ថ្ងៃទី១៧ ខែមីនា ឆ្នាំ២០២៦អត្ថបទគម្ពីរ យ៉ូហាន ៥ (១-១៦)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

ព្រះបន្ទូលថ្ងៃនេះដកស្រង់ចេញពីយ៉ូហាន ជំពូក៥ (១-១៦) ទាក់ទងនឹងព្រះយេស៊ូបានព្យាបា​ល​មនុស្ស​​​ពិការ​ម្នាក់នៅក្បែរស្រះទឹក គាត់គឺជាមនុស្សម្នាក់ដែលអស់សង្ឃឹម ដោយសារមិនអាចទៅ​ព្យា​បាល​​នៅ​ពេល​ដែលមានរលកដំបូងឡើយ។

ការព្យាបាលរបស់ព្រះយេស៊ូនៅពេលនេះ គឺកើតចេញពី ព្រះហឫទ័យមេត្តាករុណារបស់ព្រះអង្គ។ ដំណើរ​ជីវិតរបស់បុរសពិការរូបនេះ ប្រៀបបាននឹងដំណើរជីវិតរបស់យើងទាំងអស់គ្នា ជាពិសេស​បង​ប្អូន​គ្រីស្ត​បរិស័ទ ឬអ្នកដែលកំពុងរង់ចាំការសង្គ្រោះពីព្រះអង្គ។ ​នៅក្នុងពិភពលោកដែលពោរពេញ​ដោយភាព​អស់​សង្ឃឹម​នាពេលបច្ចុប្បន្ន មានតែព្រះយេស៊ូមួយអង្គគត់​ដែលផ្ដល់​កម្លាំងឱ្យយើងអាចក្រោកឈរ​ឡើង​វិញ​បាន។ ទោះបីជាព្រះអង្គព្យាបាលបុរសពិការនៅ ថ្ងៃ​​សប្ប័ទក៏ដោយ ប៉ុន្តែសេចក្ដី​ស្រឡាញ់​របស់​ព្រះអង្គ​​គឺ​ធំធេ​ង លើសពីច្បាប់ ឬធម្មវិន័យទាំងឡាយ។

សូមឱ្យដំណើរជីវិតរបស់បុរសពិការនេះ ក្លាយជាមេរៀនសម្រាប់យើងគ្រប់គ្នា។ ទោះបីជាដំបូងយើងមិន​ទាន់​ស្គាល់ព្រះអង្គច្បាស់ ឬកំពុងស្វែងយល់ក៏ដោយ សូមព្យាយាមស្វែងរក និងជួបព្រះអង្គ​ឱ្យបាន​ញឹក​ញាប់។ ដើម្បីឱ្យជីវិតរបស់យើងនឹកឃើញ ឬយល់ឃើញពីវត្តមានរបស់ព្រះអង្គ នៅក្នុងជីវិត​រស់​នៅ​​ប្រចាំ​ថ្ងៃ​របស់យើង៕