កិច្ចចរចាថ្មី រវាងរុស្ស៊ី អ៊ុយក្រែន គ្រោងធ្វើនៅទីក្រុងអ៊ីស្តង់ប៊ូល

កាលពីថ្ងៃទី២១ ខែកក្កដា ប្រធានាធិបតីអ៊ុយក្រែនលោកវ៉ូឡូឌីមៀ ហ្សេឡេនស្គី បានប្រាប់ ឲ្យ ដឹង​ថា កិច្ចចរចាសន្តិភាពបន្ទាប់រវាងទីក្រុងមូស្គូ និងទីក្រុងគៀវ ធ្វើនៅថ្ងៃទី២៣ កក្កដា ក្រោយ ពី​កិច្ចចរចាពីរដងមុន​នៅទីក្រុងអ៊ីស្តង់ប៊ូលប្រទេសទួរគី ដោយមិនមានលទ្ធផល​ធំដុំដើម្បី បញ្ចប់​សង្រ្គាមរវាងប្រទេសទាំងពីរ។

នៅក្នុងសេចក្តីថ្លែងការណ៍ប្រចាំថ្ងៃ​ដែលផ្សព្វផ្សាយនៅលើបណ្តាញសង្គម លោកវ៉ូឡូឌីមៀ ហ្សេឡេនស្កី បានថ្លែងថា លោកបានពិភាក្សាជាមួយអគ្គលេខានៃក្រុមប្រឹក្សាសន្តិសុខ អ៊ុយក្រែន លោករូស្តេម អ៊ូម៉េរ៉ូវ អំពីការត្រៀមការផ្លាស់ប្តូរយោបល់ និងកិច្ចប្រជុំថ្មីនៅប្រទេស ទួរគីជាមួយភាគីរុស្ស៊ី។

ជំនួបនៅថ្ងៃទី២៣ កក្កដា មិនទាន់ត្រូវបានបញ្ជាក់ដោយវិមានក្រឹមឡាំងទេ។ អ្នកនាំពាក្យ វិមានក្រឹមឡាំងលោកឌីមីទ្រី ប៉េស្កូវ កាលពីព្រឹកថ្ងៃទី២១ ខែកក្កដា បានប៉ាន់ប្រមាណថា គេ នឹងត្រូវការការងារច្រើនដើម្បីទទូលបានវឌ្ឍនភាពនៃខ្លឹមសារសំណើសន្តិភាពដែលផ្ទុយគ្នា​ទាំងស្រុងរវាងប្រទេសទាំងពីរ។

ជំនួបពីរដងបន្តបន្ទាប់គ្នានៅទីក្រុងអ៊ីស្តង់ប៊ូល រវាងគណប្រតិភូរុស្ស៊ី និងអ៊ុយក្រែន ដែល រៀបចំឡើងក្រោមសំពាធរបស់ប្រធានាធិបតីអាម៉េរិក លោកដូណាល់​ ត្រាំ មិនបាននាំមកនូវ​វឌ្ឍន​ភាពអំពីបទឈប់បាញ់ទេ គឺដោះស្រាយបានតែការផ្លាស់ប្តូរអ្នក​ទោស​​​សង្រ្គាម និង​សាកសព​ទាហានដែលបានស្លាប់។

នៅអំឡុងកិច្ចចរចាប៉ុន្មានដងចុងក្រោយកាលពីខែមិថុនា ប្រទេសរុស្ស៊ីជាថ្មីម្តងទៀត បាន​បង្ហាញ​នូវ​ការទាមទារខ្ពស់បំផុត រួមបញ្ជូលទាំងអ៊ុយក្រែនត្រូវធ្វើសម្បទានតំបន់ចំនួន ៤ បន្ថែម​ពី​លើ​តំបន់​គ្រីមៀ ដែលត្រូវបានភ្ជាប់ជាឧបសម្ព័ន្ធទៅរុស្ស៊ីនៅឆ្នាំ២០១៤ ព្រមទាំង​ការ​បដិសេធ​រាល់​ជំនួយ​យោធាលោកខាងលិច និងការមិនឲ្យអ៊ុយក្រែនចូលជា​សមាជិកអង្គការ​ណាតូ​ផង​ដែរ។ អ៊ុយក្រែនបានបដិសេធនូវអ្វីដែលអ៊ុយក្រែនវាយតម្លៃថា នេះគឺជាការសម្រេច​ចិត្ត​មិនអាច​កែប្រែ​​បានរបស់រុស្ស៊ី និងដាក់ការសង្ស័យលើឆន្ទៈរបស់ទីក្រុងមូស្គូដើម្បីចរចាអំពី​ការ​​ឈប់បាញ់។

ប៉ុន្តែវិមានក្រឹមឡាំងបានបញ្ជាក់ថា ខ្លួនត្រៀមខ្លួនដើម្បីបន្តកិច្ចចរចាជាមួយអ៊ុយក្រែន បន្ទាប់​ពី​ប្រធានាធិបតីអាម៉េរិក លោកដូណាល់​ ត្រាំ បានផ្តល់ពេល ៥០ថ្ងៃ ឲ្យរុស្ស៊ី ដើម្បី​ចរចា​អំពី​កិច្ច​ព្រម​​ព្រៀងមួយ ក្រោមការគំរាមដាក់ទណ្ឌកម្មដ៏ធ្ងន់ធ្ងរ និងបានប្រកាសអំពី​ការចាប់ផ្តើម​ផ្គត់ផ្គង់​​សព្វា​វុធដល់ទីក្រុងគៀវ ជាថ្មី។

យោង​តាមកងទ័ពអាកាសអ៊ុយក្រែនបានឲ្យដឹងថា ដ្រូនចំនួន ៤២៦ និងមីស៊ីលរុស្ស៊ី ២៤​គ្រឿង បានបាញ់មកលើអ៊ុយក្រែន ដែលបង្កជាការខូចខាតមានជាអាទិ៍នៅក្នុងតំបន់ អ៊ីវ៉ាណូ-ហ្វ្រេនគីវ (នៅភាគលិច) ទីក្រុងខាកគៀវ (នៅភាគខាងឥសាន) និងនៅទីក្រុងគៀវ។ កងទ័ព​អាកាស​អ៊ុយក្រែនបានអះអាងអំពីការបាញ់ទម្លាក់ដ្រូនចំនួន ៤០៣ គ្រឿង និងមីស៊ីល​ទាំង​អស់​របស់រុស្ស៊ី។

អភិបាលរដ្ឋធានីគៀវ លោកវីតាលី គ្លីតស្ឆ្កូ បានប្រាប់ឲ្យដឹងថា អគ្គីភ័យជាច្រើនបានឆាបឆេះ​ដោយសារការវាយប្រហារ ឬការធ្លាក់កំទេចកំទីដ្រូនដែលត្រូវបានបាញ់ទម្លាក់ ដែលបាន​ប៉ះពាល់​មានជាអាទិ៍លើសាលាមត្តេយ្យមួយខ្នង អគារលំនៅដ្ឋានមួយចំនួន ផ្សារទំនើបមួយ និង​​ច្រកចូលស្ថានីយ៍រថភ្លើងក្រោមដី។

ចំណែកក្រសួងការពារជាតិរុស្ស៊ី បានប្រាប់ឲ្យដឹងថា ខ្លួនបានវាយប្រហារលើបណ្តុំសហគ្រាស​ឧស្សាហកម្ម​យោធាអ៊ុយក្រែន និងព្រលានយន្តហោះយោធា និងបានឈានដល់គោលដៅ។​