ថ្ងៃទី១៦ ខែកញ្ញា ឆ្នាំ២០២៥ អត្ថបទគម្ពីរ (លូកា ៧,១១-១៧)អត្ថាធិប្បាយគម្ពីរដោយ៖ លោកបូជាចារ្យ រឿង ឆ័ត្រសិរី

បាទជម្រាបសួរបងប្អូនជាទីស្រឡាញ់! នៅថ្ងៃនេះជាថ្ងៃដែលយើងកំពុងនៅអំឡុងពេលត្រៀមបុណ្យភ្ជុំ ជាវេលាបងប្អូនខាងពុទ្ធបរិស័ទកំពុងកាន់បិណ្ឌ ហើយចំពោះគ្រីស្តបរិស័ទយើងក៏​មានការត្រៀមចិត្ត​គំនិត​ដែលស​ម្រាប់​​បុណ្យភ្ជុំនេះ។ ព្រះបន្ទូលថ្ងៃនេះរម្លឹកដល់វិញ្ញាណក្ខន្ធមនុស្សស្លាប់តាមរបៀប​កាតូ​លិក​។

យើងដឹងថាព្រះយេស៊ូមកក្នុងលោកនេះដើម្បីសង្គ្រោះមនុស្សលោក ថ្ងៃនេះព្រះអង្គបានប្រោសឲ្យ​ក្មេង​ម្នាក់​​បានរស់ឡើងវិញជាក្មេងដែលស្លាប់ទៅហើយ ត្បិតក្រុមគ្រួសាររបស់គាត់មានការសោក​ស​ង្រេងអា​ឡោះ​អាល័យហើយប្រជាជនទាំងអស់ក៏យំ ហើយគេបានមកលើកទឹកចិត្ត​ឲ្យ​គ្រួសារ​នេះ​ដែរ​។ ដូច្នេះ​ព្រះយេ​ស៊ូ​ក៏​បាន​ធើ្វ​ការដ៏​អស្ចារ្យ និងប្លែកពីព្យាការីឯទៀតៗ គឺព្រះអង្គ​បានប្រោ​ស​ឲ្យ​​ក្មេង​នោះ​រស់ឡើងវិញ​សារ​ជា​ថ្មី​ទ្រង់បានធើ្វ​ឲ្យ​​ភាពសោកសង្រេងនៅក្នុងគ្រួសាររបស់ក្មេងនោះបានធូរស្រាល។

បាទ! បងប្អូន បទពិសោធន៍របស់យើងពេលដែលយើងមានបងប្អូនស្លាប់ក្នុងគ្រួសារ ពិតមែន​ជាពេលវេ​លា​​​ដ៏​សោក​សង្រេងមែនទែន ក៏ប៉ុន្តែជំនឿខាងកាតូលិកនាំឲ្យយើងយល់ថាទោះបី​យើង​​ប្រឈម​​នឹង​សេច​ក្តី​ស្លាប់​ មិនថាមនុស្សដែលយើងស្រឡាញ់ មិត្តភក្តិក្តី បងប្អូនក្តីក៏យើងនៅតែមានក្តីសង្ឃឹមជានិច្ចថា ថ្ងៃណា​មួយ​ព្រះយេស៊ូនឹងប្រោសឲ្យអ្នក​ដែល​ស្លាប់​នឹងមានជីវិតថ្មីរស់ឡើងវិញ។ ការរស់ឡើងវិញរបស់កូនក្មេ​ង​នេះជាសញ្ញា​មួយ​​បង្ហាញថា ក្រោយពេលស្លាប់យើងនឹងមាន​ជីវិតថ្មីជាសេចក្តីសង្ឃឹមសម្រាប់​យើង​ទាំង​អស់គ្នា។

បងប្អូនជាទីស្រឡាញ់! ឆ្នាំនេះជាឆ្នាំនៃសេចក្តីសង្ឃឹមយើងដឹងថាស្ថានភាពនៅ​ជុំវិញ​យើង​ សុទ្ធតែ​ទាក់​ទង​នឹង​សេចក្តីស្លាប់។ ការបៀតបៀនធ្វើសង្គ្រាម ការបោកបញ្ឆោត ការធ្វើទុក្ខទោម្នេញ នាំ​​ឲ្យ​មាន​មនុ​ស្ស​​​ស្លាប់។ ទាំងអស់នេះធ្វើឲ្យយើងធ្លាក់ទឹកចិត្ត ប៉ុន្តែបងប្អូនព្រះបន្ទូលថ្ងៃនេះបញ្ជាក់ច្បាស់ថា ព្រះ​យេ​ស៊ូ​​នៅ​ជាមួយយើង។ ព្រះអង្គបានជួយក្មេងឲ្យរស់​ឡើងវិញ​យ៉ាង​ណា​ព្រះ​អង្គ​​នឹង​ជួយឲ្យ​យើង​រស់​ឡើង​វិញ​យ៉ាង​នោះដែរ។ មានន័យថាយើងមានកម្លាំងចិត្តនៅក្នុងលោកនេះសិន មួយចំណែកនៃការបន្តការរស់​នៅ​របស់​​យើងនឹងប្រោសឲ្យយើងរស់ឡើងវិញនៅពេលយើងលាចាកពីលោកនេះផងដែរ។

សូមបង​ប្អូន​រួមចិត្តគំនិតអធិដ្ឋានសម្រាប់អស់អ្នកដែលកំពុងប្រឈមនឹងទុក្ខលំបាក ជាពិសេសអ្នក​កំពុង​ប្រឈម​​នឹង​សេចក្តីស្លាប់ ដូចជានៅមន្ទីរពេទ្យរូស្សីមានគ្រីស្តបរិស័ទយើង​ម្នាក់គាត់ឈឺទោះ​បីគាត់មិន​ដឹង​ខ្លួន​​តែ​ក្រុមគ្រួសារគាត់បានអញ្ជើញខ្ញុំឲ្យទៅលាបប្រេងជូនគាត់ នេះជាសញ្ញាមួយបង្ហាញពីការ​យកចិត្តទុក​ដាក់​ពី​គ្រួសារ និង ជាកិច្ចការមួយដែល​ធ្វើឲ្យគាត់អាចចូលនៅក្នុងជីវិតរស់ឡើងវិញយ៉ាងស្រួល។

បងប្អូនជាទីស្រឡាញ់! សូមឲ្យក្នុងអំឡុងពេលនេះ បងប្អូនលើកទឹកចិត្តគ្នាទៅវិញទៅមក ឲ្យអ្នក​ដែល​កំពុង​​ប្រឈម​នឹងសេចក្តីស្លាប់ឲ្យគាត់មានកម្លាំងចិត្ត តាមរយៈអគ្គសញ្ញាផ្សេងៗ។ ហើយក៏សូមឲ្យយើង​ទាំង​អស់​គ្នារួម​គ្នា​អធិដ្ឋាន សម្រាប់បងប្អូនដែលបានចាកឋានទៅហើយ អាចជាមិត្តភក្តិ បងប្អូន សមាជិ​ក​ក្នុ​​ង​​គ្រួសារ​យើង ដើម្បីឲ្យគាត់បានរស់នៅយ៉ាងសុខសាន្តអស់កល្បជានិច្ចជាមួយនឹងព្រះជាម្ចាស់ផងដែរ។ សូម​ព្រះ​ជា​ម្ចាស់ប្រទានពរឲ្យអស់លោក៕