អង្គការសហប្រជាជាតិ បង្ហាញផែនការដើម្បីផ្លាស់ប្តូរប្រព័ន្ធកសិកម្មទៅជាអាងស្តុក​កាបូន

នៅខណៈ​ដែលសន្និសីទអន្តរជាតិស្តីអំពីអាកាសធាតុលើកទី២៨ COP28 ចាប់ផ្តើមប៉ុន្មានថ្ងៃ​ចុងក្រោយនៅទីក្រុងឌូបៃ អង្គការស្បៀងអាហារ និងកសិកម្មពិភពលោក FAO បាន​បង្ហាញ​កាល​ពីថ្ងៃអាទិត្យ​នូវ​ផែនការ​បដិវត្តដែលសំដៅ​ប្រែក្លាយប្រព័ន្ធកសិកម្ម​ចំណីអាហារ​ពិភពលោក​ទៅជាអាងស្តុក​កាបូនពីពេលនេះរហូតដល់ឆ្នាំ២០៥០។

អង្គការសហប្រជាជាតិសម្រាប់ស្បៀងអាហារ និងកសិកម្ម FAO បានកំណត់អត្តសញ្ញាណ​ វិស័យ ១០ ជាអាទិភាព មានដូចជា ការចិញ្ចឹមសត្វ ដី និងទឹក ការដាំដុះ របបអាហារ និង​ការ​នេសាទ...

គោលដៅ គឺ ប្រែក្លាយប្រព័ន្ធកសិកម្មចំណីអាហារ ដែលគ្រប​ដណ្តបតាមរបៀបដែលចំណី​អាហារ​​ដែលយើងបរិភោគ តាមរយៈជាផលិតផល និងការដឹកជញ្ជូន ដែលធ្វើឲ្យមានការ​បំភាយ​​ឧស្ម័នផ្ទះកញ្ចក់ ទៅជាប្រព័ន្ធដែលអាចស្រូបយក កាបូនបំភាយ ១,៥ពាន់លាន តោន​ក្នុង​មួយ​ឆ្នាំ។

បដិវត្តនេះចូលរួមវិភាគទានលុបបំបាត់​ការអត់ឃ្លាននៅក្នុងពិភពលោកដោយមិនរុញ​សីតុណ្ហភាព​​អាកាស​ធាតុនៃភពផែនដីឲ្យឡើងលើសកម្រិត ១,៥ អង្សារផង។

នៅ​ខាង​ក្រៅ​សន្និសីទ​នៃអង្គការសហប្រជាជាតិអំពីអាកាសធាតុ​នៅឌូបៃ លោកដាវីឌ ឡាប៏រដេ នាយកផ្នែកសេដ្ឋកិច្ចកសិកម្មចំណីអាហារនៅអង្គការស្បៀងអាហារ និងកសិកម្ម​ពិភពលោក ដែលបានថ្លែងអំពីផែនទីចង្អុលផ្លូវ ក៏បានផ្តល់យោបល់ថា មិនត្រូវ​មាន​ទុទិដ្ឋិ​និយម​ពេកទេ ហើយលោកបាន​ចង្អុលបង្ហាញអំពីផ្លូវ​ដើម្បីប្រតិកម្មនៅពេលសព្វថ្ងៃ​តាមរបៀប​ដែល​អាចផ្តល់ចំណេញសម្រាប់ទាំងអស់គ្នា។ លោកបាននិយាយថា ៖ “យើងត្រូវការថា អ្នក​សម្រេច​ចិត្តខាងនយោបាយត្រូវប្រតិកម្ម។ យើងត្រូវការថា សង្គមស៊ីវិល ត្រូវតែចល័តកម្លាំង និងថា វិស័យ​ឯកជនត្រូវយល់ថា ធ្វើការជ្រើសរើស​ល្អប្រសើរនៅថ្ងៃនេះ មានន័យថា ធ្វើឲ្យការ​វិនិយោគ​កាន់តែមានចីរភាព និងកាន់តែបានផលចំណេញ សម្រាប់ថ្ងៃអនាគត”។

