ថ្ងៃទី២៤ ខែមករា ឆ្នាំ២០២៦អត្ថបទគម្ពីរ ម៉ាកុស (៣,២០-២១)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ពីមួយសប្តាហ៍ទៅមួយសប្តាហ៍ ដំណើរនៃកាលវេលាកាន់តែទៅមុខយ៉ាងលឿន។ នៅថ្ងៃសៅរ៍ ទី២៤ នេះ យើងនឹងស្តាប់ព្រះបន្ទូលដំណឹងល្អតាមរយៈលោកម៉ាកុស (៣,២០-២១) ជាព្រះបន្ទូលដ៏ខ្លី ប៉ុន្តែ! ​បា​ន​ផ្តោតទៅលើក្រុមគ្រួសាររបស់ព្រះយេស៊ូដែលមកតាមរកព្រះអង្គ។ ពួកគេមានការខ្វល់ខ្វាយ នៅ​ពេល​បាន​ឮ​ថា ព្រះអង្គរវល់ខ្លាំង រហូតដល់គ្មានពេលទទួលទានអាហារ និងគ្មានពេលជួប​ក្រុម​គ្រួ​សារ។ ក្រុម​គ្រួសារ​ក៏​បានតាមរក ដោយគិតថាព្រះអង្គដូចជាវង្វេងហើយ។ ការព្រួយបារម្ភនេះជារឿងពិត ដែលឪពុកម្តាយ បងប្អូនតែងតែខ្វល់ខ្វាយ។

ផ្ទុយទៅវិញ សូមយើងក្រឡេកមកមើលសកម្មភាពរបស់ព្រះយេស៊ូ។ ព្រះអង្គមានសកម្មភាពមមាញឹក ដើម្បី​ធ្វើតាមព្រះហឫទ័យរបស់ព្រះបិតា។ ព្រះអង្គបានប្រញាប់ប្រញាល់ជួបជុំ ធ្វើដំណើរ បង្រៀន និង​ថែ​ទាំ​អ្នកជំងឺ ជួយដល់ប្រជាជនដែលមានបញ្ហា និងទុក្ខលំបាកផ្សេងៗ។ ព្រះអង្គ​យាង​មក​ដើម្បី​ណែ​នាំ និងលើកទឹកចិត្តដល់មនុស្សលោក ចំពោះបញ្ហាស្មុគស្មាញទាំងឡាយ។

នៅថ្ងៃនេះ ចូរបងប្អូនអរព្រះគុណព្រះជាម្ចាស់ ព្រោះព្រះអង្គសព្វព្រះហឫទ័យយាងមកក្នុងលោកនេះ ដើម្បី​រំដោះទុក្ខលំបាក និងទុក្ខវេទនា។ ដូចដែលបងប្អូនបានធ្វើសកម្មភាពកន្លងមក ទាំងព្រះសហគមន៍​គ្រប់ទីកន្លែង និងរាជរដ្ឋាភិបាល បានចុះទៅគ្រប់ទីកន្លែងផ្សែងៗ ដើម្បីចែកអំណោយ​ដល់​បង​ប្អូន​ភៀស​ខ្លួន និងកងទ័ពជួរមុខ ដែលកំពុងប្រឈមនឹងសង្គ្រាម។ សកម្មភាពទាំងនេះ បង្ហាញពីការចូលរួមដើម្បី​តម្លៃ​រ​បស់មនុស្សជាតិ។ យើងមិនពេញចិត្តនឹងសង្គ្រាម ឬអ្វីដែលធ្វើឱ្យមនុស្សបែកបាក់ ឈ្លោះប្រកែក និងសម្លាប់គ្នានោះទេ។ យើងមកដើម្បីលើកទឹកចិត្តមនុស្សឱ្យត្រឡប់មករកព្រះជាម្ចាស់វិញ និងសូមឱ្យ​មនុស្ស​ឈប់ប្រព្រឹត្តសេចក្តីអាក្រក់ ដែលនាំឱ្យបាត់បង់ជីវិត គ្រួសារ ជំនឿ និងសេចក្តីសង្ឃឹម។

ថ្ងៃនេះ ព្រះយេស៊ូបានយាងមក ដើម្បីនាំមកនូវសេចក្តីសុខសាន្ត។ សូមបងប្អូនបើកចិត្ត បើកគំនិត ទទួល​ព្រះអង្គ ដើម្បីឱ្យភាពងងឹតនៃឆ្នាំថ្មីដែលយើងបានចាប់ផ្តើមនេះទទួលបានពន្លឺថ្មី ជំនឿថ្មី និងសេចក្តី​សង្ឃឹម​ថ្មី ក្នុងអង្គព្រះយេស៊ូជាអម្ចាស់។ អាមែន៕