យោងតាមរបាយការណ៍នៃកម្មវិធីពាណិជ្ជកម្ម និងការអភិវឌ្ឍរបស់អង្គការសហប្រជាជាតិ CNUCED បានឲ្យដឹងថា ប្រទេសកំពុងអភិវឌ្ឍទទួលរងឥទ្ធិពលបរិស្ថានពីសេដ្ឋកិច្ចបច្ចេកវិទ្យា ទំនើប ប៉ុន្តែបានទទួលប្រយោជន៍តិចតួចពីយុគសម័យថ្មីនេះ។ របាយការណ៍ក៏បានបញ្ជាក់អំពីឥទ្ធិពលដ៏មហិមានៃវិស័យបច្ចេកវិទ្យាទៅលើបរិស្ថាន និងផ្នែកដែលមិនបានទទួលស្មើគ្នាដែលប្រទេសកំពុងអភិវឌ្ឍជួបប្រទះ។
របាយការណ៍លំអិទគូសបញ្ជាក់ថា ប្រសិនបើវិស័យបច្ចកវិទ្យាគឺជាម៉ូទ័រនៃកំណើនសេដ្ឋកិច្ចពិភពលោក និងផ្តល់តែឱកាសល្អសម្រាប់ប្រទេសអភិវឌ្ឍន ឥទ្ធិពលដែលមិនគួរឲ្យចង់បានរបស់ពួកវាទៅលើបរិស្ថានគឺកាន់តែធ្ងន់ធ្ងរឡើងៗ។ ប្រទេសកំពុងអភិវឌ្ឍនៅតែទទួលរងផលប៉ះពាល់ដោយអតុល្យភាពមិនស្មើគ្នា នៅលើផ្នែកសេដ្ឋកិច្ចក៏ដូចជាបរិស្ថាន។
លោកស្រីរ៉ឺបេកា ហ្គ្រ៊ីនស្ពាន អគ្គលេខានៃកម្មវិធីពាណិជ្ជកម្ម និងការអភិវឌ្ឍរបស់អង្គការសហប្រជាជាតិ បានថ្លែងថា ៖ “យើងត្រូវតែទាញយកផលប្រយោជន៍ពីអំណាចនៃបច្ចេកវិជ្ជាដើម្បីអនុគ្រោះដល់ការអភិវឌ្ឍទាំងមូល និងមានចីរភាព។ អ្វីៗ ទាំងអស់គឺធ្វើដើម្បីកាត់បន្ថយឥទ្ធិពលអវិជ្ជមានទៅលើបរិស្ថាន។ ឥទ្ធិពលខាងបរិស្ថានដែលកើនឡើងនៅក្នុងសេដ្ឋកិច្ចនឹងអាចវិលបញ្ច្រាសមកវិញ”។
របាយការណ៍គូសបញ្ជាក់ថា វាមានភាពបន្ទាន់នឹងប្រឈមមុខទៅនឹងតម្លៃនៃបរិស្ថានសម្រាប់ការប្រែប្រួលខាងវិស័យបច្ចេកវិទ្យាដ៏ឆាប់រហ័ស។ ក្តីព្រួយបារម្ភចម្បង គឺការខ្សោះនៃវត្ថុធាតុដើមដែលមានកម្រិតសម្រាប់បច្ចេកវិទ្យា និងព័ត៌មានវិទ្យាទាំងនោះ បន្ទាប់មក ក៏មាន ការស្រូបយកកាបូនពីបរិយាកាសដ៏ខ្សោយ ការកើនឡើងនូវការប្រើប្រាស់ទឹក ថាមពល និងបញ្ហាដែលកើនឡើងនៃសម្រាមដែលទាក់ទងនឹងបច្ចេកវិទ្យា និងព័ត៌មានវិទ្យា។
កម្មវិធីពាណិជ្ជកម្ម និងការអភិវឌ្ឍរបស់អង្គការសហប្រជាជាតិ បានឲ្យដឹងថា ប្រទេសកំពុងអភិវឌ្ឍដើរតួកណ្តាលនៅក្នុងចង្វាក់ផ្គត់ផ្គង់របស់ពិភពលោកខាងរ៉ែ និងលោហៈកម្រ។ ស្រទាប់រ៉ែដ៏ធំនៅក្នុងទ្វីបអាហ្វ្រិកមានសារសំខាន់សម្រាប់ការផ្លាស់ប្តូរថាមពលពិភពលោក និងសម្រាប់បច្ចេកវិទ្យា ដែលរួមមានរ៉ែ កូបាល់ ស្ពាន់ លីធ្យូម និងមានសារសំខាន់ចាំបាច់សម្រាប់អនាគតនៃថាមពលចីរភាព។ ទ្វីបអាហ្វ្រិកមានអាងរ៉ែបម្រុង គឺ ៥៥% នៃកូបាល់ពិភពលោក ៤៧,៦៥% នៃម៉ងហ្គាណេស ២១,៦% នៃហ្គ្រាហ្វីតធម្មជាតិ ៥,៩% នៃស្ពាន់ ៥,៦%នៃនីកែល និង ១%នៃលីធ្យូម។
យោងតាមធនាគារពិភពលោក តម្រូវការរ៉ែចាំបាច់សម្រាប់បច្ចេកវិទ្យាទំនើប មានដូចជា ហ្គ្រាហ្វីត លីធ្យូម និងកូបាល់ នឹងអាចកើនឡើង ៥០០% ពីពេលនេះដល់ឆ្នាំ២០៥០។ តម្រូវការកើនឡើងនេះតំណាងឲ្យឱកាសដ៏ល្អនៃការអភិវឌ្ឍសម្រាប់ប្រទេសកំពុងអភិវឌ្ឍដែលសម្បូរដោយធនធាន ដែលពួកគេអាចបន្ថែមតម្លៃដល់ការទាញយកការធ្វើអាជីវកម្មរ៉ែ និងការធ្វើឲ្យទៅជាចម្រុះនៅក្នុងចង្វាក់សេដ្ឋកិច្ច នៅក្នុងវិស័យដទៃៗ ទៀត។ វានឹងជួយឲ្យប្រទេសកំពុងអភិវឌ្ឍបង្កើតចំណូលសាធារណៈ ដើម្បីផ្តល់ហិរញ្ញប្បទានដល់ការអភិវឌ្ឍ បង្កើតការងារ និងធ្វើឲ្យល្អប្រសើរឡើងនូវកម្រិតជីវភាពរបស់ប្រជាជនពួកគេ។
ការកើនឡើងនូវតម្រូវការរ៉ែវត្ថុធាតុដើម បានផ្តល់សំទុះរួចហើយដល់ការវិនិយោគផ្ទាល់របស់បរទេសនៅទ្វីបអាម៉េរិកឡាទីន ដែលតំណាងឲ្យ២៣%នៃតម្លៃនៃគម្រោងថ្មីៗនៅក្នុងតំបន់នៅអំឡុងពីរទសវត្សចុងក្រោយនេះ។ ប៉ុន្តែ ការទាញយក និងការចម្រាញ់វត្ថុធាតុដើមរហូតដល់ផលិតកម្ម បានផ្តល់ផលប៉ះពាល់យ៉ាងធ្ងន់ធ្ងរដល់បរិស្ថាន។ ដំណើរការនេះស្រូបយកក្នុងបរិមាណដ៏ធំនៃរ៉ែកម្រ ថាមពល និងទឹក ដែលបង្កឲ្យមានការសាយភាយដ៏គួរឲ្យកត់សម្គាល់នូវឧស្ម័នផ្ទះកញ្ចក់ និងការបំពុល។
Daily Program