ទោះបីជាចំនុចសកម្មភាពចំនួន ១២០ មើលទៅហាក់បីដូចជាច្រើន លោកឡាប៏រដេ បាន​បញ្ជាក់ថា គោលដៅចុងក្រោយគឺឈានទៅដល់​ការផ្លាស់ប្តូរប្រព័ន្ធ​​មួយដែលមនុស្សម្នាក់ៗ ត្រូវ​តែ​ដើរ​តួនាទីមួយ។

ទន្ទឹមគ្នានេះដែរ អ្នកសេដ្ឋកិច្ចវិទូប្រមុខនៃអង្កការកសិកម្ម និងស្បៀងអាហារពិភពលោក លោក​ម៉ាស៊ីម៉ូ តូរ៉ឺរ៉ូ បានថ្លែងថា គោលដៅនៃផែនទីចង្អុលផ្លូវនេះ គឺប្រែក្លាយ ប្រព័ន្ធ​កសិកម្ម​ចំណី​អាហារឲ្យស្របទៅតាមសកម្មភាពអាកាសធាតុ​ដែលបង្កើនល្បឿន​ដើម្បីចូលរួមចំណែក នឹង​ធានាសន្តិសុខស្បៀង និងការចិញ្ចឹមសម្រាប់យើងទាំងអស់គ្នា។

ជាមួយនឹងមនុស្សប្រមាណ ៧៣៨ លាននាក់ ទទួលរងការខ្វះសារធាតុចិញ្ចឹមជាអចិន្រ្តៃយ៍ នៅ​ក្នុងពិភពលោក លោកតូរ៉េរ៉ូ បានវាយតម្លៃថា ស្បៀងអាហារត្រូវតែក្លាយជាចំណែកនៃកិច្ច​ពិភាក្សាអំពីអាកាសធាតុ និងត្រូវតែទាក់ទាញ​ការវិនិយោគអាកាសធាតុ។

យោងតាមរបាយការណ៍មួយ ដែលផ្សព្វផ្សាយ​នៅក្នុងក្របខណ្ឌផែនទីចង្ហាញផ្លូវ អង្គការ​ស្បៀង​អាហារ និងកសិកម្ម កត់សម្គាល់ថា ការផ្តល់ហិរញ្ញប្បទានខាងអាកាសធាតុ ដែល​សំដៅ​​ទៅលើប្រព័ន្ធកសិកម្មចំណីអាហារ គឺមានភាពខ្សោយជាខ្លាំង និងបន្តថយចុះ​បើ​ប្រៀប​ធៀប​នឹងលំហូហិរញ្ញវត្ថុ​ពិភពលោក សម្រាប់អាកាសធាតុ នៅខណៈដែល​ប្រភេទនៃការ​ផ្តល់​ហិរញ្ញប្ប​ទាននេះ គឺចាំបាច់ និងបន្ទាន់បំផុត។

លោកម៉ាស៊ីម៉ូ តូរ៉ឺរ៉ូ បានថ្លែងដែរថា ការងារដែលបានធ្វើនៅសន្និសីទ​ស្តីអំពីអាកាសធាតុ​លើក​ទី​២៨ គឺជាចំណុចចេញដំណើរ​ដ៏ល្អ និងថា ផែនទីបង្ហាញផ្លូវនេះអាចផ្តល់ទិសដៅ​ដើម្បី​ឲ្យ​សេចក្តី​ប្រកាសនៅប្រទេសអារ៉ាបរួម អេមីរ៉េ មានអំពីកសិកម្មប្រកបដោយចីរភាព ប្រព័ន្ធ​ចំណី​អាហារ​មានភាពស៊ូទ្រាំ និងសកម្ម​ភាពអាកាសធាតុផងដែរ។