ក្រុមចម្រៀងកុមារម៉ូណាកូ មកសម្តែងនៅកម្ពុជាជាលើកដំបូង ក្នុងខែកក្កដានេះ

ក្រុមចម្រៀងកុមារម៉ូណាកូ (Les Petits Chanteurs de Monaco) ដែលមានកេរ្តិ៍ឈ្មោះល្បីលើពិភពលោក នឹងបង្ហាញស្នាដៃដំបូងរបស់ពួកគេនៅប្រទេសកម្ពុជា នៅក្នុងខែកក្កដាខាងមុខនេះ។ នេះ​បើ​យោង​តាម​ខិតបណ្ណផ្សព្វ​ផ្សាយ​របស់​ក្រុម​នេះ។

ការសម្តែងនេះគឺជាផ្នែកមួយនៃដំណើរទេសចរណ៍នៅប្រទេសវៀតណាម និងកម្ពុជា ក្រោមការឧបត្ថម្ភរបស់​ព្រះអង្គម្ចាស់អាល់ប៊ែរ​នៃប្រទេសម៉ូណាកូ។

កម្មវិធីនេះនឹងប្រព្រឹត្តទៅនៅទីក្រុងសំខាន់ៗបីគឺ នៅ​សៀមរាប ថ្ងៃទី១៩ ខែកក្កដា នៅសណ្ឋាគារ Sofitel Angkor Phokeethra នៅខេត្ត​ព្រះសីហនុ នាថ្ងៃទី២១ ខែកក្កដា នៅសណ្ឋាគារ Novotel Sihanoukville Holiday Resort និង​នៅ​ភ្នំពេញ នាថ្ងៃទី២៣ ខែកក្កដា នៅសណ្ឋាគារ Sofitel Phnom Penh Phokeethra។

ការសម្តែងទាំងនេះនឹងចាប់ផ្តើមនៅម៉ោង ៦ ល្ងាច (ភ្នំពេញ៖ ម៉ោង ៦:៣០ល្ងាច) ក្នុងនោះ​មាន​បទចម្រៀងអំពី​សាសនា បទបុរាណ និងបទចម្រៀងដែលស្ថាព្រះហស្ត​របស់​ព្រះអង្គម្ចាស់រៃញេ​ទី៣ ដែល​ជា​ស្ថាបនិក​ក្រុមនេះនៅឆ្នាំ​១៩៧៤​។ ការសម្តែងជាពិសេសនេះត្រូវបានរៀបចំឡើងដើម្បីអបអរខួប ១០០ឆ្នាំរបស់​ព្រះអង្គ។

សំបុត្រចូលរួមមានតម្លៃ ៣០ ដុល្លារអាមេរិក សម្រាប់មនុស្សទូទៅ ខណៈដែលនិស្សិត និងកុមារអាយុក្រោម​១៨ ឆ្នាំអាចចូលរួមដោយឥតគិតថ្លៃ។ ការបរិច្ចាគបន្ថែមក៏ត្រូវបានស្វាគមន៍ផងដែរ។

ប្រភពដដែល​បាន​ឲ្យដឹងថា ប្រាក់ចំណូលពីការលក់សំបុត្រនឹងផ្តល់ជាឧបត្ថម្ភដល់មូលនិធិ «គន្ធាបុប្ផា» ដែលផ្តល់សេវាសុខាភិបាលឥតគិតថ្លៃ និងមានគុណភាពខ្ពស់ដល់កុមារទូទាំងប្រទេសកម្ពុជា។

ការសម្តែងនេះ​ មានការឧបត្ថម្ភ​​គាំទ្រពីដៃគូក្នុងស្រុក ដូចជា សាលារបាំ​របស់​សម្ដេចរាជបុត្រី ព្រះរៀម នរោត្តម បុប្ផាទេវី(សហការនៅក្នុងការសម្តែងភ្នំពេញ) ក្រុមអប់រំគួចម៉េងលី សាលាដុនបូស្កូកម្ពុជា សភាពាណិជ្ជកម្មអ៊ីតាលីនៅកម្ពុជា និង​ក្រុម​All Dreams Cambodia។

កម្មវិធីនេះក៏ជាផ្នែកមួយនៃយុទ្ធនាការ Sing to Lead: Cambodian Choir Conductors on the Road to the Royal Choral Award 2027 ដែលមានគោលបំណងរួមដ៏ធំមួយ​ ដើម្បី​លើកកម្ពស់សិល្បៈចម្រៀងជាក្រុមនៅកម្ពុជា។

ក្រុមចម្រៀងកុមារម៉ូណាកូ ត្រូវបានបង្កើតឡើងនៅឆ្នាំ ១៩៧៤ ជា​ក្រុម​ចម្រៀង​របស់​ព្រះសហគមន៍​កាតូលិក​របស់​ប្រទេស​ម៉ូណាកូ និងស្ថិតក្រោមការមើល​ថែរបស់ព្រះអង្គម្ចាស់អាល់ប៊ែរ។ ពួកគេត្រូវបានគេស្គាល់ថា ជាទូតវប្បធម៌នៃសន្តិភាព និងភាតរភាព តាមរយៈតន្ត្រី និងសិល្បៈ៕

ដោយ​ កែវ កញ្ញា