់។​

ក្រុម​សភាលោកអភិបាលនៃព្រះសហគមន៍កាតូលិក​ប្រទេសនេះបានឲ្យដឹងថា ព្រឹត្តិការណ៍នៃសោកនាដកម្មនេះបានធ្វើឱ្យមីយ៉ាន់ម៉ាបានរងគ្រោះកាន់តែធ្ងន់ធ្ងរថែមទៀត។​

បញ្ហាមនុស្សធម៌នៅក្នុងប្រទេសនេះ បានចោទជាបញ្ហាហើយក្រោយរដ្ឋប្រហារ ប៉ុន្តែគ្រោះធម្មជាតិដ៏កម្រនេះ វារឹតតែធ្វើឲ្យមីយ៉ាន់ម៉ាកាន់តែដុនដាបបន្ថែមទៀត។​

តាមការប៉ាន់ស្មានរបស់អង្គការសហប្រជាជាតិ មនុស្សជិត ១០ លាននាក់ រួមទាំងកុមារ៦,៣ លាននាក់កំពុងត្រូវការជំនួយយ៉ាងខ្លាំង។

ព្រះសហគមន៍កាតូលិក នៅពេលនេះ កំពុងបញ្ជាក់ជំហរគាំទ្រឥតងាករេរបស់ខ្លួនសម្រាប់ប្រជាជនដែលរងផលប៉ះពាល់ និងផ្ញើសាររំលែកទុក្ខដល់គ្រួសារដែលបានបាត់បង់មនុស្សជាទីស្រឡាញ់របស់ពួកគេ។

មកដល់ពេលនេះ ក្រៅពីព្រះសហគមន៍ផ្ទាល់ ថ្នាក់ដឹកនាំសន្តអាសនៈនៅឯបុរីវ៉ាទីកង់ក៏បានផ្ញើសាររំលែកទុកជាបន្តបន្ទាប់។

មកដល់ពេលនេះអង្គការសហប្រជាជាតិ​កំពុង​កៀងគរ​ធនធាន​ ដើម្បី​ជួយ​សង្គ្រោះ​​ប្រជាជន​ដែល​រងគ្រោះ ដោយ​ទទួលស្គាល់​មី​យ៉ាន់​ម៉ា​ថា ​ជា​ប្រទេស​ដែល​រង​ផលប៉ះពាល់​ធ្ងន់ធ្ងរ​បំផុត​ក្នុង​វិបត្តិ​នេះ៕