ថ្ងៃទី២១ ខែវិច្ឆិកា ឆ្នាំ២០២៥ អត្ថបទគម្ពីរ លូកា ១៩,៤៥-៤៨អត្ថាធិប្បាយគម្ពីរដោយ៖ លោកបូជាចារ្យ ផាន បូរី
អត្ថបទគម្ពីរថ្ងៃនេះ ព្រះយេស៊ូបានយាងចូលទៅក្នុងព្រះវិហារនៅទីក្រុងយេរូសាឡឹម ព្រះអង្គរកឃើញអ្នកលក់ដូរ អ្នកដូរប្រាក់ ឬគេប្រើព្រះវិហារនេះដោយអត់សមរម្យ។ ហេតុនេះបានជាព្រះអង្គមានព្រះបន្ទូលថា នៅទីនេះជាកន្លែងអធិដ្ឋាន មិនមែនជាកន្លែងលក់ដូរទេ! ព្រះអង្គសូមឲ្យគេកុំយកកន្លែងនេះក្លាយជាសម្បុកចោរ។
បងប្អូនជាទីស្រឡាញ់! នៅក្នុងអត្ថបទគម្ពីរដំណឹងល្អនៅក្នុងថ្ងៃនេះ ព្រះយេស៊ូមានព្រះបន្ទូលយ៉ាងច្បាស់ និងយ៉ាងជ្រៅ ព្រះអង្គហ៊ាននិយាយទៅកាន់អស់បងប្អូនដែលដូចជាមានទង្វើអត់ល្អនៅក្នុងព្រះវិហារ ដោយសារព្រះវិហារគឺជាទីសក្ការៈ មិនត្រូវយកទីសក្ការៈនេះទៅលក់ដូរ មិនត្រូវប្រើទីសក្ការៈនេះទៅរកស៊ីទេ។
ខ្ញុំចង់ចែកជាមួយនឹងបងប្អូនបីចំណុច៖
ទីមួយព្រះវិហារជាទីសក្ការៈដ៏បរិសុទ្ធគឺជាទីសក្ការៈដ៏បរិសុទ្ធ ដ៏ល្អ។ ហេតុនេះព្រះយេស៊ូរំលឹកយើងថា ជាទីកន្លែងដែលព្រះជាម្ចាស់មានព្រះជន្មគង់នៅគឺជាកន្លែងសម្រាប់មនុស្សទាំងអស់អធិដ្ឋាន និងជាកន្លែងថ្វាយសក្ការៈបូជា ជាកន្លែងដែលស្ដាប់ព្រះបន្ទូល ជាកន្លែងដែលស្ដាប់ការប្រៀនប្រដៅរបស់ព្រះជាម្ចាស់ ជាកន្លែងដែលស្ដាប់ការប្រៀនប្រដៅរបស់ព្រះសហគមន៍។ ហេតុនេះព្រះវិហារគឺជាកន្លែងលើកលែងទោស ដែលមានការប្រណីសណ្ដោស និងជាកន្លែងដែលនាំឲ្យយើងមានចិត្តស្ងប់ ឲ្យយើងមានចិត្តទូលាយ។ ហេតុនេះកុំឲ្យខ្លួនយើងជាកន្លែងដែលពោរពេញទៅដោយហិង្សា ជាកន្លែងដែលពោរពេញទៅដោយអំនួត ជាកន្លែងដែលពោរពេញទៅដោយសង្គ្រាម ឬជាកន្លែងពោរពេញទៅដោយគិតតែអំពីការស៊ីផឹក ជាកន្លែងដែលពោរពេញទៅដោយការលក់ដូរ។ នៅក្នុងជីវិតរបស់យើង រូបកាយរបស់យើងក៏ជាព្រះវិហារ ជាកន្លែងសក្ការៈដ៏ប្រសើរ និងដ៏ឧត្តមដើម្បីឲ្យព្រះជាម្ចាស់មានវត្តមាននៅក្នុងជីវិតរបស់យើង។ ហេតុនេះចូរឲ្យយើងបើកចិត្តឲ្យទូលាយ ដើម្បីអនុញ្ញាតឲ្យព្រះជាម្ចាស់យាងមកគង់ស្ថិតនៅក្នុងដួងចិត្តរបស់យើង។
ចំណុចទីពីរ ការកែប្រែចិត្តគំនិត។ ព្រះយេស៊ូសម្អាតព្រះវិហារមានន័យថា ព្រះយេស៊ូសម្អាតដួងចិត្តរបស់យើងដើម្បីឲ្យយើងបានស្អាត កុំឲ្យយើងមានសៅហ្មង ដើម្បីបញ្ជាក់ថា ព្រះអង្គរួមចំណែកនៅក្នុងការសម្អាតជីវិតរបស់យើង ហើយយើងត្រូវយល់ថា មិនមែនមិនមានអំពើបាបណាដែលព្រះជាម្ចាស់មិនអាចលុបបំបាត់នោះឡើយ ក៏ប៉ុន្តែ លុះត្រាតែយើងយល់ព្រមកែប្រែចិត្តគំនិត រួមដំណើរជាមួយព្រះអង្គ។ ការសម្អាតខ្លួន ជាពិសេសបេះដូង ចិត្តគំនិតរបស់យើង កុំឲ្យយើងមានភ្លើងនៅក្នុងដួងចិត្ត កុំឲ្យយើងមានភ្លើងដែលនាំឲ្យយើងមានសង្គ្រាម កុំឲ្យយើងមានភ្លើងហិង្សា។
ចំណុចទីបី ព្រះបន្ទូលជាប្រភពនៃជីវិត។ ព្រះអង្គបានបំលែងឲ្យព្រះវិហារនៅដួងចិត្តរបស់យើងក្លាយទៅជាទីសក្ការៈ ក្លាយទៅជារមណីយដ្ឋាន ក្លាយទៅជាឋានមួយដែលល្អប្រសើរនាំឲ្យយើងមានទំនាក់ទំនងមួយពិសេស។
ហេតុនេះសូមឲ្យបងប្អូនបើកចិត្តគំនិត ដើម្បីទទួលការសង្គ្រោះ។ សូមកុំឲ្យដួងចិត្តរបស់យើងក្លាយទៅជាទីផ្សារ ជាកន្លែងលក់ដូរ និងសូមឲ្យបងប្អូនទៅព្រះវិហារអធិដ្ឋាន ហើយសូមយកទីសក្ការៈនោះក្លាយទៅជាកន្លែងព្រះដំណាក់របស់ព្រះជាម្ចាស់ ដើម្បីឲ្យយើងក្លាយទៅជាដ៏បរិសុទ្ធផងដែរ។ អាម៉ែន៕
Daily Program
