ចំពេលដែលហ្វីលីពីនកំពុងតែមានភាពតានតឹងនយោបាយកាន់តែខ្លាំងឡើងលោក កាឌីណាល់ ចូសេ អាវីនគូឡា (Jose Advincula)អគ្គអភិបាលនៃព្រះសហគមន៍កាតូលិកនៅ ទីក្រុងម៉ានីល បានចេញការអំពាវនាវសុំឲ្យប្រជាជាតិអធិដ្ឋាន និងគោរពស្មារតីនៃការផ្សះផ្សាជាតិ។
ដោយសម្តែងការព្រួយបារម្ភយ៉ាងខ្លាំងចំពោះ ភ្លៀងព្យុះនយោបាយដែលកំពុងផ្ទុះឡើង លោកកាឌីណាល់បានជំរុញឱ្យមេដឹកនាំជាតិ និងប្រជាពលរដ្ឋផ្តល់អាទិភាពដល់ការរួបរួម និងសុខុមាលភាពនៃជនងាយរងគ្រោះបំផុតរបស់ប្រទេស។
នៅក្នុងសេចក្តីថ្លែងការណ៍ដែលបានចេញកាលពីចុងខែវិច្ឆិកាកន្លងទៅនេះ លោកកាឌីណាល់ បានគូសបញ្ជាក់ពីរបៀបដែលជម្លោះនយោបាយកាន់តែខ្លាំងឡើងកំពុងបង្វែរការយកចិត្តទុកដាក់ពីបញ្ហាសំខាន់ៗ ជាពិសេសស្ថានភាពរបស់អ្នកដែលរងផលប៉ះពាល់ដោយព្យុះទីហ្វុងនាពេលថ្មីៗនេះ។
លោកកាឌីណាល់បានបញ្ជាក់ពីតម្រូវការសម្រាប់ការសហការគ្នានិងការគោរពចំពោះអភិបាលកិច្ច និង ជំរុញកិច្ចខិតខំប្រឹងប្រែងនានាដើម្បីលើកកំពស់ការផ្សះផ្សាជាតិ។
លោកកាឌីណាល់បាននិយាយថា ៖ «វាគឺជាការអធិស្ឋានរបស់យើងដើម្បីឱ្យអ្នកនយោបាយមានការបន្ទាបខ្លួនហើយស្តាប់គ្នាទៅវិញទៅមកដោយការគោរពនិងធ្វើសកម្មភាពរួមគ្នាដើម្បីជាប្រយោជន៍ដល់ប្រទេស»។
លោកកាឌីណាលើក៏បានលើកទឹកចិត្តប្រជាជនហ្វីលីពីនឱ្យអធិស្ឋានសុំការអភ័យទោស ការព្យាបាល និងការផ្សះផ្សា ដោយរំឭកពួកគេអំពីព្រះគុណ និងសេចក្តីស្រឡាញ់ដ៏យូរអង្វែងរបស់ព្រះ។
លោកបានបន្ថែមថា ៖ «សូមឲ្យយើងទាំងអស់គ្នាអធិស្ឋានសុំការអភ័យទោស និងការផ្សះផ្សាដោយមិនសង្ស័យចំពោះព្រះគុណ និងសេចក្តីស្រឡាញ់របស់ព្រះចំពោះគ្រីស្តបរិស័ទជាប្រជារាស្រ្តរបស់ទ្រង់ »។
ប្រទេសហ្វីលីពីននៅពេលនេះកំពុងតែមានជម្លោះរវាងប្រធានាធីបតី ហ្វឺឌីណង់ ម៉ាកូស និងអនុប្រធានាធិបតី លោក ស្រី សារ៉ា ឌូទែតេ៕
Daily Program
