ថ្ងៃទី១៨ ខែមេសា ឆ្នាំ២០២៦អត្ថបទគម្ពីរយ៉ូហាន ៦,១៦-២១អត្ថាធិប្បាយគម្ពីរដោយ៖ លោកបូជាចារ្យ អ៊ុន សុន

បងប្អូនជាទីស្រឡាញ់ នៅពេលដែលយើងបានទទួលជីវិតថ្មី យើងបានទទួលកំណើតថ្មី ដែលធ្វើឱ្យយើង​បាន​ទៅជាសាវ័ករបស់ព្រះយេស៊ូ។ ដូច្នេះសេចក្ដីទាំងឡាយដែលកន្លងផុតទៅ ដូចជាធ្វើឱ្យយើងបាន​មើល​ឃើញពិភពលោកថ្មី បានឃើញជីវិតថ្មីនៅក្នុងព្រះយេស៊ូ ដែលព្រះអង្គមានព្រះជន្មរស់ឡើងវិញ។ ថ្ងៃនេះ ព្រះយេស៊ូបានមករកយើង មករកសាវ័កហើយប្រាប់ថា "កុំខ្លាចអី ខ្ញុំទេតើ" ដោយសារសាវ័កដែលបាន​ធ្វើដំណើរនៅក្នុងទូក ក៏បានជួបនឹងខ្យល់ព្យុះ ជួបនឹងឧបសគ្គមួយមានរលកធំ មានខ្យល់ព្យុះយ៉ាងខ្លាំង​នៅ​ក្នុងទន្លេ ដែលធ្វើឱ្យពួកគាត់មានភ័យខ្លាចជាខ្លាំង។ តែនៅពេលដែលពួកគាត់មានឧបសគ្គ ភ័យខ្លាច រន្ធត់ នៅក្នុងដំណើរជីវិតនោះ នឹងមានសំឡេងដែលប្រាប់ថា "កុំខ្លាចអី ខ្ញុំទេតើ"។ មានន័យថា ព្រះយេស៊ូ​មករកយើង ព្រះយេស៊ូទតឃើញនៃទុក្ខលំបាករបស់យើង ព្រះអង្គមករកយើង និងនៅជាមួយយើង។

បងប្អូនជាទីស្រឡាញ់! ក្នុងជីវិតរបស់យើង មានន័យថាផ្នែកនៃរូបកាយរបស់យើង អ្វីដែល​យើង​មើល​ឃើញ ស្ថានភាព ទេសភាព អ្វីដែលរំជើបរំជួល ដែលធ្វើឱ្យប៉ះពាល់ជីវិតរបស់យើងដូចសង្គ្រាម ដែលធ្វើឱ្យ​យើង​ឃើញថាការធ្វើសង្គ្រាម ការប្រហារជីវិតគ្នា ធ្វើឱ្យយើងមានការភ័យខ្លាច ធ្វើឱ្យយើងតក់ស្លុត។ តែ​មាន​ក្តីសង្ឃឹមមួយគឺ លើសពីសង្គ្រាម លើសពីអ្វីៗដែលមនុស្សលោកធ្វើបាន ព្រះជាម្ចាស់បាន​ធ្វើ​ឱ្យ​សេចក្ដី​នោះផ្លាស់ប្តូរ ប្រែចិត្តគំនិតរបស់មនុស្សបាន ដោយព្រះអង្គមកគង់នៅជាមួយយើង។ ព្រះអង្គបាន​ផ្លាស់​ប្តូរប្រែចិត្តគំនិតរបស់យើង នូវការភ័យខ្លាចនោះ ដើម្បីឱ្យយើងឃើញថាមានព្រះអង្គដែលមក​ផ្សះ​ផ្សារ​មក​ណែ​នាំឱ្យយើងឃើញថាជីវិតថ្មីរបស់យើងគឺមានតម្លៃលើសពីសេចក្តីស្លាប់។

ហេតុនេះអ្វីៗដែលយើងមានការភ័យខ្លាច យើងមានការអស់សង្ឃឹមក្នុងជីវិត តែថ្ងៃនេះព្រះយេស៊ូបានមក​គង់​នៅជា​មួយយើង។ ដូច្នេះសូមឱ្យដួងចិត្តរបស់យើង គឺដួងចិត្តដែលមានជំនឿលើព្រះអង្គ ដែលដួងចិត្ត​មាន​​សេចក្តី​ស្រឡាញ់ព្រះអង្គ ឱ្យនាំជីវិតថ្មី ឱ្យនាំដំណឹងល្អថ្មី ដែលយើងមានព្រះជាម្ចាស់គង់ជាមួយ ហើយ​​ធ្វើ​​ឱ្យ​ជីវិតរបស់យើងចាកពីការភ័យខ្លាច ចាកពីអ្វីៗដែលធ្វើឱ្យយើងអស់សង្ឃឹម ធ្វើឱ្យយើង​មាន​ឧបសគ្គ។

ដូច្នេះខ្ញុំសូមអរព្រះគុណព្រះជាម្ចាស់ រាល់ពិធីអភិបូជានៃពិធីអរព្រះគុណ ដែលយើងបានស្តាប់ព្រះបន្ទូល ដែលយើងបានពិធីអរព្រះគុណលើកតម្កើងព្រះជាម្ចាស់ នៅក្នុងពេលបុណ្យចម្លង នៅពេលបុណ្យចូលឆ្នាំថ្មី ទាំងអស់នេះរួមឱ្យយើងឃើញថាវត្តមានរបស់ព្រះជាម្ចាស់ពិតមែននៅក្នុងជីវិតរបស់យើង ដែលធ្វើ​ឱ្យយើ​ង​ទទួលបានសិរីរុងរឿង ធ្វើឱ្យយើងទទួលបានអំណរសប្បាយក្នុងព្រះជាម្ចាស់៕