ថ្ងៃទី៣១ ខែមីនា ឆ្នាំ២០២៦អត្ថបទគម្ពីរយ៉ូហាន ១៣,២១-៣៣.៣៦-៣៨អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

សូមជម្រាបសួរ បងប្អូនជាទីស្រឡាញ់! នៅថ្ងៃនេះយើងមកដល់សប្ដាហ៍ពិសេស ថ្ងៃអង្គារពិសេស​នេះ ព្រះយេស៊ូមានបន្ទូលរៀបរាប់ពីការក្បត់របស់សាវ័ករបស់ព្រះអង្គ។ បើសិនសួរថា ព្រះយេស៊ូ​ដឹង​​រឿង​នេះ​ឬ​អត់? ពិតមែន ព្រះអង្គធ្វើសញ្ញាឲ្យសាវ័កដឹង ហើយប្រាប់សាវ័កដឹងអំពីអ្នកក្បត់ហ្នឹង មានន័យ​ថា​ព្រះ​អង្គ​​ដឹង។ តែព្រះអង្គអនុញ្ញាតឲ្យអ្នកដែលចង់ក្បត់ព្រះអង្គ យើងដឹងហើយថាគាត់ឈ្មោះ យូដាស អ៊ីស្ការីយ៉ុត ចង់ឲ្យមានពេលវេលាចុងក្រោយនៃការកែប្រែគំនិត នៅទីបំផុតក៏គាត់​នៅតែ​គិត​តាម​របៀប​របស់គាត់។

យូដាស អ៊ីស្ការីយ៉ុត ជាសាវ័កម្នាក់នៅក្នុងចំណោមក្រុមដប់ពីរនាក់ យើងដឹងថាអ្នកដែល​នៅក្នុង​ក្រុម​ហ្នឹង គឺជាអគ្គសាវ័ករបស់ព្រះអង្គ ដែលជាអ្នកដើរតាមព្រះអង្គយ៉ាងខ្លាំង និងយ៉ាងជិតស្និទ្ធ ប៉ុន្តែ​ក្នុង​ចំណោម​នោះ ក៏នៅតែមានគាត់ដែលក្បត់ព្រះអង្គ។ បងប្អូនជាទីស្រឡាញ់ ជីវិតរបស់យើងនៅ​ក្នុង​ជីវិត​គ្រួសារក្ដី ជីវិត​ការងារក្ដី ឬជីវិតក្នុងសង្គមក្ដី ជួនកាលអ្នកដែលជិតយើងជាងគេ ក្លាយទៅជានអ្នក​ធ្វើបាប​យើង​ជាង​គេ។

ប៉ុន្តែបងប្អូន ជីវិតព្រះបន្ទូលថ្ងៃនេះ ជាការឆ្លុះបញ្ចាំងនៃជីវិតរបស់យើងដែរ។ សូមឲ្យព្រះយេស៊ូផ្ដល់​កម្លាំង​ឲ្យបងប្អូន ប្រឈមមុខនឹងការក្បត់ នៃការខកចិត្ត ហើយសូមឲ្យសប្ដាហ៍ពិសិដ្ឋ ផ្ដល់អត្ថន័យ​នៃជីវិត​របស់​បងប្អូន ដើម្បីរួមធ្វើដំណើរឆ្លងកាត់ទុក្ខលំបាកទាំងអស់ ជាពិសេសការក្បត់ចិត្តគ្នា ដែលតែង​តែ​មាន​នៅ​ក្នុង​ជីវិតនេះ រួមជាមួយព្រះយេស៊ូ ដើម្បីទទួលជីវិតរស់ឡើងវិញជាមួយព្រះអង្គ នៅក្នុថ្ងៃបុណ្យចម្លង​នៅ​​ខាងមុខនេះផងដែរ។ អាម៉ែន៕