ក្រសួងកសិកម្ម នឹង​​ប្រារព្ធខួប១០០ឆ្នាំ ចម្ការកៅស៊ូចាស់ជាងគេនៅកម្ពុជា ​នៅសប្តាហ៍​ក្រោយនេះ

​គិតត្រឹមឆ្នាំ២០២៤ ចម្ការកៅស៊ូជាប្រវត្តិសាស្រ្តដែល​ស្ថិតនៅចម្ការកៅស៊ូជប់ ឃុំថ្មពេជ្រ ស្រុកត្បូងឃ្មុំ ខេត្តត្បូងឃ្មុំ មានអាយុ១០០ឆ្នាំហើយ ដែលជាចម្ការកៅស៊ូមានអាយុចាស់ជាងគេនៅកម្ពុជា និងមានចំនួនដើមកៅស៊ូចាស់នៅរស់ច្រើនជាងគេបំផុតនៅក្នុងពិភពលោក រហូតដល់ ៤៤៨ដើមលើផ្ទៃដីប្រមាណ ១៤ហិកតា។

ទាក់ទងនឹង​​កៅស៊ូដែល​មានអាយុ​១០០​ឆ្នាំនេះដែរ ក្រសួង​កសិកម្ម រុក្ខាប្រមាញ់ និង​នេសាទ ដែលដឹ​កនាំដោយ លោក ប្រាក់ ដាវីដ រដ្ឋលេខាធិការក្រសួង​កសិកម្ម, លោកស្រី​ អ៊ឹម រចនា អនុរដ្ឋលេខាធិការក្រសួង​កសិកម្ម, លោក ឃុន កក្កដា អគ្គនាយកស្តីទីនៃអគ្គនាយកដ្ឋានកៅស៊ូ និងសហការី កាលពីថ្ងៃទី៣ ខែធ្នូ បានចុះ​ពិនិ​ត្យទីតាំងឡូតិ៍កៅស៊ូសម្រាប់ររៀបចំកម្មវិធីប្រឡងចៀរជ័រ និងទីតាំងពិធីប្រារព្ធខួប១០០ឆ្នាំ ដើមកៅស៊ូចាស់ជាងគេនៅកម្ពុជា។

ក្នុងដំណើរបេសកកម្មនេះ លោក ប្រាក់ ដេវីដ បានពិនិត្យវឌ្ឍនភាពការងារបានរៀបចំកន្លងមក ការសាងសង់ស្លាកចារឹកឈ្មោះ ការកំណត់ទីតាំងវេទិកាពិធី លំដាប់លំដោយការងារ និងការត្រៀមថតផ្សព្វផ្សាយកម្មវិធីប្រឡងចៀរជ័រ និងពិធីប្រារព្ធខួប១០០ឆ្នាំ ចម្ការកៅស៊ូចាស់ជាងគេនៅកម្ពុជា ដែលនឹងរៀបចំនៅសប្តាហ៍ទី២ នៃខែធ្នូ ឆ្នាំ២០២៤ ខាងមុខនេះ។​​​

ក្រសួងកសិកម្ម រុក្ខាប្រមាញ់ និងនេសាទ បានសហការជាមួយក្រុមហ៊ុន សុភក្តិនីកា គ្រុប ខូ អិលធីឌី បាននិងកំពុងរៀបចំទីតាំងឡូតិ៍កៅស៊ូចាស់នេះឡើងវិញ ដើម្បីរៀបចំពិធីប្រារព្ធខួប១០០ឆ្នាំ ចម្ការកៅស៊ូចាស់ជាងគេនៅកម្ពុជា និងប្រែក្លាយជាផ្លូវការទៅជា សួនអភិរក្សដើមកៅស៊ូចាស់ជាងគេនៅកម្ពុជា (The Cambodian Oldest Rubber Tree Conservative Park) សម្រាប់គោលដៅស្រាវជ្រាវសេនេទិចកៅស៊ូនិងកសិទេសចរណ៍៕