ការគំរាមកំហែងថ្មីធ្លាក់លើអ៊ុយក្រែន។ ទាំងទីក្រុងគៀវ ក៏ដូចជាទីក្រុងសេអ៊ូល សុទ្ធតែជឿលើ រឿងនេះ ទាហានកូរ៉េខាងជើងចំនួន ១២០០០នាក់ ត្រៀមខ្លួនឆ្ពោះមកកាន់សមរភូមិដើម្បី ជា ជំនួយដល់កងទ័ពរុស្ស៊ី។
ទីក្រុងមូស្គូ បានបដិសេធ ប៉ុន្តែយោងតាមសេវាចារកម្មជាតិកូរ៉េខាងត្បូង (NIS) បានឲ្យដឹងថា ទាហានកូរ៉េខាងជើង បានកំពុងហ្វឹកហាត់រួចហើយនៅក្នុងមូលដ្ឋានយោធារុស្ស៊ីនៅចុងបូព៌ា នៅទីក្រុងវ្ល៉ាឌីវ៉ូស្តុក អ៊ុសស៊ូរីអ៊ីស្ក៍ ខាបារ៉ូវស្ក៍ និងប្លាហ្គ៉ូវ៉េសចិន។
គេមានការលំបាកនឹងវាស់វែងអំពីឥទ្ធិពលដែលទាហានកូរ៉េខាងជើងនឹងនាំមក។ យោងតាម NIS នេះដែរ ទីក្រុងព្យុងយ៉ាង បានចល័ត កងពល ដ៏ល្បីល្បាញចំនួន ៤ នៃអង្គភាពទ័ពលេខ ១១ ដ៏ល្បីល្បាញ ដែលមានឈ្មោះថា កងអង្គភាព ព្យុះសង្ឃរា។ នេះគឺជាអង្គភាពទ័ពខ្លាំងដែលបោះទីតាំងនៅតំបន់ដេជេអ៊ុន នៅក្នុងខេត្តព្យុងហ្កានភាគខាងជើង នៅភាគពាយព្យនៃប្រទេសកូរ៉េខាងជើង។
អង្គភាពនេះគឺជាអ្នកស្នងមរតកពីចម្ងាយពីអង្គភាពលេខ ១២៤ ជាក្រុមកងកុម្ម៉ង់ដូដែលមានអ្នកប្រយុទ្ធ ៣១នាក់ ដែលត្រូវបានបណ្តុះបណ្តាលនៅក្នុងទសវត្សឆ្នាំ១៩៦០ ដែលពេលនោះដើម្បីធ្វើឃាតប្រធានាធិបតីកូរ៉េខាងត្បូង លោកប៉ាក ជុងហ៊ី (ដឹកនាំពីឆ្នាំ១៩៦១ ដល់ឆ្នាំ១៩៧៩)។ នៅថ្ងៃទី២១ មករា ឆ្នាំ១៩៦៨ កងកុម្ម៉ង់ដូនេះ ទទួលបានជោគជ័យក្នុងការជ្រៀតចូលមកភាគខាងត្បូងមកកាន់វិមានខៀវ (វិមានប្រធានាធិបតីកូរ៉េខាងត្បូង)។ កងកម្លាំងកូរ៉េខាងត្បូងបានកំទេចពួកគេ។ ប៉ុន្តែបទពិសោធន៍ត្រូវបានកូរ៉េខាងជើងប្រើប្រាស់ជាគ្រឹះសម្រាប់កងកម្លាំងពិសេសរបស់ពួកគេ។
នៅឆ្នាំ១៩៨៣ ទីក្រុងព្យុងយ៉ាង បានប្រមូលផ្តុំអង្គភាពយោធាដ៏ល្អបំផុតរបស់ខ្លួនមួយចំនួនដើម្បីបង្កើតជាកងពលព្យុះសង្ឃរា។ កងអង្គភាពទាំងនេះ សព្វថ្ងៃគឺជាសសរស្តម្ភនៃកងកម្លាំងពិសេសកូរ៉េខាងជើង ហើយបើតាមការវាយតម្លៃពីសេវាចារកម្មរបស់អាម៉េរិក និងកូរ៉េខាងត្បូង ពួកគេមានសមាជិក ២០០០០០នាក់។
កងអង្គភាពយោធាលេខ ១១ របស់កូរ៉េខាងជើង មានគ្នា ៦០០០០នាក់ ដែលរាយជាអង្គភាពប្រយុទ្ធថ្មើរជើងស្រាល កងទ័ពឆត្រយោង និងអ្នកបាញ់ជំនាញ ដែលពង្រាយនៅក្នុងកងទ័ពជើងគោក កងទ័ពជើងទឹក កងទ័ពអាកាស និងនៅការិយាល័យចារកម្មទូទៅ ចារកម្មយោធា។
យោងតាមការវិភាគមួយដែលត្រូវបានផ្សព្វផ្សាយនៅឆ្នាំ២០១៦ ដោយមជ្ឈមណ្ឌលសិក្សាយុទ្ធសាស្រ្ត និងអន្តរជាតិ (CSIS) បានឲ្យដឹងថា ដោយត្រូវបានពិព៌នាយោងតាមគំនិតនៃសង្រ្គាមផ្សេងៗ គ្នា បេសកកម្មរបស់ពួកគេ រួមមាន ការវាយប្រហារ និងបំផ្លាញគោលដៅ ធ្វើ ឲ្យមានចលាចលខាងក្រោយខ្សែត្រៀមសត្រូវ ដឹកនាំការវាយប្រហារភេរវកម្ម ធ្វើឲ្យទីតាំង យុទ្ធសាស្រ្ត និងតាកតិកបាត់បង់សមត្ថភាពប្រយុទ្ធ មានដូចជាស្ថានីយ៍ទូរគមនាគមន៍ មូលដ្ឋានមីស៊ីល និងមូលដ្ឋានទ័ពអាកាសជាដើម។
នៅក្នុងកងទ័ពប្រជាជន ឬកងទ័ពកូរ៉េខាងជើង ដែលមានចំនួន ១,២៨លាននាក់ សមាជិកនៃក្រុមកម្លាំងពិសេសជា ឧបករណ៍យោធានេះ ដើរតួនាទីគំរាមប្រឆាំងនឹងរាល់ការប៉ុងប៉ង់វាយប្រហារពីកូរ៉េខាងត្បូងតាមរយៈសង្រ្គាម។
ប្រសិនបើការពង្រាយកម្លាំងទាំងនេះរបស់កូរ៉េខាងជើងត្រូវបានបញ្ជាក់ច្បាស់ការហើយ នេះនឹងជាលើកទី១ ដែលកូរ៉េខាងជើងបញ្ជូនកងទ័ពជើងគោកដ៏មានសារសំខាន់ទៅកាន់បរទេស។ នៅខណៈដែលទីក្រុងមូស្គូ និងទីក្រុងព្យុងយ៉ាង បានចុះហត្ថលេខាកាលពីខែមិថុនា ឆ្នាំមុន លើសន្ធិសញ្ញាភាពជាដៃគូយុទ្ធសាស្រ្ត ដែលប្រទេសទាំងពីរសន្យានឹងគាំទ្រគ្នាខាងយោធា កងទ័ពខ្លាំងរបស់កូរ៉េខាងជើងអាចនឹងស្គាល់ការប្រយុទ្ធនៅលើសមរភូមិផ្ទាល់ហើយ។
Daily Program
