ថ្ងៃទី២០ ខែមករា ឆ្នាំ២០២៦អត្ថបទគម្ពីរម៉ាកុស ២,២៣-២៨អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

បាទបងប្អូន ថ្ងៃសប្ប័ទជាថ្ងៃអ្វី? ជាថ្ងៃដែលសាសនាយូដាកាន់តាមធម្មវិន័យ អនុវត្តតាមធម្មវិន័យ ជា​ថ្ងៃ​សៅ​រ៍ដែលបងប្អូនជនជាតិយូដាតែងតែគោរព មិនធ្វើការងារតាមការកំណត់ធម្មវិន័យ។ កាបូតគួរស្រូវសាវ័ករបស់ព្រះយេស៊ូ គេចាត់ទុកថាជាការធ្វើការ គឺខុសនិងធម្មវិន័យ។ តែមិនដូច្នោះ ព្រះយេស៊ូ​កំពុង​​អប់រំបង្រៀនយើង ព្រះអង្គចង់ឱ្យយើងដឹងថា គោល​បំណងរបស់ធម្មវិន័យ ​គឺឲ្យ​យើង​គោរ​ព​​ព្រះ​ជា​ម្ចាស់ និងចេះបង្ហាញធម្មមេត្តាករុណារបស់ទ្រង់ ជាអ្វីដែលធំជាងធម្មវិន័យទៅទៀត។

អ្វីដែលព្រះអង្គមានព្រះបន្ទូលនៅក្នុងរឿងនេះ ព្រោះចង់បង្រៀនឱ្យអ្នកដែលកាន់តាមធម្មវិន័យកុំធ្វើ​តាម​តួ​អក្សរ កុំធ្វើតាមអ្វីដែលបានចារទុកដោយមិនបានឈ្វេងយល់ពីអត្ថន័យ និងគោលបំណង​នៅខាង​ក្នុង​ហ្នឹង​។ ការ​គួរ​ស្រូវ​ហ្នឹង​គឺដោយសារគាត់ឃ្លាន មនុស្សឃ្លាន មនុស្សមានការខ្វះខាត។ ដូច្នោះហើយ ធម្មវិន័យ​របស់​​ព្រះជាម្ចាស់ ឱ្យតម្លៃលើការជួយជាជាងការអនុវត្តតាមតួអក្សរ។

បងប្អូនដឹងហើយថា ព្រះសហគមន៍របស់យើងទោះបីយើងមានច្បាប់ ទោះបីយើងមានរបៀបវិន័យ តែ​យើង​ក៏មានការលើកលែងនៅក្នុងករណីខ្លះដែរ។ នេះជារឿងមួយដែលជា​គោលបំណងរបស់​ព្រះជា​ម្ចាស់ គឺដើម្បីធម្មមេត្តាករុណារបស់ព្រះជាម្ចាស់ទៅដល់មនុស្សគ្រប់រូប ជាពិសេសមនុស្សបាប អាច​មាន​ឱកាស​កែ​ប្រែខ្លួន ហើយត្រឡប់មករកព្រះជាម្ចាស់វិញ ដោយធម្មមេត្តាករុណា​របស់​ព្រះ​​អង្គ។

អគ្គសញ្ញាលើកលែងទោសក៏ជាមាគ៌ាមួយនាំឱ្យ​យើងឃើញ​ធម្មមេត្តា​ករុណា​របស់ព្រះអង្គ។ សូមបង​ប្អូន​អនុវត្ត​តាមសេចក្ដីស្រឡាញ់ តាមគោលដៅនៃច្បាប់ដែល​មាន​ក្នុងព្រះសហគមន៍ ដើម្បីឱ្យ​យើង​ទៅ​ដល់​សេចក្ដី​ស្រឡាញ់របស់ព្រះជាម្ចាស់យ៉ាងពិតប្រាកដ៕