ការអធិស្ឋានប្រចាំខែមករារបស់សម្តេចប៉ាបគឺផ្តោតលើសិទ្ធិទទួលបានការអប់រំ

សម្តេចប៉ាប ហ្វ្រង់ស៊ីស្កូបាន បញ្ចេញចេតនាអធិស្ឋានរបស់ទ្រង់សម្រាប់ខែ មករា ឆ្នាំ២០២៥ដោយផ្តោតសំខាន់នៅលើ"សិទ្ធិទទួលបានការអប់រំ" ។

វ៉ាទីកង់ញូវបានរាយការណ៍ថា នៅក្នុងខែមករានេះ សម្តេច​ប៉ាប​បាន​អញ្ជើញគ្រីស្តបរិស័ទដែលជាប្រជារាស្រ្តនៃព្រះជាម្ចាស់ ​ឲ្យ​អធិស្ឋាន​សម្រាប់​បំណង​នេះ​តាមរយៈសារជា​វីដេអូ ដែលត្រូវបានផ្សព្វផ្សាយ។ ​

នៅក្នុងវីដេអូរបស់សម្តេចប៉ាបសម្រាប់ខែមករា សម្ដេចប៉ាបបានព្រមានថា ពេលនេះ យើងកំពុងជួបប្រទះគ្រោះមហន្តរាយផ្នែកអប់រំ ហើយគូសបញ្ជាក់ថា នេះមិនមែនជាការបំផ្លើសទេ។

សម្តេចប៉ាបបានសង្កត់ធ្ងន់ថា ដោយសារសង្គ្រាម ការធ្វើចំណាកស្រុក និងភាពក្រីក្រ មានកុមារាកុមារីប្រហែល ២៥០លាននាក់ខ្វះការអប់រំ។

សម្តេចប៉ាបបានទទូចថា "កុមារ និងយុវជនទាំងអស់មានសិទ្ធិទៅសាលារៀន" ដោយបន្ថែមថា "ដោយមិនគិតពីស្ថានភាពអន្តោប្រវេសន៍របស់ពួកគេ" ។

សម្ដេចប៉ាបបាន​បន្ត​ថា ការ​អប់រំ​គឺ​ជា​ក្តី​សង្ឃឹម​សម្រាប់​មនុស្ស​គ្រប់​រូប។ លើសពីនេះ ទ្រង់បានរំលឹកថា វាអាចជួយសង្រ្គោះជនចំណាកស្រុក និងជនភៀសខ្លួនពីការរើសអើង បណ្តាញឧក្រិដ្ឋកម្ម និងការកេងប្រវ័ញ្ច ដូច្នេះ ការ​អប់រំ​គឺ​សំខាន់​ណាស់។

ការអប់រំ ដែលសម្តេចប៉ាបគូសបញ្ជាក់ គឺជាការបើកទ្វារទៅកាន់អនាគតដ៏ល្អប្រសើរ៕