ការវាយប្រហារដ៏មហន្តរាយជាបន្តបន្ទាប់នៅអ៊ុយក្រែន មន្ទីរពេទ្យកុមារនៅ ទីក្រុងគៀវ រងផលប៉ះពាល់
ប្រទេសរុស្ស៊ី កាលពីថ្ងៃទី៨ ខែកក្កដា បានធ្វើការវាយប្រហារដ៏សម្បើមទៅលើទីក្រុងនានារបស់អ៊ុយក្រែន ដែលធ្វើឲ្យមនុស្សយ៉ាងហោចណាស់ ៣៧នាក់ស្លាប់ ដែលមានខ្លះរងរបួសស្ថិតនៅក្នុងមន្ទីរពេទ្យនានា។ នេះកើតឡើងមុនមួយថ្ងៃនៃកិច្ចប្រជុំកំពូលរបស់អង្គការណាតូដ៏មានសារសំខាន់ ដែលនៅក្នុងនោះ ប្រធានាធិបតីអាម៉េរិក លោកចូ បាយឌិន បានសន្យានូវវិធានការមួយចំនួនដើម្បីពង្រឹងប្រព័ន្ធការពារអាកាសនៅអ៊ុយក្រែន។
ការវាយប្រហារថ្មីៗ ទាំងនេះ បានបង្កការក្តៅក្រហាយដល់ទីក្រុងគៀវ និងចោទជាបញ្ហាលើសភាពការការពារអាកាសរបស់អ៊ុយក្រែន។
នៅលើសារតេឡេក្រាម លោកវ៉ូឡូឌីមៀ ហ្សេឡេនស្គី បានសរសេរថា ៖ “ថ្ងៃនេះ រុស្ស៊ីបានវាយប្រហារទីក្រុងអ៊ុយក្រែន។ មនុស្សច្រើនជាង ១៧០នាក់ បានរងរបួស។ ពេលនេះ យើងដឹងថា មានមនុស្ស ៣៧នាក់ បានស្លាប់ ដែលមាន ៣នាក់ គឺជាកុមារ។ បន្ទាប់ពីបានលើកឡើងអំពីការវាយប្រហារថ្មីនៅលើទីក្រុងផ្សេងៗគ្នា ដូចជា ទីក្រុង គៀវ ឌីនីប្រូ គ្រីវីអ៊ីរីហ្គ ស្ល៉ូវីយ៉ង និងក្រាម៉ាតស លោកវ៉ូឡូឌីមៀ ហ្សេឡេនស្គី បានធ្វើការលំអិតថា ៖ “ជាសរុប អគារជិត ១០០ខ្នង ត្រូវរងការខូចខាត មានដូចជា មន្ទីរពេទ្យកុមារមួយ លំនៅដ្ឋាន សួនកុមារ សាលាមតេ្តយ្យ វិទ្យាល័យ និងមជ្ឈមណ្ឌលពាណិជ្ជកម្ម”។
ពីទីក្រុងវ៉ាសូវី ដែលលោកហ្សេឡេនស្គី កំពុងធ្វើដំណើរទស្សនកិច្ច ប្រធានាធិបតីអ៊ុយក្រែន បានទាមទារឲ្យលោកខាងលិចឆ្លើយតបឲ្យកាន់តែខ្លាំងទៅកាន់រុស្ស៊ី។ លោកក៏បានសុំឲ្យកោះប្រជុំជាបន្ទាន់នៃក្រុមប្រឹក្សាសន្តិសុខនៃអង្គការសហប្រជាជាតិ។ មុនមួយថ្ងៃនៃកិច្ចប្រជុំកំពូលអង្គការណាតូ លោកវ៉ូឡូឌីមៀ ហ្សេឡេនស្គី បានសង្កត់ធ្ងន់ថា ៖ “គេត្រូវតែបាញ់ទម្លាក់មីស៊ីលរបស់រុស្ស៊ី។ គេត្រូវតែបំផ្លាញយន្តហោះចម្បាំងរបស់រុស្ស៊ីនៅក្នុងមូលដ្ឋានរបស់ពួកវា។ គេត្រូវតែប្រកាន់យកនូវវិធានការខ្លាំងក្លាដែលមិនត្រូវបណ្តោយឲ្យមានការខូចខាតខាងសន្តិសុខមួយណាឡើយ។
