អត្ថាធិប្បាយគម្ពីរដំណឹងល្អថ្ងៃទី១២ ខែតុលាឆ្នាំ២០២៣

អត្ថាធិប្បាយគម្ពីរដំណឹងល្អថ្ងៃទី១២ ខែតុលាឆ្នាំ២០២៣ តាមលូកា ១១,៥-១៣ អត្ថាធិប្បាយដោយលោកបូជា​ចារ្យ​ ហ្វ្រង់ស័រ អេមេល្សដាល

ក្នុងអត្ថបទដំណឹងល្អថ្ងៃនេះ ព្រះយេស៊ូលើកទឹកចិត្តឱ្យយើងអធិដ្ឋាន ទូលអង្វរព្រះជាម្ចាស់​ឱ្យ​អស់​ពី​កម្លាំង​កាយ​កម្លាំងចិត្ត ដោយមានចិត្តព្យាយាម មាន​សង្ឃឹម​ជានិច្ចថា ព្រះអង្គ​នឹង​ប្រោស​ប្រទាន​អ្វីៗ​ដែល​យើង​ត្រូវ​ការ ពីព្រោះព្រះជាម្ចាស់ជាព្រះបិតា ហើយនឹងព្រះអង្គជ្រាបនូវអ្វីដែលយើងត្រូវការ ហើយ​​ព្រះអង្គ​មាន​ចិត្តធម៌ពោរពេញដោយចិត្តមេត្តាករុណា និងប្រោស​ប្រទាន​អ្វីៗ​ទាំងអស់​ដែល​យើង​ត្រូវការ​សម្រាប់​ជីវិត​របស់​យើង។

ខ្ញុំចាប់អារម្មណ៍ឃ្លាចុងក្រោយ​របស់​សន្តលូកាជាអ្នកនិពន្ធអត្ថបទដំណឹងល្អនៅថ្ងៃនេះ។ គាត់សរសេរថា ព្រះជាម្ចាស់នឹងប្រោសប្រទានព្រះវិញ្ញាណដ៏វិសុទ្ធ ហើយ​អ្នកណាមានព្រះវិញ្ញាណដ៏វិសុទ្ធ អ្នកនោះមានអ្វីៗទាំងអស់ មិនបាច់សុំអ្វីពីព្រះវិញ្ញាណដ៏វិសុទ្ធទេ។ ព្រះវិញ្ញាណ​ដ៏វិសុទ្ធ​ជា​ទ្រព្យសម្បត្តិ​ដ៏​មាន​តម្លៃឥតឧបមា ដែលព្រះអង្គប្រោសប្រទានឱ្យអស់អ្នកដែលចង់បានព្រះវិញ្ញាណនេះ។ សូមមើលលិខិតរបស់សន្តប៉ូលផ្ញើជូនគ្រីស្តបរិស័ទ​នៅទីក្រុងកាឡាទី។ សន្តប៉ូលគាត់និយាយអំពីផលនៃព្រះវិញ្ញាណដ៏វិសុទ្ធ។ កាឡាទីជំពូកទី៥,២២ លោកប៉ូលសរសេរថា រីឯផលដែលកើតមកពីព្រះវិញ្ញាណដ៏វិសុទ្ធគឺសេចក្តីស្រឡាញ់ អំណរ សេចក្តីសុខសាន្ត ចិត្តអត់ធ្មត់​ ចិត្តសប្បុរស ចិត្តសន្តោសមេត្តា ជំនឿ ចិត្តស្លូតបូត។

ព្រះវិញ្ញាណដ៏វិសុទ្ធប្រោសប្រទានឱ្យយើងមានសេចក្តីស្រឡាញ់ អំណរសប្បាយ និងចិត្តអត់ធ្មត់ ចេះទុកចិត្តលើខ្លួនឯង-ល-។ យើងមានអ្វីៗទាំងអស់មិនបាច់សុំអ្វីពីព្រះវិញ្ញាណដ៏វិសុទ្ធទេ កុំគិតតែពីរឿងលោកីយ៍ រឿងលោកីយ៍មានតែមួយរយៈ ហើយនឹងមិនអាចបំពេញចិត្តរបស់យើងទេ គិតអំពីរឿងខាងវិញ្ញាណវិញ។ ទ្រព្យសម្បត្តិ​ខាងវិញ្ញាណជាទ្រព្យសម្បត្តិពិតប្រាកដមែន ដែលណែនាំឱ្យយើងជោគជ័យក្នុងជីវិត។  ទោះបីខ្ញុំក្រក៏ដោយ ទោះបីខ្ញុំឈឺក៏ដោយ បើសិនជាខ្ញុំមានព្រះវិញ្ញាណដ៏វិសុទ្ធ ខ្ញុំមានអំណរសប្បាយ សេចក្តីស្រឡាញ់ ចេះអត់ធ្មត់ ចេះទុកចិត្តលើខ្លួនឯង-ល-។

ដូច្នេះសុំទូលអង្វេព្រះជាម្ចាស់ជាព្រះបិតាដែលស្រឡាញ់យើង ជាកូនជាទីស្រឡាញ់ ស្រឡាញ់យើងក្នុងអង្គព្រះយេស៊ូគ្រីស្ត។ សុំទូលអង្វរព្រះអង្គសុំឱ្យព្រះអង្គប្រោសប្រទានព្រះវិញ្ញាណដ៏វិសុទ្ធដែលគង់សណ្ឋិតនៅក្នុងដួងចិត្តរបស់យើង។ អាម៉ែន៕