ថ្ងៃទី២៥ ខែ ឆ្នាំ២០២៥ អត្ថបទគម្ពីរយ៉ូហាន ១,១-១៨អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល

អត្ថបទដំណឹងល្អនៅថ្ងៃនេះ រំលឹកអំពីអត្ថបទដើមដំបូងនៃដំណឹងល្អតាមសន្តយ៉ូហាន គាត់សរសេរអត្ថបទ​នេះយូរឆ្នាំក្រោយពីព្រះយេស៊ូបានសោយទីវង្គត់ និងមានព្រះជន្មរ​ស់​ឡើង​វិញ។ លោកយ៉ូហានមានពេល​ច្រើនឆ្នាំដើម្បីស្មឹងស្មាធិ៍ រិះគិតពិចារណា​អំពី​អត្ថន័យនៃការយាងមករបស់ព្រះយេស៊ូនៅលើផែនដីនេះ។

សន្តយ៉ូហានសរសេរថា "ព្រះបន្ទូលប្រសូតជាមនុស្ស" គាត់យល់ថា លោកយេស៊ូពី​ណា​សា​រ៉ែត មិន​មែន​ជា​មនុស្ស​ធម្មតា គឺពិតជាព្រះជាម្ចាស់ដែលយាងមកក្នុងលោកនេះ ដូចមនុស្ស ដូច​យើងបេះបិទ លើក​លែង​តែ​អំពើបាប។ គាត់និយាយតាមរបៀបបុរាណបន្តិច គាត់សរសេរថា "កាលពីដើមដំបូងបង្អស់ មាន​ព្រះ​បន្ទូល​បង្កើតអ្វីៗទាំងអស់សារជាថ្មីម្ដងទៀត។ ព្រះ​បន្ទូលគង់នៅជាមួយព្រះជាម្ចាស់ ព្រះបន្ទូល​ដែលបា​​ន​បង្កើត​អ្វីៗទាំងអស់ ព្រះបន្ទូលជាព្រះជាម្ចាស់។ ព្រះបន្ទូលនេះជាជីវិត ព្រះបន្ទូលនេះបាន​ប្រសូតជា​មនុស្ស​ដូចយើងបេះបិទ។"

ព្រះយេស៊ូគឺជាជីវិត ជាព្រះបន្ទូល ជាព្រះជាម្ចាស់តែម្ដង។ ដូច្នេះ ពេលបុណ្យណូអែល យើងសប្បាយ ពី​ព្រោះ​យើងឃើញថា នេះជាបុណ្យកូនតូចម្នាក់ដែលបានប្រសូត ហើយជាបុណ្យរបស់ក្មេងៗ។ ប៉ុន្តែ បុណ្យ​ណូ​អែ​លមានអត្ថន័យច្រើនមែនទែន។

ក្នុងពេលអំណរសប្បាយនៃបុណ្យណូអែលនេះ ខ្ញុំសង្ឃឹមថា បងប្អូនសប្បាយៗ មានអភិបូជា មាន​សកម្ម​ភា​ព​ជាច្រើន មានច្រៀង មានរាំ ប្រហែលមានលេងឡូតូ ប៉ុន្តែសូមទុកពេលវេលាដើម្បី​រិះគិ​តពិ​ចារណា​ក្នុង​ការអធិដ្ឋាន ហើយមានអំណរសប្បាយក្នុងជម្រៅចិត្ត ព្រះជាម្ចាស់យាងមក​ប្រសូត​ក្នុង​ដួងចិ​ត្តរបស់យើង បើសិនជាយើងព្រមទទួលព្រះជាម្ចាស់។

ព្រះជាម្ចាស់ប្រសូតក្នុងដួងចិត្ត ដើម្បីឱ្យយើងទៅជាបុត្រធីតារបស់ព្រះជាម្ចាស់។ នេះគឺជា​ដំណឹង​ល្អ​នៃ​បុណ្យណូអែល មិនមែនជាកាដូទេ មិនមែនជាចម្រៀងពីរោះៗទេ កាដូពិតប្រាកដនៃបុណ្យណូអែល គឺព្រះយេស៊ូសព្វព្រះហឫទ័យយាងមកគង់នៅក្នុងចិត្តគំនិតរបស់យើង ដើម្បីប្រោស​យើងឱ្យទៅ​ជាមនុ​ស្ស​ពេញលក្ខណៈ ទៅជាមនុស្សដែលគាត់សព្វព្រះហឫទ័យ ទៅជាបុត្រ​ធីតា​របស់​ព្រះជាម្ចាស់។ អាម៉ែន៕