ថ្ងៃទី១៨ ខែកញ្ញា ឆ្នាំ២០២៥ អត្ថបទគម្ពីរ (លូកា ៧,៣៦-៥០)អត្ថាធិប្បាយគម្ពីរដោយ៖ លោកបូជាចារ្យ ហ្វ្រង់ស័រ អេមេល្សដាល
អត្ថបទដំណឹងល្អនៅថ្ងៃនេះ យើងឃើញព្រះយេស៊ូយាងទៅសោយព្រះស្ងោយនៅផ្ទះពួកគណៈផារ៉ាស៊ីម្នាក់ឈ្មោះស៊ីម៉ូន ហើយមានស្ត្រីដែលមានកេរ្តិ៍ឈ្មោះមិនល្អមកជួប នឹងបង្ហាញសេចក្តីស្រឡាញ់ចំពោះព្រះយេស៊ូ។ ព្រះយេស៊ូមានព្រះបន្ទូលថា គាត់លើកលែងទោសឲ្យស្ត្រីម្នាក់នោះ ព្រោះតែក្តីស្រឡាញ់ដែលគាត់មានចំពោះព្រះយេស៊ូ។ ដូច្នេះនរណាដែលស្រឡាញ់ព្រះយេស៊ូខ្លាំង អ្នកនោះទទួលការលើកលែងទោសហើយ ស្រ្តីម្នាក់នេះគាត់ដឹងថាព្រះយេស៊ូបានលើកលែងទោសឲ្យគាត់ សេចក្តីនោះគាត់ដឹងទុកជាមុនព្រោះគាត់ជឿលើធម៌មេត្តាករុណារបស់ព្រះយេស៊ូ។
ប្រហែលជាគាត់ឮគេនិយាយអំពីធម៌មេត្តាករុណារបស់ព្រះយេស៊ូចំពោះអ្នកបាប គាត់មកមិនដោយសារតែសុំឲ្យព្រះយេស៊ូលើកលែងទោសឲ្យគាត់ ប៉ុន្តែគាត់មកដើម្បីអរព្រះគុណព្រះយេស៊ូទុកជាមុន។ គាត់មានជំនឿ ឯព្រះយេស៊ូទទួលស្គាល់ថាជំនឿរបស់ស្ត្រីម្នាក់នោះបានសង្គ្រោះគាត់ហើយ។ សាច់រឿងនេះមានរបៀបពីរ ទីមួយ៖ ស្ត្រីម្នាក់នេះគាត់អរព្រះគុណព្រះយេស៊ូទុកជាមុន ដោយសារគាត់ដឹងថា ព្រះយេស៊ូបានលើកលែងទោសឲ្យគាត់ហើយ គាត់ជឿជាក់លើការលើកលែងទោស ដូច្នេះគាត់មានជំនឿមុតមាំលើធម៌មេត្តាករុណារបស់ព្រះជាម្ចាស់ ឬអាចនិយាយបានថាគាត់ស្រឡាញ់ និងជឿព្រះយេស៊ូដោយចិត្តបរិសុទ្ធទើបគាត់អាចទទួលបានការលើកលែងទោស។
ទោះជាយ៉ាងណា អត្ថបទដំណឹងល្អនៅថ្ងៃនេះជុំរុញឲ្យយើងមានចិត្តដូចស្ត្រីម្នាក់នេះ ទោះបីគាត់ជាមនុស្សដែលមានកេរ្តិ៍ឈ្មោះមិនល្អ ទោះបីគាត់បានប្រព្រឹត្តអំពើបាបយ៉ាងណាក៏ដោយ ក៏គាត់មានជំនឿលើធម៌មេត្តាករុណារបស់ព្រះជាម្ចាស់ នឹងក្តីស្រឡាញ់ព្រះយេស៊ូ ដូច្នេះឲ្យយើងស្រឡាញ់ព្រះយេស៊ូ ដូចស្ត្រីម្នាក់នេះស្រឡាញ់ព្រះយេស៊ូយ៉ាងនោះដែរ។ សូមអធិដ្ឋានថ្វាយបង្គំ ធ្វើកិច្ចការល្អដល់អ្នកដទៃហើយជឿជាក់លើធម៌មេត្តាករុណារបស់ព្រះជាម្ចាស់ ទោះបីយើងបានប្រព្រឹត្តអំពើបាបយ៉ាងណា ប្រសិនបើយើងជឿ យើងអង្វរ ព្រះជាម្ចាស់នឹងលើកលែងទោសឲ្យយើងជាមិនខាន។
ដូច្នេះ កុំខ្លាច! កុំខ្មាស់អៀន! ព្រោះស្ត្រីម្នាក់នេះគាត់មានកេរ្តិ៍ឈ្មោះមិនល្អយ៉ាងណា គាត់ត្រូវគេរិះគន់ នឹងគ្មាននរណាស្រឡាញ់គាត់ ប៉ុន្តែគាត់នៅតែមកជួបព្រះយេស៊ូ គាត់មិនខ្លាចគេ គាត់មិនខ្មាស់គេ គឺគាត់បានទទួលជីវិត ជីវិតដ៏អស់កល្បជានិច្ច គាត់បានទទួលការលើកលែងទោស និងសេចក្តីស្រឡាញ់ពីព្រះយេស៊ូ ដូច្នេះ កុំខ្លាច! កុំខ្មាស់! ឲ្យតែជាយើងមានចិត្តស្រឡាញ់ព្រះយេស៊ូប្រាកដ នឹងប្រែចិត្តគំនិតនោះយើងនឹងទទួលធម៌មេត្តាករុណារបស់ព្រះជាម្ចាស់។ អាម៉ែន៕
Daily Program
