ថ្ងៃទី២៩ ខែវិច្ឆិកា ឆ្នាំ២០២៥ អត្ថបទគម្ពីរ សន្តលូកា (២១, ៣៤- ៣៦)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន
បងប្អូនជាទីស្រឡាញ់ នៅថ្ងៃសៅរ៍នេះ តាមសន្តលូកា ២១, ៣៤- ៣៦ព្រះយេស៊ូមានព្រះបន្ទូលថា ចូលប្រុងប្រយ័ត្ន កុំវក់វីនិងជីវិតរស់នៅជាប់និងគ្រឿងស្រវឹង គ្រឿងញៀននិងអបាយមុខទាំងឡាយដែលធ្វើឲ្យជីវិតរបស់យើងវក់វីនៅក្នុងផែនដីនេះ។ ហេតុអ្វីបានជាព្រះយេស៊ូត្រូវតែរំលឹក នឹងដាស់តឿនយើង? ព្រោះព្រះយេស៊ូមកក្នុងលោកនេះ ដ្បិតព្រះអង្គស្រឡាញ់យើង។ ព្រះអង្គស្គាល់យើងដែលជាអ្នកបាប ជាអ្នកទន់ខ្សោយ។ ដូច្នេះព្រះជាម្ចាស់មិនចង់ឲ្យមនុស្សបាត់បង់ជីវិតដោយរស់នៅជាប់ចិត្តនៅក្នុងដំណើរលោកនេះ ដែលយកទ្រព្យសម្បត្តិ យកមុខមាត់ជាធំ។ ព្រះយេស៊ូចង់ឲ្យយើងមើលឃើញព្រះជាម្ចាស់ដែលបានបង្កើតយើងនិងប្រទានជីវិតឲ្យយើង ឲ្យយើងមានសេចក្តីសុខជាមួយព្រះអង្គអស់កាលជានិច្ច។
ដូច្នេះ បងប្អូនដែលមានបទពិសោធន៍ក្នុងការរស់នៅក្នុងជីវិតប្រចាំថ្ងៃយើងឃើញហើយ បងប្អូនដែលជាអ្នកមានទ្រព្យសម្បត្តិធនធាន គេសប្បាយរីករាយនិងបង្ហាញពីអ្វីៗដែលគេមាន។ ប៉ុន្តែក្នុងជីវិតរស់នៅកាលយើងបានឆ្លងកាត់ទុក្ខលំបាកវេទនាធ្វើឲ្យយើងឃើញថា បងប្អូនដែលគ្មានទីពឹង គ្មានទ្រព្យសម្បត្តិ គ្មានកិត្តិយស គឺបងប្អូនយើងតែងតែផ្ញើជីវិត ទុកចិត្ត នឹងយកព្រះជាម្ចាស់ដាក់នៅក្នុងជីវិត ក្នុងខ្លួនក្នុងក្រុមគ្រួសា នោះហើយដែលធ្វើឲ្យយើងឃើញថា ពេលណាដែលយើងចេះដាក់ខ្លួន ចេះបន្ទាបខ្លួន ចេះស្វែងរកព្រះជាម្ចាស់ជាមុន បងប្អូនក៏មានទ្រព្យសម្បត្តិ មានអ្វីៗដែលព្រះអង្គប្រទានឲ្យ។ ហេតុនេះព្រះបន្ទូលដំណឹងល្អតាមលោកលូកានៅថ្ងៃនេះ ជួយយើងម្នាក់ៗ ឲ្យយើងគិតឲ្យច្បាស់ ឲ្យយើងអង្គុយគន់មើលពិភពលោកនេះ។ ពិភពលោកដ៏សែនដ៏ស្រស់ស្អាតដ៏ធំធេងដែលយើងរស់នៅនេះ ជាស្នាព្រះហស្តរបស់ព្រះជាម្ចាស់។ ចុះលោកខាងមុខរបស់ព្រះអង្គនឹងអស្ចារ្យយ៉ាងម៉េច?
