ថ្ងៃទី១៩ ខែកក្កដា ឆ្នាំ២០២៥អត្ថបទគម្ពីរ​ ម៉ាថាយ (ម៉ាថាយ ១២,១៤-២១)អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

ព្រះបន្ទូលដំណឹងល្អថ្ងៃនេះតាម​លោកម៉ាថាយ​ព្រះយេស៊ូយកចិត្តទុកដាក់ជនក្រីក្រ និងជនកំសត់ទុរគត៌។  ព្រះអង្គបានមើលថែអ្នកជំងឺដើម្បីស្របតាមព្យាការីដែលនិយាយថា ​នេះជាបុត្រដែល​ជាទីស្រឡាញ់​របស់​យើង! យើងបានចាត់ព្រះអង្គឱ្យមកដើម្បីបងប្អូនកំសត់ទុរគត៌ទាំងឡាយ។ បងប្អូនធ្លាប់ឮ​ហើយ​ថា​ប្រជា​ជនអ៊ីស្រាអែលធ្លាប់ជាទាសករនៅប្រទេសអេហ្ស៊ីប៤៣០ឆ្នាំ ជាទាសករគ្មានសេរីភាព។ នេះជាទុក្ខលំបាក​ដ៏សែន​វេទនា ហើយពេលបុណ្យចម្លងព្រះជាម្ចាស់បាន​មករំដោះប្រជាជនអ៊ីស្រាអែល​ឱ្យមានសេរីភាព​ធ្វើ​ឱ្យ​ប្រជាជននេះបានទទួលការសង្រ្គោះ បានទទួលជីវិតថ្មីគឺគេមានសេរីភាព និងបានរស់នៅធ្វើជាបុត្រធីតា​របស់​ព្រះជាម្ចាស់។

ដោយសារតែបុណ្យចម្លង ដោយសារតែពិធីជ្រមុជទឹក ដោយសារតែព្រះយេស៊ូបាន​មកបូជាជីវិត​ដើម្បី​រំដោះ​មនុស្សដែលមានទុក្ខលំបាកទាំងឡាយ។ ដូច្នេះបានជាជីវិតរបស់យើងមានទុក្ខលំបាក យើង​មាន​ឧបសគ្គ​ផ្សេងៗដូចជាមានសង្រ្គាមជាដើម យើងឃើញមានការលះបង់ យើងឃើញមានភាពសោកសៅ និងយើងឃើញទុក្ខវេទនា។ នៅថ្ងៃនេះព្រះយេស៊ូបានបង្រៀនយើង និងផ្តល់ក្តីសុខឱ្យយើង  ប៉ុន្តែ​ឱ្យ​យើង​ទៅ​ជាអ្នកបម្រើរបស់ព្រះអង្គ។ ពេលមកក្នុងលោកនេះព្រះអង្គបានធ្វើឱ្យមនុស្សទាំង​អស់បានទទួល​អា​ហារ និងធ្វើឱ្យយើងចេះចែករំលែកអាហារដល់បងប្អូនឯទៀតៗ។

ពេលដែលយើងបានទទួលព្រះយេស៊ូមកក្នុងជីវិតរបស់យើង ធ្វើឱ្យយើងក្លាយជាអ្នកនាំសារ អ្នកនាំ​ដំណឹង​ល្អ ដើម្បីលើកទឹកចិត្ត ដើម្បីផ្តល់តម្លៃថ្លៃថ្នូរដល់ជីវិតរបស់មនុស្សជាតិ​នេះជាសេចក្តី​មួយ​ដែល​មនុស្សយើង​ត្រូវ​ការ។ អ្វីៗដែលកើតនៅជុំវិញយើង នៅក្នុងពិភពលោកនេះជាទុក្ខវេទនាដែលបំផ្លាញផ្ទះសម្បែង ការ​បាត់​បង់ក្រុមគ្រួសារបងប្អូន យើងមានបទពិសោធន៍ហើយដោយសារតែសង្គ្រាម។

ដូច្នេះថ្ងៃនេះឱ្យយើងរួមគ្នាទូលអង្វរ និងសុំព្រះវិញ្ញាណជួយបំភ្លឺជួយបើកចិត្តគំនិត​យើងនៅពេល​ណាដែល​ចិត្ត​របស់យើងមានការភ័យខ្លាច នៅពេលដែលចិត្តរបស់យើងមានសេចក្តីអាក្រក់​គឺនៅពេលនោះ​ហើយ​គឺយើងបម្រើមារ។ សូមព្រះយេស៊ូមកគង់នៅក្នុងចិត្តយើង ដើម្បីផ្លាស់ប្តូរចិត្តអាក្រក់ និងការភ័យខ្លាចរបស់​យើង​ទៅជាចិត្តដែលមានសេចក្តីស្រឡាញ់ ដែលមានធម៌មេត្តាករុណា ដើម្បីឱ្យយើងរកឃើញ​សន្តិភាព​ដែល​ព្រះជាម្ចាស់បានប្រទានឱ្យយើងម្នាក់ៗ។

សូមជូនពរបងប្អូន ​និងសូមបងប្អូនអធិដ្ឋានសូមឱ្យយើងដឹងថា មានតែធម៌មេត្តាករុណា មានតែសេចក្តី​ស្រឡាញ់​ដែលព្រះជាម្ចាស់ប្រទានឱ្យទេ! ដែលធ្វើឱ្យយើងជាបងប្អូននឹងគ្នា។ អាម៉ែន៕