នៅទីក្រុងគៀវ មណ្ឌលវេជ្ជសាស្រ្តពីរ ត្រូវបានរងគ្រោះ ដែលក្នុងនោះមានគ្រឹះស្ថានដ៏មានសារសំខាន់សម្រាប់កុមារ និងធ្វើឲ្យមានមនុស្សយ៉ាងហោច ណាស់ ២២នាក់ បានស្លាប់។ មនុស្ស ១១នាក់ ក៏បានស្លាប់នៅក្នុងតំបន់ ឌីនីប្រូភើត្រូវក៍ និង បីនាក់បានស្លាប់នៅទីក្រុងប៉ូក្រូវ។ យ៉ាងហោចណាស់ មានមនុស្ស ១៤០នាក់ បានរងរបួសជាសរុប។ អាជ្ញាធររដ្ឋធានី បានចេញច្បាប់ឲ្យកាន់ទុក្ខមួយថ្ងៃសម្រាប់ថ្ងៃអង្គារ។
នៅលើបណ្តាញសង្គម X លោកហ្សេឡេនស្គី បានបរិហាថា ៖ “មន្ទីរពេទ្យកុមារដ៏ធំបំផុតមួយនៅអឺរ៉ុប មន្ទីរពេទ្យ អុកម៉ាតឌី ត្រូវបានខូចខាតនៅទីក្រុងគៀវ”។ លោកបានបន្ថែមថា ៖ “រុស្ស៊ីមិនអាចធ្វើមិនដឹង មិនរវល់ ចំពោះការបាញ់មីស៊ីលទាំងនោះទេ ហើយរុស្ស៊ីត្រូវតែជាអ្នកទទួលខុសត្រូវទាំងស្រុងចំពោះរឿងនេះ”។
យោងតាមសេវាកម្មសន្តិសុខអ៊ុយក្រែន យ៉ាងហោចណាស់មនុស្សពីរនាក់ត្រូវបានសម្លាប់នៅក្នុងមន្ទីរពេទ្យនេះ ហើយមានក្មេងៗ ៧នាក់ បានរងរបួសក្នុងចំណោមក្មេងជាច្រើន។
កាលពីថ្ងៃចន្ទ លោកចូ បាយឌិន បានបរិហារអំពីការវាយប្រហារទាំងនេះ ដែលរំឭកអំពីភាពសាហាវយង់ឃ្នង់ និងឃោឃៅរបស់រុស្ស៊ី ហើយលោកបានសន្យាថា នឹងចាប់វិធានការថ្មីៗដើម្បីពង្រឹងប្រព័ន្ធការពារដែនអាកាសអ៊ុយក្រែន។
ប្រធានាធិបតីអាម៉េរិក បានថ្លែងថា ៖ “រួមគ្នា ជាមួយសម្ព័ន្ធមិត្តរបស់យើង យើងនឹងប្រកាសអំពីវិធានការថ្មីៗ ដើម្បីពង្រឹងការការពារដែនអាកាសរបស់អ៊ុយក្រែនដើម្បីជួយការពារទីក្រុងរបស់ខ្លួន និងជនស៊ីវិលពីការវាយប្រហាររបស់រុស្ស៊ី។ ហើយចាប់ពីថ្ងៃអង្គារ ប្រធានាធិបតីអាម៉េរិកបានទទួលរៀបចំកិច្ចប្រជុំកំពូលនៃអង្គការណាតូនៅទីក្រុងវ៉ាស៊ីនតុន។
Daily Program