សូមបងប្អូន រំពឹងអង្គុយគន់រំពឹងមើលឃើញការអស្ចារ្យ យើងតែងតែឃើញការអស្ចារ្យដែលព្រះជាម្ចាស់ប្រទានដល់យើង។ តើយើងត្រូវចេះប្រើព្រះអំណោយទានរបស់យើង ដើម្បីបើកចិត្តទូលំទូលាយ ចេះចែករំលែកអ្វីដែលយើងមានជាទ្រព្យសម្បត្តិ? កុំយកទ្រព្យសម្បត្តិដើម្បីតែខ្លួនឯង! ចូរប្រើទ្រព្យសម្បត្តិ ដើម្បីជាប្រយោជន៍ដល់បងប្អូនយើង។ បងប្អូនជាទីស្រឡាញ់ ខ្ញុំសូមចែកបទពិសោធន៍មួយដ៏តូចកាលខ្ញុំទៅអធិដ្ឋានបុណ្យសពមួយកន្លែង ក្រោយពីបូជាហើយខ្ញុំឃើញគាត់រៀបចំសំណែន មាននំចេក មានផ្លែឈើ ម្ហូបអាហារសម្រាប់សពនោះ ខ្ញុំក៏បានជម្រាបពូដែលជាគ្រួសារនៃសពថាមីងគាត់បានទទួលមរណភាពហើយ ជីវិតរបស់គាត់នឹងទៅរស់នៅជាមួយព្រះជាម្ចាស់ គាត់លែងត្រូវការម្ហូបអាហារដែលយើងត្រូវការត្រូវការហូបជាសំណែនទៀតហើយ តែអ្វីដែលយើងអាច គឺចែកម្ហូបអាហារទាំងអស់នេះទៅបងប្អូនក្រីក្រ គឺមានប្រយោជន៍ មានន័យ មានតម្លៃ ដោយសារបងប្អូនទាំងនោះគេត្រូវការម្ហូបអាហារនេះ។
សម្រាប់មនុស្សដែលស្លាប់ទៅហើយគឺគាត់នឹងធ្វើដំណើរនឹងទៅរស់នៅជាមួយព្រះជាម្ចាស់! នេះជាចំណុចមួយជួយដាស់តឿន ជួយរំលឹកបងប្អូនយើង អ្វីដែលសំខាន់នៅក្នុងជីវិតគឺសេចក្តីស្រឡាញ់ ធម៌មេត្តាករុណារបស់ព្រះជាម្ចាស់ ព្រះអង្គតែងតែឲ្យមនុស្សយើងមានតម្លៃថ្លៃថ្នូរ ជាបុត្រធីតារបស់ព្រះអង្គ។ ដូច្នេះបើយើងជាបុត្រធីតារបស់ព្រះអង្គ ចូរខំរស់នៅក្នុងលោកនេះ នឹកដល់ព្រះជាម្ចាស់ជានិច្ចក្នុងការអធិដ្ឋាន។ ព្រះជាម្ចាស់ដែលមកនៅក្នុងខ្យល់ចេញចូលនៅក្នុងដង្ហើមជីវិតរបស់យើងគ្រប់ពេលវេលា នោះជាព្រះជាម្ចាស់ ជាធម៌មេត្តា ជាសេចក្តីស្រឡាញ់នៅក្នុងជីវិតរបស់យើង។ យើងមានព្រះជាម្ចាស់ ព្រះអង្គនឹងប្រទានឲ្យយើង ម្ហូបអាហារ ទ្រព្យសម្បត្តិ កិត្តិយសតម្លៃថ្លៃថ្នូរ យើងនឹងទទួលបាននៅពេលដែលយើងមាន ព្រះអង្គដែលជាម្ចាស់ជីវិត។ ព្រះអង្គជាប្រភពនៃអំណោយទានគ្រប់បែបយ៉ាង។ ដូច្នេះសូមបងប្អូន យកពេលវេលាដើម្បីអរព្រះគុណព្រះជាម្ចាស់ យកពេលវេលាដើម្បីថ្វាយខ្លួនទៅក្នុងព្រះហស្តរបស់ព្រះជាម្ចាស់៕
Daily Program
